- 1
- Kia kite koutou i te tikanga o te aroha i homai nei e te Matua ki a tatou, ara, kia karangatia tatou ko nga tamariki a te Atua! Koia te ao tē mātau ai ki a tatou, kahore hoki i mātau ki a ia.
- 2
- E nga hoa aroha, he tamariki tatou na te Atua inaianei; a kahore ano i kitea noatia he aha ranei tatou a mua: otira e mohio ana tatou, ka puta mai ia, ka rite tatou ki a ia; ka kite hoki tatou i a ia, a ia ake ano.
- 3
- Na, ki te mea kei tetahi tenei tumanakotanga atu ki a ia, ka tahia atu e ia ona hē, kia rite ai ki a ia te hē-kore nei.
- 4
- Te tangata e mea ana i te hara, he takahi tāna i te ture: he takahanga hoki te hara i te ture.
- 5
- E mātau ana ano koutou i whakakitea mai ia hei whakakahore i o tatou hara; kahore ano hoki he hara i roto i a ia.
- 6
- Te tangata e mau ana i roto i a ia e kore e hara: nga tāngata katoa e hara ana, kahore i kite i a ia, kahore ano hoki ratou i mātau ki a ia.
- 7
- E nga tamariki nonohi, kei whakapohehetia koutou e tetahi: te tangata e mea ana i te tika, he tika ano ia, pera hoki me tera e tika ana.
- 8
- Te tangata e mea ana i te hara, no te rewera ia; he hara hoki to te rewera no te timatanga ra ano. Mo konei te Tama a te Atua i whakakitea mai ai, kia whakakahoretia ai e ia nga mahi a te rewera.
- 9
- Te tangata kua whanau i te Atua e kore e mea i te hara; no te mea e mau ana tona purapura i roto i a ia: a e kore e ahei i a ia te hara, no te mea kua whanau ia i te Atua.
- 10
- Ma konei ka kitea ai nga tamariki a te Atua, me nga tamariki a te rewera: te tangata e kore e mahi i te tika, ehara ia i te Atua, me ia ano hoki e kore e aroha ki tona teina.
- 11
- Ko te korero hoki tenei i rongo ai koutou i te timatanga, kia aroha tatou tetahi ki tetahi.
- 12
- Kaua ra e pera me Kaina; no te wairua kino nei ia, a kohurutia ana e ia tona teina. A na te aha ia i kohuru ai i a ia? No te mea i kino ana mahi, a ko a tona teina i tika.
- 13
- Kaua e miharo, e aku teina, ki te kino te ao ki a koutou.
- 14
- E mātau ana tatou kua whiti atu tatou i te mate ki te ora, no te mea e aroha ana tatou ki nga teina. Te tangata kahore e aroha ki te teina, e noho ana ia i roto i te mate.
- 15
- Te tangata e mauahara ana ki tona teina, he kai patu tangata ia: a ka mātau koutou, na, te kai patu tangata kahore he oranga tonutanga e mau ana i roto i a ia.
- 16
- Na konei tatou i mātau ai ki tona aroha, i tuku atu hoki ia i a ia kia mate mo tatou: a e tika ana kia tukua tatou e tatou ano ki te mate mo nga teina.
- 17
- Na, te tangata i a ia nei nga oranga o tenei ao, a ka kite e matea ana tetahi mea e tona teina, na, ka tutakina iho e ia tona ngakau aroha ki a ia, e mau pehea ana te aroha o te Atua i roto i a ia?
- 18
- E aku tamariki nonohi, kaua e waiho ma te kupu ma te arero te aroha; engari ma te mahi ma te pono.
- 19
- Ma konei hoki tatou ka mātau ai no te pono tatou, ka whakau ai hoki i o tatou ngakau i tona aroaro.
- 20
- Na, ki te mea ka whakahe mai o tatou ngakau ki a tatou, nui atu te Atua i o tatou ngakau, e mātau ana ano ia ki nga mea katoa.
- 21
- E nga hoa aroha, ki te kore o tatou ngakau e whakahe ake ki a tatou, ka maia tatou ki te Atua.
- 22
- A, te mea e inoia ana e tatou, ka homai e ia ki a tatou, no te mea e pupuri ana tatou i ana ture, a e mea ana i nga mea ahuareka ki tona aroaro.
- 23
- Ko tana ture ano tenei, Kia whakapono tatou ki te ingoa o tona Tama o Ihu Karaiti, kia aroha ano tetahi ki tetahi, kia rite ano ki te ture i homai e ia ki a tatou.
- 24
- Na, te tangata e pupuri ana i ana ture, e mau ana i roto i a ia, kei roto ano hoki tera i a ia. Na konei ano tatou i mātau ai e mau ana ia i roto i a tatou, na te Wairua kua homai nei e ia ki a tatou.
Address: 
Phone: 
Email: