- 1
- E aku tamariki nonohi, ka tuhituhi atu nei ahau i enei mea ki a koutou, kia kaua ai koutou e hara. A ki te hara tetahi, he kai korero mo tatou kei te Matua, ko Ihu Karaiti, ko te tika:
- 2
- Ko ia ano te whakamarietanga mo o tatou hara: ehara i te mea mo o tatou anake, mo o te ao katoa ano hoki.
- 3
- Ma konei hoki tatou ka mātau ai kua mātau tatou ki a ia, ki te puritia e tatou ana ture.
- 4
- Ki te mea tetahi, Kua mātau ahau ki a ia, a kahore e pupuri i ana ture, he tangata teka ia, a kahore te pono i roto a ia.
- 5
- Te tangata e pupuri ana i tana kupu, kua tino rite pu i a ia te aroha o te Atua: ma konei tatou ka mātau ai kei roto tatou i a ia.
- 6
- Te tangata e mea ana e noho ana ia i roto i a ia, ko te tikanga tenei māna ko tona haere kia rite ki to tera haere.
- 7
- E aku teina, ehara taku i te ture hou ka tuhituhia atu nei e ahau ki a koutou, engari ko te ture tawhito, ko tera i a koutou o te timatanga iho ra ano. Te ture tawhito ko te kupu i rongo ai koutou no te timatanga iho ra ano.
- 8
- Tenei ano ia he ture hou e tuhituhia atu nei e ahau ki a koutou; he mea pono i tana, i ta koutou, kua pahemo atu hoki te pouritanga, a ko te māramatanga pono tenei te whiti nei.
- 9
- Te tangata e mea ana kei te māramatanga ia, a e mauahara ana ki tona teina, kei roto ano ia i te pouri, a taea noatia tenei ra.
- 10
- Te tangata e aroha ana ki tona teina, e noho ana ia i roto i te māramatanga, kahore hoki he tūtukitanga waewae i roto i a ia.
- 11
- Te tangata ia e mauahara ana ki tona teina, kei te pouri ia, e haere ana ia i roto i te pouri, kahore hoki ona matauranga e haere ana ranei ia ki hea, no te mea kua matapotia ona kanohi e te pouri.
- 12
- Ka tuhituhi atu nei ahau ki a koutou, e nga tamariki nonohi, no te mea kua murua o koutou hara he whakaaro hoki ki tona ingoa.
- 13
- Ka tuhituhi atu nei ahau ki a koutou, e nga mātua, no te mea kua mātau koutou ki a ia, ara, ki to te timatanga. Ka tuhituhi atu nei ahau ki a koutou, e nga taitamariki, no te mea kua hinga i a koutou te wairua kino. Ka tuhituhi atu nei ahau ki a koutou, e nga tamariki nonohi, no te mea kua mātau koutou ki te Matua.
- 14
- I tuhituhi atu ai ahau ki a koutou, e nga mātua, no te mea kua mātau koutou ki a ia, ara, ki to te timatanga. I tuhituhi atu ai ahau ki a koutou, e nga taitamariki, no te mea e kaha ana koutou, a e mau ana te kupu a te Atua i roto i a koutou, kua hinga ano hoki i a koutou te wairua kino.
- 15
- Kaua e aroha ki te ao, kaua ano hoki ki nga mea o te ao. Ki te aroha tetahi ki te ao, kahore te aroha o te Matua i roto i a ia.
- 16
- Na, nga mea katoa i te ao, te hiahia o te kikokiko, te hiahia o nga kanohi, me te whakapehapeha ki nga rawa, ehara i te Matua, engari no te ao.
- 17
- Ka pahemo atu ano te ao, me tona hiahia: tena ko te tangata e mea ana i to te Atua e pai ai, e noho tonu ana ia a ake ake.
- 18
- E nga tamariki nonohi, ko te taima whakamutunga tenei: a ka rite ki ta koutou i rongo ai e haere mai ana a anatikaraiti; na, kua tokomaha nei nga anatikaraiti; ma konei tatou ka mātau ai ko te taima whakamutunga tenei.
- 19
- I haere atu ratou i roto i a tatou, ehara ia i te mea no tatou ratou; mehemea hoki no tatou ratou, kua noho tonu ki a tatou: otiia he mea tenei kia whakakitea ai ratou katoa ehara i a tatou.
- 20
- Na, he whakawahinga ano to koutou na te Mea Tapu, e mātau ana ano hoki koutou ki nga mea katoa.
- 21
- Ehara i te mea i tuhituhi atu ai ahau ki a koutou no te mea kahore koutou e mātau ki te pono, engari no te mea e mātauria ana e koutou, no te mea hoki kahore tetahi mea teka i puta ake i te pono.
- 22
- Ko wai koia te tangata teka? he teka ianei ko te tangata e mea ana, ehara a Ihu i a te Karaiti? Ko te anatikaraiti tenei, ko te tangata e whakakahore ana ki te Matua ki te Tama.
- 23
- Nga tāngata katoa e whakakahore ana ki te Tama, kahore te Matua i a ratou: te tangata e whakaae ana ki te Tama, kei a ia ano hoki te Matua.
- 24
- Na, kia mau ki roto ki a koutou ta koutou i rongo ai no te timatanga ra ano. Ki te mea ka mau i roto i a koutou ta koutou i rongo ai no te timatanga ra ano, e mau ano koutou i roto i te Tama, i roto ano hoki i te Matua.
- 25
- Ko te mea ano hoki tenei i whakaaria mai nei e ia ki a tatou, ko te oranga tonutanga.
- 26
- I tuhituhia atu e ahau enei mea ki a koutou, mo te hunga e whakapohehe ana i a koutou.
- 27
- Otiia e mau ana ano i roto i a koutou tana whakawahinga kua riro mai na i a koutou: kahore hoki o koutou mea e whakaakona ai koutou e tetahi: na, te whakawahinga e whakaako na i a koutou ki nga mea katoa, pono tonu, kahore hoki he teka, kia rite ra ki tana i whakaako ai i a koutou to koutou mau ki roto ki a ia.
- 28
- Na, inaianei, e nga tamariki nonohi, kia mau ki roto ki a ia; kia whai maiatanga ai tatou ina puta mai ia, kei whakama hoki ki a ia ina haere mai ia.
- 29
- Ki te mātau koutou e tika ana ia, ka mātau koutou he mea whanau nāna nga tāngata katoa e mea ana i te tika.
Address: 
Phone: 
Email: