- 1
- I taua wa ka turorotia a Apia tama a Ieropoama.
- 2
- Na, ko te meatanga ake a Ieropoama ki tana wahine, Tena, whakatika, whakariroia ketia tou ahua, kei mohiotia ko te wahine koe a Ieropoama; ka haere ki Hiro, kei reira a Ahia poropiti nana nei te ki ko ahau hei kingi mo tenei iwi.
- 3
- Na, kia tekau nga taro e maua e tou ringa, me etahi keke, me tetahi pounamu honi, a ka tae atu koe ki a ia mana e korero ki a koe ka aha ranei, ka aha ranei, te tamaiti nei.
- 4
- Na, pera tonu te wahine a Ieropoama, whakatika ana, haere ana ki Hiro, tae tonu atu ki te whare o Ahia. Na, kihai i ahei i a Ahia te titiro atu, kua maro hoki ona kanohi, kua koroheketia hoki.
- 5
- Na, ko te meatanga mai a Ihowa ki a Ahia, Nana, ko te wahine tenei a Ieropoama te haere mai nei ki te rapu kupu i a koe mo tana tama; e mate ana hoki: kia penei to ki atu ki a ia; he ahua ke hoki tona ina tae mai.
- 6
- A, te rongonga o Ahia i te haruru o ona waewae i a ia e tomo mai ana i te kuwaha, ka mea atu ia, Haere mai, e te wahine a Ieropoama: he aha koe i whakaahua ke ai i a koe? he pakeke hoki nga mea i tonoa mai ai ahau ki a koe.
- 7
- Haere, korero ki a Ieropoama, Ko te kupu tenei a Ihowa Atua o Iharaira, Na, kua whakanuia nei koe e au i roto i te iwi, kua meinga ano koe e ahau hei rangatira mo toku iwi mo Iharaira,
- 8
- A, haea mai ana e ahau te kingitanga i te whare o Rawiri, hoatu ana ki a koe: heoi kihai koe i rite ki taku pononga ki a Rawiri i pupuri nei i aku whakahaunga, a, whakapaua ana tona ngakau ki te whai i a au, ko te tika anake ano hoki hei mahi māna ki toku aroaro;
- 9
- Heoi hira ake te kino o au mahi i o te katoa i mua i a koe: i haere hoki koe, a hangā ana e koe etahi atua ke mau, me nga whakapakoko whakarewa, hei whakapataritari i a au, a, whiua ana ahau e koe ki muri i a koe, ki tou tuara.
- 10
- Na, tenei au te tari atu nei i te kino mo te whare o Ieropoama, a ka hautopea atu e ahau o Ieropoama tangata, te pi taiepa, te hunga o Iharaira i tutakina ki roto, i mahue atu ranei; ka tahia atu ano hoki e ahau nga toenga o te whare o Ieropoama, ka peratia me te paru e tahia ana, a poto noa.
- 11
- Te hunga o Ieropoama e mate ki te pa, ma nga kuri e kai; a, nga mea e mate ki te parae, ma nga manu o te rangi e kai; he mea ki mai hoki tenei na Ihowa.
- 12
- Na, whakatika atu, haere ki tou whare, a ka tomo ou waewae ki te pa, ka mate te tamaiti.
- 13
- A ma Iharaira katoa ia e tangi, ma ratou ano hoki ia e tanu; ko ia anake hoki o Ieropoama e tae ki te urupa, no te mea nona te mea pai ki a Ihowa Atua o Iharaira i kitea i roto i te whare o Ieropoama.
- 14
- Ka whakaarahia ano hoki e Ihowa he kingi māna mo Iharaira, hei hautope atu i te whare o Ieropoama, i taua ra: he aha ra? inaianei nei ano.
- 15
- Ka patua hoki a Iharaira e Ihowa, ka peratia me te kakaho e whakangaueuetia ana i roto i te wai, a ka hutia atu a Iharaira i tenei whenua pai i homai nei e ia ki o ratou mātua; ka titaria atu ano hoki ki tera taha o te awa; mo ratou i hanga i a ratou ngahere hei whakapataritari i a Ihowa.
- 16
- Ka tukua atu ano hoki a Iharaira e ia mo nga hara o Ieropoama i hara nei, i mea nei i a Iharaira kia hara.
- 17
- Na, whakatika ana te wahine a Ieropoama, haere ana; a, tae tonu atu ki Tirita. I a ia e tomo atu ana i te korupe o te whare, ka mate te tamaiti.
- 18
- Na, tanumia ana ia e ratou, tangihia iho e Iharaira katoa; ko ta Ihowa kupu tera i korero ai, ko tana kupu i whakapuakina e tana pononga e Ahia poropiti.
- 19
- Na, era atu meatanga a Ieropoama, ana whawhaitanga, tona kingitanga, koia tena, he mea tuhituhi ki te pukapuka o nga ra o nga kingi o Iharaira.
- 20
- Na, nga ra i kingi ai a Ieropoama, e rua tekau ma rua nga tau, a moe ana ia ki ona matua, a, ko tana tama ko Natapa te kingi i muri i a ia.
- 21
- Na, ko Rehopoama tama a Horomona te kingi o Hura. E wha tekau ma tahi nga tau o Rehopoama i tona meatanga hei kingi; a, kotahi tekau ma whitu ona tau i kingi ai ki Hiruharama, ki te pa i whiriwhiria e Ihowa i roto i nga iwi katoa o Iharaira hei waihotanga iho mo tona ingoa. A, te ingoa o tona whaea ko Naama, he Amoni.
- 22
- Na ka he te mahi a Hura ki te titiro a Ihowa, a hae iho ia; nui atu hoki i a o ratou matua i mea ai o ratou hara i hara ai ratou.
- 23
- I hangā hoki e ratou etahi wahi tiketike ma ratou, me etahi pou, me etahi ngahere, ki runga ki nga pukepuke katoa, ki raro iho ano hoki i nga rakau kouru nui katoa.
- 24
- I taua whenua ano hoki etahi e whakatangata o Horoma ana, e mahi ana i nga mea whakarihariha katoa a nga tauiwi i peia nei e Ihowa i te aroaro o nga tamariki a Iharaira.
- 25
- Na, i te rima o nga tau o Kingi Rehopoama ka tae mai a Hihaka kingi o Ihipa ki Hiruharama:
- 26
- A, tangohia ana e ia nga taonga o te whare o Ihowa, me nga taonga o te whare o te kingi; tangohia katoatia ake e ia: i tangohia ano hoki e ia nga pukupuku koura katoa i hangā e Horomona.
- 27
- Na, hangā ana e Kingi Rehopoama, etahi pukupuku parahi hei whakakapi mo era, a, tukua ana e ia ki nga ringaringa o nga rangatira o nga kai oma i tiaki nei i te tatau o te whare o te kingi.
- 28
- A i o te kingi haerenga ki te whare o Ihowa, ka maua aua mea e nga kai oma, ka whakahokia mai ano e ratou ki te whare o nga kai oma.
- 29
- Na, era atu meatanga a Rehopoama me ana mahi katoa, kahore ianei i tuhituhia ki te pukapuka o nga meatanga o nga ra o nga kingi o Hura?
- 30
- A he whawhai tonu ta Rehopoama raua ko Ieropoama ki a raua i o raua ra katoa.
- 31
- Na, ka moe a Rehopoama ki ona mātua, a, tanumia iho ki ona mātua ki te pa o Rawiri. Na, te ingoa o tona whaea ko Naama, he Amoni. A, ko Apiama ko tana tama te kingi i muri i a ia.
Address: 
Phone: 
Email: