- 1
- No te tekau ma waru o nga tau o Kingi Ieropoama tama a Nepata i kingi ai a Apiama ki a Hura.
- 2
- E toru nga tau i kingi ai ia ki Hiruharama: a, te ingoa o tona whaea ko Maaka, he tamahine na Apoharama.
- 3
- Na, tana haere, i runga tonu i nga hara katoa i mea ai tona pāpā i mua i a ia: kihai hoki tona ngakau i tapatahi ki a Ihowa, ki tona Atua, kihai i rite ki te ngakau o tona tupuna o Rawiri.
- 4
- Otiia i whakaaroa a Rawiri, a homai ana he rama e Ihowa e tona Atua ki a ia i Hiruharama: whakaarahia ake ana e ia tana tamaiti i muri i a ia, a whakapumautia ana a Hiruharama.
- 5
- Mo Rawiri i mahi tika ki te aroaro o Ihowa, a kihai i peka ke atu i nga mea katoa i whakahaua ai ia i nga ra katoa i ora ai ia, heoi ano ko te meatanga anake ki a Uria Hiti.
- 6
- A, he whawhai ano ta Rehopoama raua ko Ieropoama ki a raua i nga ra katoa i ora ai ia.
- 7
- Na, era atu meatanga a Apiama, me ana mahi katoa, kahore ianei i tuhituhia ki te pukapuka o nga meatanga o nga ra o nga kingi o Hura? A, he whawhai ano ta Apiama raua ko Ieropoama ki a raua.
- 8
- Na, kua moe a Apiama ki ona mātua, a, tanumia ana e ratou ki te pa o Rawiri. A, ko tana tama ko Aha te kingi i muri i a ia.
- 9
- Na, no te rua tekau o nga tau o Ieropoama kingi o Iharaira i kingi ai a Aha ki Hura.
- 10
- A, e wha tekau ma tahi nga tau i kingi ai ia ki Hiruharama, te ingoa hoki o tona whaea, ko Maaka, he tamahine na Apoharama.
- 11
- A, tika tonu te mahi a Aha ki te aroaro o Ihowa, rite tonu ki ta tona tupuna ki ta Rawiri.
- 12
- I ngarea atu hoki e ia te hunga e whakatangata o Horoma ana i te whenua, whakakorea atu ana ano hoki e ia nga whakapakoko katoa i hangā e ona mātua.
- 13
- I whakamutua ano hoki e ia te kingitanga o Maaka o tona whaea, mona i hanga i te whakapakoko i roto i te ngahere; tapatapahia iho hoki e Aha tana whakapakoko, tahuna ake ki te taha o Awa Kitirono.
- 14
- Otiia kihai i whakakorea nga wahi tiketike. He ahakoa ra, i tapatahi ano te ngakau o Aha ki a Ihowa i ona ra katoa.
- 15
- I kawea hoki e ia nga mea i whakatapua e tona pāpā, me ana mea ano i whakatapu ai, ki te whare o Ihowa, te hiriwa, te koura, me nga oko.
- 16
- A, he whawhai ano ta Aha ki a Paaha kingi o Iharaira i o raua ra katoa.
- 17
- Na, ka haere mai a Paaha kingi o Iharaira ki Hura, a, hangā ana a Rama e ia, kia kaua ai tetahi e tukua kia haere atu ranei, kia haere mai ranei ki a Aha kingi o Hura.
- 18
- Na, tangohia katoatia ana e Aha te hiriwa me te koura i mahue o nga taonga o te whare o Ihowa, me nga taonga ano hoki o te whare o te kingi, a, hoatu ana ki nga ringa o ana tangata: na, hoatu ana aua mea e Kingi Aha kia kawea ki a Pene-harara tama a Taparimono, tama a Hetiono kingi o Hiria, i Ramahiku nei tona kainga; i mea ia,
- 19
- He kawenata ta taua, ta toku pāpā ano hoki raua ko to pāpā: tena taku hakari mau te kawea atu na, he hiriwa, he koura. Haere mai, whakatakā to kawenata ki a Paaha kingi o Iharaira kia haere atu ai ia i toku taha.
- 20
- Na, rongo tonu a Pene-harara ki a Kingi Aha, a, ungā ana e ia nga rangatira o ana ope ki nga pa o Iharaira, a, patua iho e ia a Itono, a Rana, a Apere-pete-maaka, me Kinerota katoa, me te whenua katoa o Napatari.
- 21
- A ka rongo a Paaha, na, mutu ake tana hanga i Rama, a noho ana ki Tirita.
- 22
- Katahi ka karanga nui a Kingi Aha puta noa i a Hura, kihai tetahi i tukua noatia atu, a taria atu ana e ratou nga kohatu o Rama, me nga rakau o reira i hangā nei e Paaha, a, hangā ana e Kingi Aha a Kepa o Peniamine, a Mitipa ano hoki, ki aua mea.
- 23
- Na, era atu meatanga katoa a Aha, me ana mahi marohirohi, me nga mea katoa i mea ai ia, me nga pa i hangā e ia, kahore ianei i tuhituhia ki te pukapuka o nga meatanga o nga ra o nga kingi o Hura? Otiia i tona koroheketanga i mate ona waewae.
- 24
- Na, ka moe a Aha ki ona mātua, a, tanumia iho ki ona mātua ki te pa o tona tupuna o Rawiri; a, ko Iehohapata ko tana tama te kingi i muri i a ia.
- 25
- Na, no te rua o nga tau o Aha kingi o Hura i kingi ai a Natapa tama a Ieropoama ki a Iharaira: a, e rua nga tau i kingi ai ia ki a Iharaira.
- 26
- He kino ano hoki tana mahi ki te aroaro o Ihowa; i haere hoki ia i te ara o tona matua, i tona hara ano hoki i meinga ai e ia a Iharaira kia hara.
- 27
- Na, ka whakatupuria he hē mona e Paaha tama a Ahia o te whare o Ihakara; a, patua iho ia e Paaha ki Kipetono o nga Pirihitini; i te whakapae hoki a Natapa ratou ko Iharaira katoa i Kipetono.
- 28
- Na, no te toru o nga tau o Aha kingi o Hura patua ai ia e Paaha, a ko ia hei kingi muri i a ia.
- 29
- A ka kingi nei ia, na, patua iho e ia te whare katoa o Ieropoama: kihai tetahi mea whai manawa o Ieropoama i mahue i a ia, poto rawa te huna; i rite tonu ki ta Ihowa kupu i korero ai, i whakapuakina nei e tana pononga e Ahia Hironi:
- 30
- Mo nga hara i hara ai Ieropoama i mea ai hoki i a Iharaira kia hara, mo tana whakapataritaringa i whakapataritari ai ia i a Ihowa Atua o Iharaira.
- 31
- Na, era atu meatanga a Natapa, me ana mahi katoa, kahore ianei i tuhituhi ki te pukapuka o nga meatanga o nga ra o nga kingi o Iharaira?
- 32
- A, he whawhai ano ta Aha raua ko Paaha kingi o Iharaira i o raua ra katoa.
- 33
- No te toru o nga tau o Aha kingi o Hura i kingi ai a Paaha tama a Ahia ki a Iharaira katoa ki Tirita; e rua tekau ma wha nga tau.
- 34
- A, he kino tana mahi i te aroaro o Ihowa, i haere hoki ia i te ara o Ieropoama, i tona hara ano hoki i meinga ai e ia a Iharaira kia hara.
Address: 
Phone: 
Email: