- 1
- Aue te mate mo tenei kua paru nei, kua poke, mo te pa tukino!
- 2
- Kihai ia i whakarongo ki te reo, kihai i pai kia riria te he; kihai i whakawhirinaki ki a Ihowa; kihai i whakatata ki tona Atua.
- 3
- He raiona e hamama ana ona rangatira i roto i a ia, he wuruhi i te ahiahi ona kai whakarite whakawa, kahore he wawahi wheua ma ratou i te ata.
- 4
- Ona poropiti, he wairangi, he hunga tinihanga: kua whakapokea te wahi tapu e ona tohunga, kua whakatakā e ratou te ture.
- 5
- He tika a Ihowa kei waenganui ia i a ia; kahore ana mahi he: i tenei ata, i tenei ata, e whakaputaina ana e ia tana whakarite whakawa ki te māramatanga, e kore tana e ngaro atu; e kore ia te tangata whakahaere he e mohio ki te whakama.
- 6
- Kua oti nga iwi te hatepe atu e ahau; tu kau ana o ratou taumaihi; kua ururua i a au o ratou huarahi, kahore e haerea: kua ngaro o ratou pa, e kore e nohoia e te tangata.
- 7
- I ki ahau, Tera koe e wehi i a au, ka pai koe kia riria to he; penei kihai i hatepea atu to ratou nohoanga, kihai i pera me aku whiunga katoatanga i a ratou: heoi moata tonu to ratou maranga, hē iho i a ratou a ratou mahi katoa.
- 8
- Mo reira tatari mai koutou ki a au, e ai ta Ihowa, ki te ra e whakatika atu ai ahau ki te taonga parakete: ko taku tikanga hoki tenei, kia huihuia mai nga tauiwi, kia whakaramemenetia mai nga kingitanga, kia ringitia ki runga ki a ratou taku riri, taku whakatakariri katoa, mura tonu: ka pau hoki te whenua katoa i te ahi, ara, i taku hae.
- 9
- Ka hurihia atu hoki e ahau i reira he reo tika ki nga iwi, e karanga ai ratou katoa ki te ingoa o Ihowa, e kotahi tonu ai te whakaaro e mahi ai ratou ki a ia.
- 10
- Ka kawea mai he whakahere ki a au e te hunga e inoi ana ki a au, ara, e te tamahine a aku whati, i tera taha o nga awa o Etiopia.
- 11
- I taua rangi e kore koe e whakama ki tetahi o o mahi, o o he ki a au: no te mea ka tangohia atu e ahau i roto i a koe te hunga e whakamanamana ana ki to whakapehapeha, e kore ano koe e whakakake a muri ake nei i runga i toku maunga tapu.
- 12
- Ka whakatoea ano e ahau etahi i roto i a koe, he ware, he rawa-kore, a ka whakawhirinaki ratou ki te ingoa o Ihowa.
- 13
- E kore nga toenga o Iharaira e mahi he, e korero teka ranei, e kore ano e kitea he arero teka i roto i o ratou mangai; ka kai hoki ratou, ka takoto, tē ai he kai whakawehi.
- 14
- Waiata e te tamahine o Hiona; hamama, e Iharaira; whakapaua te ngakau ki te koa, ki te whakamanamana, e te tamahine o Hiruharama.
- 15
- Kua kore i a Ihowa nga whakarite whakawa mou, kua peia e ia to hoa riri; kei roto i a koe a Ihowa kingi o Iharaira; e kore koe e kite i te kino a muri ake nei.
- 16
- Ko te korero tenei ki Hiruharama i taua ra, Kaua e wehi; E Hiona, kei ngoi-kore o ringaringa.
- 17
- He nui a Ihowa tou Atua i roto i a koe; mana e whakaora, ka koa ia, ka hari ki a koe; ka ata noho ia i runga i tona aroha, ka whakamanamana ia, ka waiata ki a koe.
- 18
- Ka whakaminea mai e ahau te hunga e pouri ana ki te huihuinga nui, era i roto i a koe, era e pikau na i tona ingoa kino.
- 19
- Nana, i taua wa, ka mahi ahau ki te hunga katoa e whakatupukino ana i a koe: ka whakaorangia ano e ahau te wahine e totitoti ana, ka kohikohia mai ano hoki te mea i peia atu, ka meinga ano ratou e ahau hei whakamoemititanga, hei ingoa i nga whenua katoa i whakama ai ratou.
- 20
- I taua wa ka kawea mai ano koutou e ahau, i te wa e whakaminea mai ai koutou e ahau: ka meinga hoki koutou e ahau hei ingoa, hei whakamoemititanga, i roto i nga iwi katoa o te whenua, ina whakatahuritia atu e ahau to koutou whakaraunga me te titiro ano koutou, e ai ta Ihowa.
Address: 
Phone: 
Email: