- 1
- Heoi kawea mai ana e ratou te aaka o te Atua, whakaturia ana ki waenganui o te teneti i whakaarahia e Rawiri mona, tukua mai ana e ratou nga tahunga tinana, me nga whakamarietanga ki te aroaro o te Atua.
- 2
- A ka mutu ta Rawiri whakaeke i nga tahunga tinana, me nga whakamarietanga, na, ka manaakitia e ia te iwi i runga i te ingoa o Ihowa.
- 3
- A, i tuwhaina ano e ia ma nga tangata katoa o Iharaira, ma te tane, ma te wahine, kotahi rohi taro ma tenei, ma tenei, tetahi wahi kikokiko, me tetahi oko waina.
- 4
- I whakaritea ano hoki e ia etahi o nga Riwaiti hei minita ki mua i te aaka o Ihowa, hei whakamahara, hei whakawhetai, hei whakamoemiti ki a Ihowa Atua o Iharaira.
- 5
- Ko Ahapa hei tuatahi; i muri i a ia ko Hakaraia, ko Teiere, ko Hemiramoto, ko Tehiere, ko Matitia, ko Eriapa, ko Penaia, ko Opere-eroma: ko Teiere hoki ki nga hatere ki nga hāpa, a, ko Ahapa hei whakatangi i nga himipora:
- 6
- Ko Penaia ano hoki raua ko Tahatiere, ko nga tohunga, kia tūturu tonu ta raua mau i nga tētere ki mua i te aaka o te kawenata o te Atua.
- 7
- I reira ano i taua rangi ka homai e Rawiri i te tuatahi tenei waiata, he whakamoemiti mo Ihowa, ki te ringa o Ahapa ratou ko ona teina.
- 8
- Whakawhetai atu ki a Ihowa, karanga atu ki tona ingoa, whakapuakina ana mahi ki waenganui o nga iwi.
- 9
- Waiata atu ki a ia, himene atu ki a ia, korerotia ana mahi whakamiharo katoa.
- 10
- Kia whakamanamana koutou ki tona ingoa tapu: kia hari nga ngakau o te hunga e rapu ana i a Ihowa.
- 11
- Rapua a Ihowa, me tona kaha; rapua tonutia tona mata.
- 12
- Maharatia ana mahi whakamiharo i mahi ai ia, ana merekara, me nga whakariteritenga a tona mangai;
- 13
- E nga uri o Iharaira, o tana pononga, e nga tamariki a Hakopa ana i whiriwhiri ai.
- 14
- Ko ia a Ihowa ko to tatou Atua; kei te whenua katoa ana whakariteritenga.
- 15
- Maharatia tonutia tana kawenata, te kupu i kiia iho e ia ki te mano o nga whakatupuranga.
- 16
- Ki tana i whakarite ai ki a Aperahama, ki tana oati hoki ki a Ihaka;
- 17
- A whakapumautia iho hei tikanga ki a Hakopa, hei kawenata mau tonu hoki ki a Iharaira.
- 18
- I a ia ra i mea, Ka hoatu e ahau ki a koe te whenua o Kanaana, hei wahi pumau mo koutou,
- 19
- I te mea he hunga torutoru koutou, he iti rawa, he manene hoki ki reira.
- 20
- I a ratou e haereere ana i tenei iwi ki tera atu iwi, i tetahi rangatiratanga ki tetahi iwi ke;
- 21
- Kihai ratou i tukua e ia kia tukinotia e te tangata: ae, he whakaaro ki a ratou i riria ai e ia nga kingi.
- 22
- I mea ia, Kei pa koutou ki aku i whakawahi ai, kei kino hoki ki aku poropiti.
- 23
- Waiata, e te whenua katoa, ki a Ihowa, kauwhautia tana whakaoranga i tena rangi, i tena rangi.
- 24
- Whakapuakina tona kororia i waenganui i nga tauiwi, ana mahi whakamiharo i waenganui i nga iwi katoa.
- 25
- E nui ana hoki a Ihowa, kia nui te whakamoemiti ki a ia; kia wehingia nuitia atu ia i nga atua katoa.
- 26
- He whakapakoko hoki nga atua katoa o nga iwi: na Ihowa ia i hanga nga rangi.
- 27
- He honore, he kingitanga kei tona aroaro; kei tona wahi te kaha me te koa.
- 28
- Tukua atu ki a Ihowa, e nga hapu o nga iwi, tukua atu ki a Ihowa te kororia me te kaha.
- 29
- Tukua atu ki a Ihowa te kororia e tika ana mo tona ingoa: maua mai he whakahere, a haere mai ki tona aroaro: koropiko atu ki a Ihowa i roto i te ataahuatanga o te tapu.
- 30
- Kia wehi ra ki tona aroaro, e te whenua katoa: e u ano te ao, tē taea te whakanekeneke.
- 31
- Kia hari nga rangi, kia koa ano hoki te whenua, kia mea ratou i roto i nga iwi, Ko Ihowa te kingi.
- 32
- Kia haruru te moana, me nga mea e hua ana i roto, kia koa te mara, me nga mea katoa i runga.
- 33
- Ko reira hamama ai i te hari nga rakau o te ngahere i te aroaro o Ihowa: e haere mai ana hoki ia ki te whakarite whakawa mo te whenua.
- 34
- Whakawhetai atu ki a Ihowa, e pai ana hoki ia, e pumau tonu ana hoki tana mahi tohu.
- 35
- Mea atu hoki, Whakaorangia matou, e te Atua o to matou whakaoranga, kohikohia mai ano hoki matou, whakaorangia matou i nga tauiwi, kia whakawhetai atu ai matou ki tou ingoa tapu, kia whakamanamana ai ki tou whakamoemititanga.
- 36
- Kia whakapaingia a Ihowa Atua o Iharaira ake nei ake nei, Na, ka mea te iwi katoa, Amine, a whakamoemiti ana ratou ki a Ihowa.
- 37
- Na, ka waiho e ia i reira i mua i te aaka o te kawenata o Ihowa a Ahapa ratou ko ona teina, hei minita tonu ki mua i te aaka i nga meatanga o tenei ra, o tenei ra.
- 38
- Ko Opere-eroma ano hoki me o ratou teina, e ono tekau ma waru; ko Opere-eroma hoki ko te tama a Ierutunu, raua ko Hoha hei kai tiaki tatau;
- 39
- Ko Haroko ano hoki ko te tohunga, ratou ko ona teina ko nga tohunga ki mua i te tapenakara o Ihowa i te wahi tiketike i Kipeono,
- 40
- Hei whakaeke tonu i nga tahunga tinana ma Ihowa ki runga ki te aata tahunga tinana i te ata, i te ahiahi, hei mea i nga mea katoa i tuhituhia ki te ture a Ihowa i whakahaua na e ia ki a Iharaira.
- 41
- Na, hei hoa mo ratou a Hemana raua ko Ierutunu, me era atu i whiriwhiria, i whakahuatia nei nga ingoa, hei whakawhetai atu ki a Ihowa, no te mea e pumau tonu ana tana mahi tohu.
- 42
- Hei hoa hoki mo ratou a Hemana raua ko Ierutunu, i a raua ano etahi tētere, etahi himipora, ma nga kai whakatangi, me nga mea rangi waiata ano hoki a te Atua. Ko nga tamariki ano hoki a Ierutunu hei kai tiaki kuwaha.
- 43
- Na, haere ana te iwi katoa ki tona whare, ki tona whare, a, hoki ana a Rawiri ki te manaaki i tona whare.
Address: 
Phone: 
Email: