- 1
- Na, ka runanga a Rawiri ki nga rangatira o nga mano, o nga rau, ki nga rangatira katoa.
- 2
- I mea ano a Rawiri ki te whakaminenga katoa o Iharaira, Ki te mea e pai ana ki a koutou, a ka tika mai i to tatou Atua i a Ihowa, kia tuku tangata atu tatou ki ia wahi, ki ia wahi, ki o tatou teina kua mahue nei ki nga whenua katoa o Iharaira, ki a ratou tahi ano ko nga tohunga, ko nga Riwaiti, ki nga pa, me nga wahi o waho ake o aua pa, kia huihui mai ki a tatou.
- 3
- A, kia whakahokia mai e tatou te aaka o to tatou Atua. Kihai hoki tatou i rapu tikanga, ki reira i nga ra o Haora.
- 4
- Na, ka mea te whakaminenga katoa kia pera ano ratou; he tika hoki taua mea ki te titiro iho a te iwi katoa.
- 5
- Na, ka huihuia mai e Rawiri a Iharaira katoa i Hihoro o Ihipa, a tae noa ki te haerenga atu ki Hamata, hei kawe mai i te aaka o te Atua i Kiriata-tearimi.
- 6
- Na, ko te haerenga o Rawiri ratou ko Iharaira katoa ki Paaraha, ara, ki Kiriata-tearimi o Hura, kia kawea mai ai e ratou i reira te aaka o te Atua, o Ihowa e noho nei i waenganui o nga kerupima, nona nei te ingoa i karangatia nei ki taua aaka.
- 7
- Na, ka kawea mai e ratou te aaka o te Atua i runga i te kāta hou i roto i te whare o Apinarapa: na Uha hoki raua ko Ahio i arahi te kāta.
- 8
- Na, ka whakapaua to ratou kaha e Rawiri ratou ko Iharaira katoa ki te takaro ki te aroaro o te Atua; he waiata ano to ratou, he hāpa, he timipera, he himipora, he tētere.
- 9
- A ka tae mai ratou ki te patunga witi a Hirono, ka totoro mai te ringa o Uha ki te pupuri i te aaka; i whakaoioia hoki e nga kau.
- 10
- Na, ka mura mai te riri a Ihowa ki a Uha, patua iho mo tona ringa i totoro ki te aaka; a, mate iho ia i reira i te aroaro o te Atua,
- 11
- Na, ka pouri a Rawiri mo te toreretanga i torere ai a Ihowa ki a Uha. Na, karangatia ana e ia taua wahi, Ko Perete-uha: e mau nei ano, a taea noatia tenei ra.
- 12
- Na, ka wehi a Rawiri i a Ihowa i taua ra, a ka mea, Ma te aha e kawea ai e ahau te aaka o te Atua ki toku whare.
- 13
- Na, kihai a Rawiri i tango i te aaka ki a ia ki te pa o Rawiri; heoi kawea ketia ana e ia ki te whare o Opere-eroma Kiti.
- 14
- Na, noho ana te aaka o te Atua ki te whare o Opere-eroma, ki tona whare ano, e toru nga marama. A ka manaakitia e Ihowa te whare o Opere-eroma, me ana mea katoa.
Address: 
Phone: 
Email: