- 1
- Na, ka haere a Rehopoama ki Hekeme: kua tae mai hoki a Iharaira katoa ki Hekeme ki te whakakingi i a ia.
- 2
- A, te rongonga o Ieropoama tama a Nepata; i Ihipa na ano hoki ia, (i rere hoki ia i mua i te aroaro o Kingi Horomona, noho ana a Ieropoama ki Ihipa;)
- 3
- Na, ka tono tangata atu ratou ki te tiki i a ia. A ka haere a Ieropoama ratou ko te whakaminenga katoa o Iharaira, ka korero ki a Rehopoama, ka mea,
- 4
- He pakeke te ioka i meatia e tou pāpā ki a matou: na, mau e whakamāmā te mahi pakeke a tou pāpā, me tana ioka taimaha i meatia e ia ki a matou, a ka mahi matou ki a koe.
- 5
- Na, ko tana meatanga atu ki a ratou, Taihoa, Haere, kia toru nga ra, ka hoki mai ki a au. Na, haere ana te iwi.
- 6
- Katahi ka runanga a Kingi Rehopoama ki nga kaumatua i tu i te aroaro o tona pāpā, o Horomona, i a ia i te ora, ka mea, Tena koa ki ta koutou whakaaro te kupu hei whakahokinga atu maku ki tenei iwi?
- 7
- Na, ka korero mai ratou ki a ia, ka mea, Ki te mea hei pononga koe ma tenei iwi i tenei ra, a ka mahia ta ratou e koe, a ka whakahokia atu tetahi kupu ki a ratou, a ka pai nga korero e korerotia e koe ki a ratou, na, ko ratou hei pononga māu i nga ra katoa.
- 8
- Heoi whakarerea ake e ia te whakaaro a nga kaumatua i whakaaro ai ratou, a runanga ana ki nga taitamariki i kaumatua ngatahi nei me ia, i tu nei ki tona aroaro.
- 9
- I mea ia ki a ratou, Ki ta koutou whakaaro me pehea te kupu e whakahoki atu ai tatou ki tenei hunga i korero mai nei ki a au, i mea mai nei, Whakamāmākia te ioka i meatia mai e tou pāpā ki a matou?
- 10
- Na, ko te meatanga atu ki a ia a nga taitamariki i kaumatuatia ngatahitia nei me ia, ka mea atu, Kia penei to ki atu ki tenei hunga i korero mai ra ki a koe, i mea ra, I whakataimahatia e tou pāpā to matou ioka, na, kia māmā mai tau ki a matou, kia penei to ki atu ki a ratou, Taku maikara iti, ka nui atu i te hope o toku pāpā.
- 11
- Na, i whakawahā e toku pāpā he ioka taimaha ki a koutou; me tapiri ia e ahau tetahi atu mea ki to koutou ioka; he wepu ta toku pāpā hei whiu mo koutou; maku ia koutou e whiu ki nga kopiona.
- 12
- Na, kua tae mai a Ieropoama ratou ko te iwi katoa ki a Rehopoama i te toru o nga ra; ko ta te kingi hoki tena i whakarite ai, i mea ai, Hoki mai ki a au i te toru o nga ra.
- 13
- A, pakeke tonu ta te kingi i whakahoki mai ai; i whakarerea hoki e ia te whakaaro i whakaaro ai nga kaumatua.
- 14
- A, rite tonu ki ta nga taitamariki whakaaro tana i korero ai ki a ratou; i mea ia, I whakataimahatia to koutou ioka e toku pāpā; me tapiri atu ia e ahau tetahi mea ki to koutou ioka: he wepu ta toku pāpā hei whiu mo koutou; maku ia koutou e whiu ki nga kopiona.
- 15
- Heoi kihai i whakarongo te kingi ki ta te iwi; na Ihowa hoki te take kia mana ai tana kupu i korero ai a Ihowa, i whakapuakina mai nei e Ahia Hironi ki a Ieropoama tama a Nepata.
- 16
- A, te kitenga o Iharaira katoa kihai te kingi i whakarongo ki ta ratou, na, ka whakahokia mai e te iwi tenei kupu ki te kingi; i mea ratou, Ko te aha ianei ta tatou wahi i roto i a Rawiri? kahore nei hoki o tatou wahi tupu i roto i te tama a Hehe: ki o koutou teneti e Iharaira! na, kia whai kanohi koe ki tou whare, e Rawiri! Na, haere ana a Iharaira ki tona teneti, ki tona teneti.
- 17
- Ko nga tamariki ia a Iharaira e noho ana ki nga pa o Hura, ko Rehopoama hei kingi mo ratou.
- 18
- Na, ka tono a Kingi Rehopoama i te rangatira takoha i a Arorama; a, akina ana ia e Iharaira katoa ki te kohatu, mate rawa. Na, hohoro tonu te eke o Kingi Rehopoama ki runga ki tona hariata, a, rere ana ki Hiruharama.
- 19
- Na, whakatangata-ke ana a Iharaira ki te whare o Rawiri, a taea noatia tenei ra.
- 20
- A, te rongonga o Iharaira katoa kua hoki mai a Ieropoama, na, ka tono tangata atu ratou ki te tiki i a ia ki te huihui, a, meinga ana ia hei kingi mo Iharaira katoa: heoi ano ko te iwi o Hura anake hei whai i te whare o Rawiri.
- 21
- Na, kua tae a Rehopoama ki Hiruharama, a huihuia ana e ia te whare katoa o Hura, me te iwi o Peniamine, kotahi rau e waru tekau nga mano, he hunga whiriwhiri, he hunga whawhai, ki te whawhai ki te whare o Iharaira, kia hoki ai te kingitanga ki a Rehopoama tama a Horomona.
- 22
- Na, ko te putanga mai o te kupu a te Atua ki a Hemaia, ki te tangata a te Atua; i mea ia,
- 23
- Korero atu ki a Rehopoama tama a Horomona kingi o Hura, ki te whare katoa ano hoki o Hura raua ko Peniamine, ki era atu ano hoki o te iwi, mea atu,
- 24
- Ko te kupu tenei a Ihowa, Kei haere koutou ki runga, kei whawhai koutou ki o koutou tuakana ki nga tamariki a Iharaira. Hoki atu koutou ki tona whare, ki tona whare; naku hoki tenei mea. Na, rongo tonu ratou ki te kupu a Ihowa, a hoki ana, haere ana, pera ana me ta Ihowa i ki ai.
- 25
- Na, ka hanga a Ieropoama i Hekeme ki Maunga Eperaima, a noho ana i reira: i haere atu ano ia i reira, hangā ana e ia a Penuere.
- 26
- I mea hoki a Ieropoama i roto i tona ngakau, Akuanei hoki ai te kingitanga ki te whare o Rawiri:
- 27
- Ki te haere tenei iwi ki te mea whakahere ki te whare o Ihowa ki Hiruharama, na, ka hoki te ngakau o tenei iwi ki to ratou ariki ki a Rehopoama kingi o Hura: na, ka patu ratou i a au, a ka hoki ki a Rehopoama kingi o Hura.
- 28
- Na, ka hanga whakaaro te kingi, a e rua nga kuao kau i hangā e ia ki te koura. Na, ko tana meatanga atu ki a ratou, Kati ta koutou haere ki Hiruharama: nana, ou atua ra, e Iharaira, nāna nei koe i kawe mai i te whenua o Ihipa!
- 29
- Na, whakaturia ana tetahi e ia ki Pete-ere; ko tetahi hoki i waiho ki Rana.
- 30
- Na, ka tupu te hara i taua mea; i haere hoki te iwi ki te aroaro o tetahi ki Rana.
- 31
- I hangā ano hoki e ia he whare wahi tiketike, a meinga ana o te iwi hei tohunga ko nga ware rawa, ehara nei i nga tamariki a Riwai.
- 32
- I whakaritea ano e Ieropoama he hakari i te ware o nga marama i te tekau ma rima o nga ra o te marama, he pera ano me ta Hura hakari; i whakaeke whakahere ano hoki ia ki runga ki te aata. Ko tana hanga ano tenei i Pete-ere he patu whakahere ki nga kuao kau i hangā e ia: i whakanohoia ano e ia ki Pete-ere nga tohunga wahi tiketike i whakatohungatia nei e ia.
- 33
- I whakaeke whakahere ano hoki ia ki runga ki te aata i hangā e ia ki Pete-ere i te tekau ma rima o nga ra o te waru o nga marama, ara, i te marama i kitea iho e tona ngakau ano; a, whakaritea ana e ia he hakari ma nga tamariki a Iharaira. Heoi whakaeke whakahere ana ia ki runga ki te aata, tahu ana ia i te whakakakara.
Address: 
Phone: 
Email: