- 1
- Na, ko te putanga mai o tetahi tangata a te Atua i roto i a Hura ki Pete-ere, he mea ki mai na Ihowa: a, i te tu ano a Ieropoama i te taha o te aata, e tahu whakakakara ana.
- 2
- Na, karangatia ana e ia ta Ihowa kupu ki te aata; i mea ia, E te aata na, e te aata na, ko ta Ihowa kupu tenei, Nana, tera e whanau tetahi tamaiti o te whare o Rawiri, ko Hohia tona ingoa, a ka whakaekea e ia ki runga ki a koe nga tohunga o nga wahi tiketike e tahu whakakakara nei ki runga ki a koe; mana ano hoki e tahu nga wheua tangata ki runga ki a koe.
- 3
- A, i hoatu ano e ia he tohu i taua ra, i mea, Ko te tohu tenei i korerotia e Ihowa, Nana, ka koara te aata, a ka maringi nga pungarehu o runga.
- 4
- A, te rongonga o te kingi i te kupu a te tangata a te Atua i karangatia nei e ia ki te aata i Pete-ere, ka totoro mai te ringa o Ieropoama i runga i te aata, ka mea ia, Hopukia. Na, memenge ake tona ringa i totoro mai nei ki a ia, kihai hoki i taea te whakahoki mai ki a ia.
- 5
- Na, kua koara te aata, maringi ake nga pungarehu i runga i te aata, i rite tonu ki te tohu i homai e te tangata a te Atua, ki ta Ihowa i korero ai.
- 6
- Katahi ka oho mai te kingi, ka mea ki te tangata a te Atua, Tena ra, karanga atu ki te aroaro o Ihowa, o tou Atua, ka inoi moku, kia whakahokia mai toku ringa ki a au. Na, ka karanga atu te tangata a te Atua ki te aroaro o Ihowa, a ka whakahokia mai te ringa o te kingi ki a ia, ka pera ano me to mua.
- 7
- Katahi ka mea te kingi ki te tangata a te Atua, Haere mai taua ki te whare ki tetahi oranga mou, kia hoatu hoki e ahau tetahi mea ki a koe.
- 8
- Na, ko te meatanga mai a te tangata a te Atua ki te kingi, Ahakoa i homai e koe ko te hawhe o tou whare, e kore ahau e haere atu taua, e kore ano hoki e kai taro, e inu wai ki tenei wahi.
- 9
- Ko te ako hoki tenei ki a au, ta Ihowa hoki i korero ai; i mea ia, Kei kai taro koe, kei inu wai; kaua ano e hoki mai na te ara e haere atu ai koe.
- 10
- Na, haere ana ia he ara ke, kihai i hoki na te ara i haere mai nei ia ki Pete-ere.
- 11
- Na, i Pete-ere tetahi poropiti e noho ana, he koroheke; a, te haerenga mai o ana tama, ka korerotia ki a ia nga mea katoa i mea ai te tangata a te Atua i taua rangi ki Pete-ere; i korerotia ano hoki e ratou ki to ratou pāpā nga kupu i korero ai ia ki te kingi.
- 12
- Na, ko te meatanga mai a to ratou pāpā ki a ratou, Tena koa te ara i haere ai ia? I kite hoki ana tama i te ara i haere atu ai te tangata a te Atua i haere mai nei i Hura.
- 13
- Na, ka mea ia ki ana tama, Whakanohoia mai toku kaihe. Na, whakanohoia ana tona kaihe e ratou, a, eke ana ia ki runga.
- 14
- Na, whaia ana e ia te tangata a te Atua, mau rawa atu e noho ana ia i raro i tetahi oki. Na, ko tana meatanga mai ki a ia, Ko koe ianei te tangata a te Atua i haere mai nei i Hura? Ano ra ko tera, Tenei ahau.
- 15
- Na, ko tana meatanga atu ki a ia, Haere mai taua ki te whare ki te kai taro mau.
- 16
- Ano ra ko ia, E kore e ahei kia hoki taua, kia haere taua; e kore ano hoki taua e kai taro, e inu wai ranei ki tenei wahi.
- 17
- Kua korerotia mai hoki ta Ihowa kupu ki a au, Kei kai taro koe, kei inu wai ki reira, kei anga mai kei haere mai na te ara ka haere atu nei koe.
- 18
- Na, ka mea tera ki a ia, He poropiti ano hoki ahau, he pera ano me koe, a kua korerotia mai ki a au te kupu a Ihowa e tetahi anahera: i ki mai ia, Whakahokia ia ki a koe ki tou whare ki te kai taro mana, ki te inu wai. Kahore, he teka nana ki a ia.
- 19
- Na, whakahokia ana ia e ia, a, kai taro ana ia i roto i tona whare, inu wai ana.
- 20
- Heoi, i a raua e noho ana ki te tepu, na, ko te putanga mai o te kupu a Ihowa ki te poropiti nāna nei ia i whakahoki mai:
- 21
- A ka karanga mai ia ki te tangata a te Atua i haere mai nei i a Hura, ka mea, Ko ta Ihowa kupu tenei, Na, kua tutu nei koe ki te mangai o Ihowa, kahore ano hoki i mau i a koe te ako i ako ai a Ihowa tou Atua ki a koe,
- 22
- Heoi hoki mai ana koe, kai taro ana, inu wai ana ki te wahi i korero ai ia ki a koe, Kei kai taro koe, kei inu wai; e kore e tae tou tinana ki te urupa o ou matua.
- 23
- A ka mutu tana kai taro, ka mutu tana inu, na, ka whakanohoia e tenei tona kaihe, ara, to te poropiti i whakahokia mai nei e ia.
- 24
- Na, haere ana ia, a ka tutaki tetahi raiona ki a ia i te ara, ka whakamate i a ia: na, he mea akiri noa iho tona tinana ki te ara, me te tu ano te kaihe ki tona taha, me te raiona ano hoki e tu ana i te taha o te tinana.
- 25
- Na, ko te haerenga mai o etahi tangata, ka kite i te tinana he mea akiri atu ki te ara, me te raiona e tu ana i te taha o te tinana, a, haere ana korerotia atu ana ki te pa i noho ai te poropiti koroheke.
- 26
- A, te rongonga o taua poropiti, nāna nei ia i whakahoki mai i te ara, ka mea ia, Ko te tangata tena a te Atua i tutu nei ki te mangai o Ihowa, a hoatu ana ia e Ihowa ki te raiona, a haea iho e ia, whakamatea iho; ko ta Ihowa kupu hoki tena i korero ai ki a ia.
- 27
- Na, ka korero ia ki ana tama, ka mea, Whakanohoia toku kaihe, a whakanohoia ana e ratou.
- 28
- Na, haere ana ia, a rokohanga atu ko te tinana, he mea akiri atu ki te ara, me te kaihe raua ko te raiona e tu ana i te taha o te tinana, kihai te tinana i kainga e te raiona, kihai ano hoki te kaihe i haea.
- 29
- Na, hapainga ake ana te tinana o te tangata a te Atua e te poropiti, a, whakatakotoria ana ki runga ki te kaihe, whakahokia atu ana: heoi haere ana te poropiti koroheke ki te pa ki te tangi, ki te tanu i a ia.
- 30
- Na, whakatakotoria ana e ia tona tinana ki roto ki tona urupa; a, tangihia ana ia e ratou, i mea ratou, Aue, e taku teina.
- 31
- A ka mutu tana tanu i a ia, ka korero ia ki ana tama, ka mea, Ka mate ahau, tanumia ahau ki roto ki te urupa i tanumia ai te tangata a te Atua; hei te taha o ona wheua koutou whakatakoto ai i oku wheua.
- 32
- No te mea tera e tino rite ta Ihowa korero i karangatia e ia mo tenei aata i Pete-ere mo nga whare katoa ano hoki o nga wahi tiketike i nga pa o Hamaria.
- 33
- I muri iho i tenei mea kihai a Ieropoama i tahuri atu i tona ara kino; heoi tahuri ana ia, meinga ana ko nga ware rawa o te iwi hei tohunga mo nga wahi tiketike: ki te mea i hiahia tetahi tangata, kua whakatohungatia e ia, waiho iho hei tohunga mo nga wahi tiketike.
- 34
- Na, hei hara tenei mea mo te whare o Ieropoama, hei mea e hunā ai, e whakamotitia rawatia ai i runga i te mata o te whenua.
Address: 
Phone: 
Email: