- 1
- I muri i enei mea ka haereere a Ihu i Kariri: kahore hoki ia i pai ki te haereere i Huria, e rapu ana hoki nga Hurai kia whakamatea ia.
- 2
- Na, kua tata ta nga Hurai hākari hanga wharau.
- 3
- Na, ka mea ona teina ki a ia, Haere atu i konei, anga atu ki Huria, kia kite ai ano hoki o akonga i au mahi e mahi nei koe.
- 4
- E kore hoki tetahi tangata e mea huna i tetahi mea, ki te whai ia kia kitea nuitia. Ki te mea koe i anei mea, kia kite te ao i a koe.
- 5
- Kihai hoki ona teina i whakapono ki a ia.
- 6
- N a, ka mea a Ihu ki a ratou, Kahore ano kia taea noatia toku taima: ko to koutou taima ia kei nga wa katoa.
- 7
- E kore te ao e kino ki a koutou; engari ka kino ki a au, no te mea e whakaaturia ana e ahau e kino ana ana mahi.
- 8
- Haere koutou ki tenei hākari: e kore ahau e haere wawe atu ki tenei hākari; kahore hoki toku taima kia ata rite noa.
- 9
- A ka mutu tenei korero āna ki a ratou, ka noho ia ki Kariri.
- 10
- Ano ka riro atu ona teina, ka haere atu ano hoki ia ki te hākari, ehara i te mea whakakite nui, engari i tuā huna.
- 11
- A i rapu nga Hurai ki a ia i te hākari, i mea Kei hea ia?
- 12
- A he nui te korero komuhumuhu mona i roto i te mano: ko etahi i mea, He tangata pai ia: ko etahi i mea, Kahore; engari e whakapohehe ana ia i te iwi.
- 13
- Heoi kihai i puaki nui te kupu a tetahi tangata mona, he wehi ki nga Hurai.
- 14
- Na, i waenganui o te hākari, ka haere atu a Ihu ki roto ki te temepara whakaako ai.
- 15
- A ka miharo nga Hurai, ka mea, Na te aha i hua ai te mohio o tenei tangata, ehara nei hoki ia i te mea whakaako?
- 16
- Ka whakahokia mai e Ihu ki a ratou, ka mea, Ehara i te mea naku ake taku e whakaako nei, engari na toku kai tono mai.
- 17
- Ki te pai tetahi tangata ki te mea i tana e pai ai, e mātau ia ki te whakaakoranga, no te Atua ranei, he korero naku ake ranei.
- 18
- Te tangata nāna ake tāna korero, e whai ana ia i tona ake kororia: tena ki te whai tetahi i te kororia o tona kai tono, e pono ana ia, a kahore ona hē.
- 19
- He teka ianei na Mohi te ture i hoatu ki a koutou, a kahore e whakaritea te ture e tetahi o koutou? He aha koutou ka whai nei kia whakamatea ahau?
- 20
- Na, ko te whakahokinga atu a te mano, ka mea, He rewera tou: ko wai te whai ana kia whakamatea koe?
- 21
- Ka whakahokia mai e Ihu, ka mea ki a ratou, Kotahi aku mahi i mahi ai, a e miharotia ana e koutou katoa.
- 22
- Na Mohi i homai te kotinga ki a koutou; (ehara i te mea na Mohi ake, engari na nga tupuna;) a e kokoti ana koutou i te tangata i te hapati.
- 23
- Ki te kotia te tangata i te hapati, kei takahia te ture a Mohi; e riri ana oti koutou ki a au, moku i whakaora rawa i te tangata i te hapati?
- 24
- Kaua e waiho te whakawakanga i runga i ta te kanohi, engari kia tika ta koutou whakaritenga whakawa.
- 25
- Me i reira ka mea etahi o nga tāngata o Hiruharama, Ehara oti tenei i a ia, i whaia nei e ratou kia whakamatea?
- 26
- Na, e korero nui nei ia, a kahore a ratou kupu ki a ia. E tino mātau ana ranei nga rangatira, ko te tino Karaiti tenei?
- 27
- Otiia e mātau ana tatou ki te wahi i puta mai ai tenei: tena ka tae mai a te Karaiti, kahore he tangata e mātau ki te wahi e puta mai ai ia.
- 28
- Na, ka karanga a Ihu i te temepara i a ia e whakaako ana, ka mea, E mātau ana koutou ki a au, e mātau ana ano hoki ki te wahi i haere mai ai ahau: ehara i a au ake taku haere mai; engari e pono ana te kai tono mai i a au; kahore nei ano koutou i mātau noa ki a ia.
- 29
- E mātau ana ahau ki a ia; i puta mai hoki ahau i a ia, nana ano ahau i tono mai.
- 30
- A i whai ratou kia hopukia ia: otiia kihai i pa te ringaringa o tetahi ki a ia, kahore hoki tona haora i taka noa.
- 31
- A he tokomaha o te mano i whakapono ki a ia, i mea, Ka tae mai a te Karaiti, tera ranei e maha atu āna merekara e mea ai i a tenei e mea nei?
- 32
- I rongo nga Parihi i te mano e korerorero ana i enei mea mona; na, ka tonoa e nga Parihi ratou ko nga tohunga nui nga katipa ki te hopu i a ia.
- 33
- Na, ka mea a Ihu ki a ratou, He iti noa ake te wahi e noho ai au ki a koutou, katahi au ka hoki ki toku kai tono mai.
- 34
- Tera koutou e rapu i a au, heoi e kore koutou e kite: e kore hoki koutou e ahei te haere ake ki te wahi e noho ai ahau.
- 35
- Na, ka mea nga Hurai ki a ratou ano, E haere oti ia ki hea, e kore ai e kitea e tatou? e haere oti ia ki nga konene i roto i nga Kariki, ako ai i nga Kariki?
- 36
- He ki aha tenei e ki mai nei ia, Tera koutou e rapu i a au, a e kore e kite: e kore hoki koutou e ahei te haere ake ki te wahi e noho ai ahau?
- 37
- I te ra whakamutunga, i te ra nui o te hākari, i tu a Ihu, i karanga, i mea, Ki te mate wai tetahi, kia haere mai ia ki a au inu ai.
- 38
- Ki te whakapono tetahi ki a au, ka rite ki ta te Karaipiture, ka rere mai nga awa wai ora i roto i tona kopu.
- 39
- (I korerotia tenei e ia mo te Wairua, meake nei riro i te hunga e whakapono ana ki a ia; kahore hoki te Wairua Tapu kia tae noa mai; no te mea kiano a Ihu i whakakororiatia noatia.)
- 40
- A he tokomaha o te mano i to ratou rongonga ai i tenei kupu, i mea, He pono ko te Poropiti tenei.
- 41
- Ka mea etahi, Ko te Karaiti tenei. Ko etahi i mea, E puta mai ranei a te Karaiti i Kariri?
- 42
- Kahore koia a te Karaipiture i mea, E puta mai a te Karaiti i te uri o Rawiri, i Peterehema, i te kāinga i noho ai a Rawiri?
- 43
- Na, ka waiho ia hei take wehewehenga ma te mano.
- 44
- Ko etahi o ratou i mea kia hopukia ia: otira kihai i pa nga ringa o tetahi ki a ia.
- 45
- Na, ko te taenga atu o nga katipa ki nga tohunga nui ratou ko nga Parihi; ka mea atu enei ki a ratou, Na te aha ia te kawea mai ai e koutou?
- 46
- Ka whakahokia mai e nga katipa, Kahore rawa he tangata i rite ana korero ki a tenei tangata.
- 47
- Na, ka pehia mai ta ratou e nga Parihi, Kua tinihangatia ano hoki koutou?
- 48
- Kua whakapono koia tetahi o nga rangatira o nga Parihi ranei ki a ia?
- 49
- Ko tenei hunga ia e kore nei e mātau ki te ture, ka oti ratou te kanga.
- 50
- Ka mea a Nikorima ki a ratou, (tera hoki i haere po mai ki a ia, ko ia hoki tetahi o ratou.)
- 51
- Ka whakahengia ranei te tangata e ta tatou ture, i te mea kahore ano i whakarongo noa ki a ia, i mātau hoki ki tana mahi?
- 52
- Na, ka pehia mai e ratou, ka mea ki a ia, Ko koe hoki no Kariri? Mau e rapu, e titiro: kahore hoki kia ara noa mai tetahi poropiti i Kariri.
- 53
- Na, hoki atu ana ratou ki tona whare ki tona whare.
Address: 
Phone: 
Email: