- 1
- Na, kahore ahau e pai, e aku teina, kia kuare koutou ki nga mea wairua.
- 2
- E mātau ana koutou he tauiwi koutou i mua, he mea kahaki ki nga whakapakoko reo kore, me koutou i kahakina ra.
- 3
- Koia ahau ka whakakite atu nei ki a koutou, e kore tetahi tangata, na te Wairua nei o te Atua ana korero, e ki, he mea kanga a Ihu: e kore ano hoki e taea e tetahi te mea ko Ihu te Ariki, ki te kahore te Wairua Tapu.
- 4
- Na, poka ke nga mea e homai ana, kotahi ano ia Wairua.
- 5
- A poka ke nga minitatanga, kotahi ano ia Ariki.
- 6
- Poka ke ano hoki nga mahi; kotahi ano ia Atua hei mahi i nga mea katoa i roto i te katoa.
- 7
- Otira e homai ana ki tetahi ki tetahi te whakakitenga a te Wairua hei pai.
- 8
- E homai ana hoki ki tetahi e te Wairua te kupu whakaaro; ki tetahi atu te kupu mātau, he mea na taua Wairua ano;
- 9
- A ki tetahi ko te whakapono, na taua Wairua ra ano; ki tetahi atu ko nga mana whakaora, na taua Wairua ano;
- 10
- Ki tetahi atu ko nga mahi merekara; ki tetahi atu ko te mahi poropiti; ki tetahi atu ko te matauranga ki nga wairua; ki tetahi atu ko nga reo ke; ki tetahi atu ko te whakamaoritanga i nga reo:
- 11
- Na, enei mea katoa he mea mahi na taua Wairua kotahi ra ano, ko ia hei tuwha i tana e pai ai ki tetahi ki tetahi.
- 12
- Kotahi hoki te tinana, a he tini ona wahi, a nga wahi katoa o taua tinana kotahi, ahakoa tini, kotahi ano tinana; e penei ana hoki a te Karaiti.
- 13
- Kotahi nei hoki te Wairua i iriiria ai tatou katoa ki roto ki te tinana kotahi, nga Hurai, nga Kariki, nga herehere, nga rangatira; kotahi tonu ano te Wairua i whakainumia mai mo tatou katoa.
- 14
- Ehara hoki i te mea kotahi te wahi o te tinana, engari he tini.
- 15
- Ki te mea te waewae, He teka no te tinana ahau, ina hoki ehara ahau i te ringaringa; ma kona oti ka whakakahoretia ai hei wahi mo te tinana?
- 16
- Ki te mea te taringa, He teka no te tinana ahua ina hoki ehara ahau i te kanohi; ma kona oti ka whakakahoretia ai hei wahi mo te tinana?
- 17
- Me he mea he kanohi te tinana katoa, kei hea te wahi hei whakarongo? Me he mea he whakarongo ta te katoa, kei hea te wahi hei hongi?
- 18
- Ko tenei, kua oti i te Atua te whakanoho tenei wahi tenei wahi ki roto ki te tinana, ana hoki i pai ai.
- 19
- A me he mea kotahi ano wahi ratou katoa, kei hea te tinana?
- 20
- Ko tenei he tini nga wahi, kotahi ano ia tinana.
- 21
- A e kore te kanohi e ahei te mea atu ki te ringaringa, Kahore aku mahi māu: te mahunga ranei ki nga waewae, Kahore aku mahi ma korua.
- 22
- Engari, nga wahi o te tinana e kiia ana he ngoikore, nui rawa te mahi ma era:
- 23
- A, nga wahi o te tinana e kiia ana e tatou e iti ana te honore, nui atu te honore e meatia iho ana e tatou ki era; a nui atu te ataahua ki o tatou wahi ataahua kore.
- 24
- O tatou wahi ataahua hoki kahore he aha e meatia ai; heoi he mea huihui marire na te Atua nga wahi o te tinana, he mea whakarite marie, nui atu hoki te honore i hoatu e ia ki te wahi i hapa:
- 25
- Kei wehewehea te tinana; engari kia kotahi tonu te whakaaro o nga wahi mo tetahi mo tetahi.
- 26
- Ki te mamae tetahi wahi, mamae tahi ana nga wahi katoa; a ka whakahonoretia tetahi wahi, hari tahi ana nga wahi katoa.
- 27
- Na, ko koutou te tinana o te Karaiti, he wahi ano nona tenei tangata tenei tangata.
- 28
- Kua whakanohoia ano hoki e te Atua etahi i roto i te hahi; nga apotoro ki mua; tuarua ko nga poropiti; tuatoru ko nga kai whakaako; muri iho ko nga merekara; me i reira ko nga mana whakaora, ko nga hoa mahi, ko nga kai whakahaere tikanga, ko nga reo ke.
- 29
- He apotoro oti katoa? he poropiti oti katoa? he kai whakaako oti katoa? he kai mahi merekara oti katoa?
- 30
- Kei te katoa oti nga mana whakaora? he reo ke oti o te katoa hei korero? he kai whakamaori oti katoa?
- 31
- Na, whaia e koutou nga homaitanga papai rawa: tenei ano hoki te huarahi tino pai rawa te whakaaturia nei e ahau ki a koutou.
Address: 
Phone: 
Email: