- 1
- Na, ka mea a Iraia Tihipi, no nga tangata o Kireara, ki a Ahapa, E ora ana a Ihowa Atua o Iharaira, kei tona aroaro nei ahau e tu ana, e kore enei tau e whai tomairangi, e whai ua; engari ma taku kupu anake.
- 2
- Na, ka puta mai te kupu a Ihowa ki a ia, ka mea.
- 3
- Haere atu i konei, anga atu ki te rawhiti, ka piri ki Awa Keriti, ki tera e aro nui mai ana ki Horano.
- 4
- A, kei te awa he wai mou, kua oti ano hoki nga reweni te whakahau e ahau hei whangai i a koe ki reira.
- 5
- Na, haere ana ia, a meatia ana ta Ihowa i korero ai; i haere hoki, a noho ana ki te taha o Awa Keriti e aro nui nei ki Horano.
- 6
- A, na nga reweni i kawe mai he taro, he kikokiko, mana i te ata, he taro ano hoki, he kikokiko, mana i te ahiahi; no te awa hoki tona wai.
- 7
- Nawai a, te mutunga o etahi ra, kua maroke te awa, kahore hoki he ua o te whenua.
- 8
- Na, ka puta mai te kupu a Ihowa ki a ia, ka mea,
- 9
- Whakatika, Haere ki Harepata o Hairona, ki reira noho ai, nana, kua oti tetahi wahine pouaru o reira te whakahau e ahau hei whangai i a koe ki reira.
- 10
- Na, whakatika ana ia, a haere ana ki Harepata. A, te taenga atu ki te kuwaha o te pa, na, ko tetahi wahine i reira he pouaru e kohikohi rakau ana. A ka karanga atu ia ki a ia, ka mea, Tena, tikina atu tetahi wai moku ki te oko hei inu maku.
- 11
- Na, haere ana tera ki te tiki, a ka karanga atu ano ia ki a ia, Tena tetahi wahi taro maua mai i tou ringa maku.
- 12
- Na, ko tana meatanga mai, E ora ana a Ihowa tou Atua kahore aku keke; engari he kutanga paraoa i roto i te oko, me tetahi hinu, he iti nei, i roto i te ipu, e kohikohi ana tenei ahau i nga rakau e rua, kia haere ai ahau ki te taka i taua mea ma maua ko taku tamaiti, mo ta maua kai atu, a mate iho.
- 13
- Na, ko te meatanga atu a Iraia ki a ia, Kaua e wehi, tikina, meatia tau i ki mai na: otiia matua hangā mai tetahi wahi hei keke maku, kia nohinohi, ka mau mai ai ki a au; a, muri iho ka hanga ma korua ko to tamaiti.
- 14
- Ko te kupu hoki tenei a Ihowa Atua o Iharaira, E kore e pau te oko paraoa, e kore ano hoki te ipu hinu e poto, a, taea noatia te ra e homai ai e Ihowa he ua ki runga ki te mata o te whenua.
- 15
- Na, haere ana ia, a meatia ana ta Iraia i ki ai, a, kai ana raua, me tona whare ano hoki, i tena rangi, i tena rangi.
- 16
- Kihai te oko paraoa i hemo, kihai ano hoki te ipu hinu i poto; i pera tonu me te kupu i korerotia e Ihowa, i whakapuakina mai nei e Iraia.
- 17
- A, i muri i enei mea ka mate te tamaiti a taua wahine nona nei te whare; nui atu te kaha o tona mate, kahore noa iho he manawa i mahue i roto i a ia.
- 18
- Na, ko ta tera meatanga mai ki a Iraia, He ahatanga ta taua, e te tangata a te Atua, i haere mai ai koe ki a au kia whakamaharatia mai oku he, ki te whakamate i taku tamaiti?
- 19
- Na, ka mea tera ki a ia, Homai to tamaiti ki a au. Na, tangohia mai ana e ia i roto i tona uma, a, kawea ana ki te ruma i runga, ki te wahi i noho ia, whakatakotoria ana e ia ki runga ki tona moenga.
- 20
- Na, ka karanga ia ki a Ihowa, ka mea, E Ihowa, e toku Atua, kua meatia ano hoki ranei e koe he kino ki tenei pouaru e noho nei ahau ki a ia, i tana tamaiti ka whakamatea nei?
- 21
- Na, takoto tapapa ana ia, e toru nga tapapatanga ki runga ki te tamaiti, a ka karanga ki a Ihowa, ka mea, E Ihowa, e toku Atua, kia hoki mai te wairua o tenei tamaiti ki roto ki a ia.
- 22
- Na, rongo tonu a Ihowa ki te reo o Iraia, a hoki mai ana te wairua o te tamaiti ki roto ki a ia: na, kua ora.
- 23
- Katahi a Iraia ka mau ki te tamaiti, a kawea mai ana i roto i taua ruma ki raro ki te whare, a, hoatu ana ki tona whaea. Na, ka mea a Iraia, Titiro mai, kei te ora to tamaiti.
- 24
- Na, ko te meatanga mai a taua wahine ki a Iraia, Katahi rawa ahau ka mohio he tangata koe na te Atua, a, he pono te kupu a Ihowa i roto i tou mangai.
Address: 
Phone: 
Email: