Jonah Chapter 2 - Paipera Tapu 1868

1: Katahi a Hona ka inoi ki a Ihowa ki tona Atua i roto i te kopu o te ika,
2: I mea ia, I karanga atu ahau, he ngakau mamae hoki noku, ki a Ihowa; a whakao mai ana ia ki a au, i tangi atu ahau i roto i te kopu o te po, a whakarongo mai ana koe ki toku reo.
3: I makā hoki ahau e koe ki te rire, ki waenga moana, a karapotia ana ahau e nga roma, tika ana āu tuatea katoa me āu ngaru i runga i a au.
4: Na, ko taku meatanga ake, Kua oti ahau te pei atu i mua i o kanohi; tera ano ia ahau ka titiro atu ki to temepara tapu.
5: Karapotia ana ahau e te wai, tae tonu iho ki te wairua; araia mai ana ahau e te rire i tetahi taha, i tetahi taha; toku māhunga he mea takatakai na te rimu.
6: I haere ahau ki raro ki nga take o nga maunga, i tetahi taha oku, i tetahi taha, te whenua me ona tutaki, ake ake ake; heoi whakaputaina ake ana e koe toku ora i roto i te pirau, e Ihowa, e toku Atua.
7: I te hemonga o toku wairua i roto i a au i mahara ahau ki a Ihowa: i tae atu ano taku inoi ki a koe ki to temepara tapu.
8: Te hunga e pupuri ana i nga mea tekateka noa e whakarerea ana e ratou nga atawhaitanga mo ratou.
9: Ko au ia ka mea patunga tapu ki a koe i runga i te reo whakawhetai; ka whakamanā e ahau aku kupu taurangi. Na Ihowa te whakaoranga.
10: I korero ano a Ihowa ki te ika, a ka ruakina mai a Hona ki te wahi maroke.