- 1
- A, i a Rawiri e noho ana i tona whare, ka mea a Rawiri ki a Natana poropiti, Na, kei te noho nei ahau i roto i te whare hita, ko te aaka ia o te kawenata a Ihowa kei raro i nga kakahu.
- 2
- Ano ra ko Natana ki a Rawiri, Meatia nga mea katoa i roto i tou ngakau; kei a koe hoki te Atua.
- 3
- Na, i taua po ano ka puta mai te kupu a te Atua ki a Natana, ka mea,
- 4
- Haere, mea atu ki taku pononga ki a Rawiri, ko te kupu tenei a Ihowa, E kore e hangā e koe he whare hei nohoanga moku.
- 5
- Kahore nei hoki ahau i noho i roto i te whare no te rangi ano i kawea mai ai e ahau a Iharaira, a taea noatia tenei ra; heoi he noho haere taku i tetahi teneti ki tetahi teneti, i tetahi tapenakara ki tetahi tapenakara.
- 6
- I oku haererenga katoatanga i roto i a Iharaira katoa i puaki ranei tetahi kupu aku ki tetahi o nga kai whakariterite o Iharaira i whakaritea e ahau hei hepara mo toku iwi? i mea ranei ahau, He aha koutou tē hanga ai i te whare hita moku?
- 7
- Na, kia penei to ki atu aianei ki taku pononga ki a Rawiri, Ko te kupu tenei a Ihowa o nga mano, Naku koe i tango mai i roto i te nohoanga hipi, i te whai hipi, hei rangatira mo toku iwi mo Iharaira.
- 8
- A, i a koe ahau i o haerenga katoatanga; hautopea atu ana e ahau ou hoa riri katoa i tou aroaro; a, meinga ana koe e ahau hei ingoa, hei pera ano me te ingoa o nga mea nunui o te whenua.
- 9
- Na, maku ano e whakarite he wahi mo toku iwi mo Iharaira; ka whakatokia ano hoki ratou e ahau kia noho ki to ratou ake, e kore ano ratou e ngaueue a muri ake nei. E kore ano hoki ratou e pehia ki raro i muri nei e nga tamariki a te kino; e kore e pera me to mua,
- 10
- Me to te wa ano hoki i whakaritea ai e ahau nga kai whakarite whakawa mo toku iwi mo Iharaira. Ka pehia ano hoki e ahau ki raro ou hoa riri katoa. Na, ko taku kupu ano tenei ki a koe, Ma Ihowa e hanga he whare mou.
- 11
- A ka tutuki ou ra, a ka haere koe ki ou mātua, na, ka whakaarahia e ahau i muri i a koe tou whanau i roto i o tama, ka whakapumautia ano hoki e ahau tona kingitanga.
- 12
- Mana e hanga he whare moku, a ka whakapumautia e ahau tona torona, a, ake ake ake.
- 13
- Ko ahau hei matua ki a ia, ko ia hei tamaiti ki a au, e kore ano e mutu toku aroha ki a ia, e kore e pera me toku i mutu ki tera i mua na i a koe.
- 14
- Ka tūturu tonu hoki ia ki toku whare, ki toku kingitanga, a ake ake ake: ka mau tonu ano tona torona, a, ake nei ake nei.
- 15
- Rite tonu ki enei kupu katoa, ki tenei putanga katoa ano hoki, nga kupu a Natana ki a Rawiri.
- 16
- Katahi ka haere atu a Kingi Rawiri, a, noho ana i te aroaro o Ihowa, ka mea, Ko wai ahau, e Ihowa, e te Atua, he aha hoki toku whare, i kawea mai ai ahau e koe ki tenei wahi?
- 17
- He mea iti ano hoki tenei ki tau titiro iho, e te Atua; kua korerotia nei hoki e koe te whare o to pononga, a tau tini noa atu. Kua titiro mai ano koe ki a au, ano he tangata nui rawa, e Ihowa, e te Atua.
- 18
- Ko te aha ake hei korerotanga ma Rawiri ki a koe mo te honore i to pononga? e mohio ana hoki koe ki to pononga.
- 19
- He whakaaro ki to pononga, e Ihowa, rite tonu ano hoki ki ta tou ngakau, i mea ai koe i enei mea nui katoa, i whakakitea mai ai enei mea nui katoa.
- 20
- Kahore he rite mou, e Ihowa, kahore atu hoki he atua, ko koe anake; e rite tonu ana ki nga mea katoa i rongo ai o matou taringa.
- 21
- Ko tehea iwi hoki o te whenua hei rite mo tou iwi mo Iharaira, i haere nei te Atua ki te hoko hei iwi mana ake, kia meinga ai he ingoa mou, he nui, e wehingia ana, i te mea ka peia atu nga tauiwi i te aroaro o tou iwi i hokona nei e koe i roto i Ihipa?
- 22
- Kua meinga nei hoki e koe tou iwi a Iharaira hei iwi mou, a, ake ake ake: me koe hoki, e Ihowa hei Atua mo ratou.
- 23
- Na, whakamanā aianei, e Ihowa, te kupu i korerotia e koe mo to pononga, mo tona whare hoki, a ake ake ake, meatia ano hoki tau i korero ai.
- 24
- Kia whakamanā ano, kia whakanuia ai tou ingoa, a, ake ake ake, kia korerotia ai, Ko Ihowa o nga mano te Atua o Iharaira, hei Atua ano ki a Iharaira. A, kia tūturu tonu te whare o to pononga, o Rawiri, ki tou aroaro.
- 25
- Nau nei hoki, e toku Atua, i whakapuaki mai ki to pononga, ka hangā e koe he whare mona: koia te ngakau o to pononga i anga ai ki te inoi ki tou aroaro.
- 26
- Na, ko koe ano, e Ihowa, te Atua, a kua korerotia mai e koe tenei mea pai ki to pononga.
- 27
- Na, kia pai koe ki te manaaki i te whare o to pononga, kia pumau tonu ai ki tou aroaro: ko koe hoki hei manaaki, e Ihowa, a ka manaakitia, ake ake ake.
Address: 
Phone: 
Email: