- 1
- Na, ka puta mai te kupu a Ihowa ki Iehu tama a Hanani mo Paaha; i mea ia,
- 2
- Naku nei koe i whakaara ake i roto i te puehu, a, hoatu ana koe e ahau hei rangatira mo toku iwi, mo Iharaira, na, haere ana koe i te ara o Ieropoama, a, meinga ana e koe toku iwi a Iharaira, kia hara, kia whakapataritari i a au, ki o ratou hara.
- 3
- Nana, ka moti i a au nga uri o Paaha, me nga uri o tona whare, a ka meinga tou whare kia rite ki te whare o Ieropoama tama a Nepata.
- 4
- Te hunga o Paaha e mate ki te pa, ma nga kuri e kai; a, nga mea ona e mate ki te parae, ma nga manu o te rangi e kai.
- 5
- Na, era atu meatanga a Paaha, me ana mahi, me tona toa, kahore ianei i tuhituhia ki te pukapuka o nga meatanga o nga ra o nga kingi o Iharaira?
- 6
- Na, kua moe a Paaha ki ona mātua, a, tanumia iho ki Tirita, a ko Eraha ko tana tama te kingi i muri i a ia.
- 7
- I kawea mai ano hoki e Iehu tama a Hanani poropiti te kupu a Ihowa mo Paaha ratou ko tona whare, mo te kino katoa i meatia e ia ki te aroaro o Ihowa, mo tana whakapataritaringa i a ia ki nga mahi a ona ringa, mona i rite ki te whare o Ieropoama mo tana patunga ano hoki i a ia.
- 8
- I te rua tekau ma ono o nga tau o Aha kingi o Hura ka meinga a Eraha tama a Paaha hei kingi mo Iharaira ki Tirita, e rua nga tau.
- 9
- Na, ka whakatupuria he hē mona e Timiri, e te rangatira o te hawhe o ana hariata, i a ia i Tirita e iinu ana, a, haurangi iho, i roto i te whare o Arata o te kai tohutohu o tona whare i Tirita.
- 10
- Na, haere mai ana a Timiri, patua iho, whakamatea iho i te rua tekau ma whitu o nga tau o Aha kingi o Hura, a, ko ia hei kingi i muri i a ia.
- 11
- A ka kingi nei ia, ka noho ki runga ki tona torona, patua iho e ia te whare katoa o Paaha, kihai tetahi pi taiepa ona i mahue, o ona whanaunga, o ona hoa aroha ranei.
- 12
- Heoi hunā ana e Timiri te whare katoa o Paaha; i rite tonu ki ta Ihowa kupu i korero ai, ki ta Iehu poropiti i whakapuaki ai mo Paaha.
- 13
- Mo nga hara katoa o Paaha mo nga hara o Eraha o tana tama i hara nei raua, a, meinga ana a Iharaira kia hara, he whakapataritari i a Ihowa Atua o Iharaira ki a ratou mea horihori.
- 14
- Na, era atu meatanga a Eraha me ana mahi katoa, kahore ianei i tuhituhia ki te pukapuka o nga meatanga o nga ra o nga kingi o Iharaira?
- 15
- No te rua tekau ma whitu o nga tau o Aha kingi o Hura i kingi ai a Timiri ki Tirita, e whitu nga ra. Na, i te whakapae te iwi i Kipetono o nga Pirihitini.
- 16
- A, te rongonga o taua iwi i whakapae ra i te korero, Kua whakatakoto hē a Timiri, kua patua e ia te kingi, na, meinga ana e Iharaira katoa a Omori rangatira o te ope hei kingi mo Iharaira i taua ra i te puni.
- 17
- Na, haere mai ana a Omori ratou ko Iharaira katoa i Kipetono, a, whakapaea ana a Tirita e ratou.
- 18
- A, te kitenga o Timiri ka horo te pa, na, haere ana ia ki te wahi pai rawa o to te kingi whare, a, tahuna ana e ia ki te ahi te whare kingi ki runga ki a ia, a mate iho.
- 19
- Mo ona hara i hara ai, mo te kino o ana mahi i te aroaro o Ihowa, mo tana haerenga i te ara o Ieropoama, mo tana hara ano hoki i mea ai, ara, mo tana meatanga i a Iharaira kia hara.
- 20
- Na, era atu meatanga a Timiri me tana he i whakatupu ai ia, kahore ianei i tuhituhia ki te pukapuka o nga meatanga o nga ra o nga kingi o Iharaira?
- 21
- Katahi ka wahia te iwi o Iharaira, he hawhe, he hawhe, ko tetahi hawhe o te iwi i whai i a Tipini tama a Kinata, ko ia hei kingi; ko tetahi hawhe i whai i a Omori.
- 22
- Na, kua kaha te hunga i whai i a Omori i te hunga i whai i a Tipini tama a Kinata. Na, ka mate a Tipini, a ko Omori hei kingi.
- 23
- No te toru tekau ma tahi o nga tau o Aha kingi o Hura i kingi ai a Omori ki a Iharaira, kotahi tekau ma rua nga tau: e ono nga tau i kingi ai ia ki Tirita.
- 24
- Na, ka hokona e ia a Maunga Hamaria ki a Hemere; e rua nga taranata hiriwa, a, hangā ana te maunga e ia, huaina iho te ingoa o te pa i hangā nei e ia ko Hamaria ko te ingoa a Hemere, o te tangata nona te maunga.
- 25
- Na kua kino te mahi a Omori ki te aroaro o Ihowa; kino atu i a te katoa i mua i a ia.
- 26
- I haere hoki ia i nga ara katoa o Ieropoama tama a Nepata, i tona hara ano hoki i mea ai ia i a Iharaira kia hara, kia whakapataritari i a Ihowa Atua o Iharaira ki a ratou mea horihori.
- 27
- Na, era atu meatanga a Omori i mea ai ia, me ana mahi toa, kahore ianei i tuhituhia ki te pukapuka o nga meatanga o nga ra o nga kingi o Iharaira?
- 28
- Na, kua moe a Omori ki ona mātua, a tanumia iho ki Hamaria: a ko tana tama ko Ahapa hei kingi i muri i a ia.
- 29
- No te toru tekau ma waru o nga tau o Aha kingi o Hura, i kingi ai a Ahapa tama a Omori ki a Iharaira. A e rua tekau ma rua nga tau i kingi ai a Ahapa tama a Omori ki a Iharaira ki Hamaria.
- 30
- Na, kino atu ki ta Ihowa titiro iho te mahi a Ahapa tama a Omori i a te katoa i mua i a ia.
- 31
- Na, he mea māmā noa iho ano ki a ia te haere i runga i nga hara o Ieropoama tama a Nepata, kei te tango ano ia i a Ietepere tamahine a Etepaara kingi o nga Haironi, hei wahine mana; a, haere ana, mahi ana ki a Paara, koropiko ana ki a ia.
- 32
- I whakaarahia ano hoki e ia tetahi aata mo Paara i roto i te whare o Paara i hangā nei e ia ki Hamaria.
- 33
- Na, ka hangā ano he ngahere e Ahapa, a, nui atu ta Ahapa i mea ai hei whakapataritari mo Ihowa Atua o Iharaira i ta nga kingi katoa o Iharaira i mua i a ia.
- 34
- I ona ra ka hangā a Heriko e Hiere o Pete-ere: ko tana matamua ko Apirama te timatanga o te whakaturanga, a, ko tana tama o muri ko Hekupu te whakanohoanga o nga tatau; i rite tonu ki ta Ihowa kupu i korero ai, ki ta Hohua tama a Nunu i whakapuaki ra.
Address: 
Phone: 
Email: