- 1
- Na, ka tonoa mai etahi karere e Hirama kingi o Taira ki a Rawiri, me etahi rakau, he hita, me nga kai mahi o nga kohatu whare, me nga kai mahi rakau, hei hanga i tetahi whare mona.
- 2
- Na, ka mohio a Rawiri kua whakapumautia ia e Ihowa hei kingi mo Iharaira; kua whakanuia rawatia hoki tona rangatiratanga, he whakaaro ki tona iwi, ki a Iharaira.
- 3
- Na, ka tangohia ano e Rawiri etahi wahine māna ki Hiruharama, a ka whanau ano etahi atu tamariki, etahi atu tamahine ma Rawiri.
- 4
- Ko nga ingoa ano enei o ana i whanau ki Hiruharama; Ko Hamua, ko Hopapa, ko Natana, ko Horomona,
- 5
- Ko Ipihara, ko Erihua, ko Ereparete,
- 6
- Ko Noka, ko Nepeke, ko Iapia,
- 7
- Ko Erihama, ko Peeriara, ko Eriparete.
- 8
- A, te rongonga o nga Pirihitini kua oti a Rawiri te whakawahi hei kingi mo Iharaira katoa; na, ka haere mai nga Pirihitini katoa ki te rapu i a Rawiri. A ka rongo a Rawiri, na, puta mai ana ia ki te whakatau i a ratou.
- 9
- Na, te haerenga mai o nga Pirihitini, tohatoha noa atu ana ratou ki Raorao Repaimi.
- 10
- Na, ka ui a Rawiri ki te Atua, ka mea, Me haere ranei ahau ki nga Pirihitini? E homai ranei ratou e koe ki toku ringa? Na, ko te meatanga mai a Ihowa ki a ia, Haere atu, ka hoatu hoki ratou e ahau ki tou ringa.
- 11
- Na, haere mai ana ratou ki Paara-peratimi; patua iho ratou i reira e Rawiri. Na, ka mea a Rawiri, Pakaru ana i te Atua oku hoa riri, he mea mea na toku ringa; koia ano kei te pakaruhanga wai. Na reira i karangatia ai te ingoa o taua wahi Ko Paara-peratimi.
- 12
- A, mahue ana i a ratou o ratou atua ki reira. Na, ka korero mai a Rawiri, a, tahuna ana e ratou ki te ahi.
- 13
- Na, ka tohatoha noa atu ano hoki nga Pirihitini ki te raorao.
- 14
- A ka ui atu ano a Rawiri ki te Atua, a ka mea te Atua ki a ia, Kaua e haere ki runga ki te whai i a ratou: haere awhio atu i a ratou, ka whakaeke ai i a ratou i te ritenga mai o nga maperi.
- 15
- A ka rangona e koe he haruru haere i runga i nga maperi, ko reira koe puta mai ai ki te whawhai; no te mea kua riro mai te Atua ki mua i a koe ki te patu i te ope o nga Pirihitini.
- 16
- Na, peratia ana e Rawiri me ta te Atua i whakahau ai ki a ia; a, patua iho e ratou te ope o nga Pirihitini i Kipeono, a tae noa ki Katere.
- 17
- Na, kua paku te ingoa o Rawiri ki nga whenua katoa; a ka mea a Ihowa i te wehi ki a ia kia pa ki nga iwi katoa.
Address: 
Phone: 
Email: