- 1
- Na, ka huihuia tana ope katoa e Pene-harara kingi o Hiria, e toru tekau ma rua ano hoki nga kingi ona hoa, me nga hoiho me nga hariata: na, haere mai ana ia, a whakapaea ana a Hamaria, tauria ana e ia.
- 2
- Na, ka tonoa mai etahi tangata e ia ki a Ahapa kingi o Iharaira ki te pa, a ka mea ki a ia, Ko te kupu tenei a Pene-harara,
- 3
- To hiriwa me to koura, naku ena: me o wahine me o tamariki, nga mea papai, naku ena.
- 4
- Na, ka whakahokia atu e te kingi o Iharaira, ka mea atu, E rite tonu ana ki tau i mea mai na, e toku ariki, e te kingi: nau ahau me aku mea katoa.
- 5
- Na, ka hoki mai nga tangata, a ka mea, Ko te kupu tenei a Pene-harara, e ki ana, i tono tangata ano ahau ki a koe hei ki atu. Me homai e koe tou hiriwa, tou koura, o wahine, me o tamariki;
- 6
- Na, kia penei apopo ka tonoa e ahau aku tangata ki a koe, ki te rapu i roto i tou whare, i nga whare ano hoki o o tangata; na, nga mea katoa e minaminatia ana e ou kanohi, ka tangohia mai e o ratou ringa, ka maua mai.
- 7
- Katahi te kingi o Iharaira ka karanga ki nga kaumatua katoa o te whenua, a ka mea, Tena, kia ata whakaaro mai koutou kia kite e rapu ana ia i te kino: i tono tangata mai hoki ia ki a au, ki te tiki i aku wahine, i aku tamariki, i toku hiriwa, i toku koura, a kihai i kaponuhia e ahau ki a ia.
- 8
- Na, ko te meatanga mai a nga kaumatua katoa, ratou ko te iwi katoa ki a ia, Kaua e whakarongo atu, kaua hoki e whakaae atu.
- 9
- Katahi ia ka mea ki nga tangata a Pene-harara, Mea atu ki toku ariki, ki te kingi, Ko nga mea katoa i tono tangata mai ai koe ki to pononga i te tuatahi, ka meatia e ahau: ko tenei mea ia e kore e taea e ahau te mea. Na, haere ana nga tangata ki te whakahoki i te kupu.
- 10
- Katahi a Pene-harara ka tono tangata mai ano, ka mea mai, Kia meatia mai tenei e nga atua ki a au, me era atu mea ano hoki, ki te rato i te puehu o Hamaria nga ringa o te hunga katoa e whai ana i a au.
- 11
- Na, ka whakahokia atu e te kingi o Iharaira, ka mea atu, Ma koutou e ki atu ki a ia, Kaua te tangata e whitiki ana i tona pukupuku, e whakamanamana, e pera me te tangata e wewete ana.
- 12
- I tona rongonga i tenei kupu, na, i te inu ia, ratou ko nga kingi i roto i nga teneti: na, ko tana meatanga atu ki ana tangata, Whakatikaia nga ngohi. Na, whakatikaia ana e ratou hei whawhai ki te pa.
- 13
- Na, ko te haerenga mai o tetahi poropiti ki a Ahapa kingi o Iharaira, ka mea, Ko ta Ihowa kupu tenei, Ka kite koe i tenei ope nui katoa? Nana, ka hoatu ratou e ahau aianei ki tou ringa, a ka mohio koe ko Ihowa ahau.
- 14
- Na, ka mea a Ahapa, Ma wai? Ano ra ko tera, Ko ta Ihowa kupu tenei, Ma nga taitamariki o nga rangatira o nga kawanatanga. A ka mea ia, Ma wai e timata te whawhai? A ka mea tera, Mau.
- 15
- Katahi ka taua e ia nga taitamariki o nga rangatira o nga kawanatanga, a, e rua rau e toru tekau ma rua ratou: i taua ano e ia te iwi katoa, nga tamariki katoa a Iharaira i muri i a ratou e whitu nga mano.
- 16
- Na, puta mai ana ratou i te poutumarotanga, a, i te inu tera a Pene-harara i roto i nga teneti, a haurangi iho, ratou ko nga kingi, ara, nga kingi e toru tekau ma rua, ona whakauru.
- 17
- I puta mai ko nga taitamariki o nga rangatira o nga kawanatanga ki mua; na, ka tono tangata atu a Pene-harara; a ka korero mai ratou ki a ia, ka mea, He tangata enei kua puta mai i roto i Hamaria.
- 18
- Ano ra ko tera, Ki te mea he hohou rongo i puta mai ai ratou, hopukia oratia: ki te mea ano he whawhai i puta mai ai, hopukia oratia.
- 19
- Heoi puta mai ana tera nga taitamariki o nga kawanatanga i roto i te pa, me te ope i muri i a ratou.
- 20
- Na, patua ana e ratou tana tangata tana tangata, a rere ana nga Hiriana, whaia ana e Iharaira; ko Pene-harara ia ko te kingi o Hiria, i mawhiti atu i runga i te hoiho, ratou ko nga kai eke hoiho.
- 21
- Katahi ka puta mai te kingi o Iharaira, a patua iho nga hoiho me nga hariata; heoi patua ana nga Hiriani, nui atu te parekura.
- 22
- Na, ka haere mai te poropiti ki te kingi o Iharaira, a ka mea ki a ia, Haere ki te whakakaha mou; kia mohio hoki, kia mahara ki tau e mea ai ka taka hoki te tau, ka whakaekea koe e te kingi o Hiria.
- 23
- Na, ko te meatanga mai a nga tangata o te kingi o Hiria ki a ia, He atua maunga o ratou atua; koia ratou i kaha ai i a tatou; kia whawhai ia tatou ki a ratou i te mānia, ka kaha tatou i a ratou.
- 24
- Na, ko tenei tau e mea ai, whakamutua te mahi a nga kingi, a tenei, a tenei; ka whakarite ai i etahi rangatira hei whakakapi mo ratou.
- 25
- Katahi ka taua e koe tetahi ope, kia rite ki tenei au kua hinga nei, he hoiho he hoiho, he hariata he hariata, a ka whawhai tatou ki a ratou ki te mānia: tera tatou e kaha i a ratou. Na, rongo tonu ia ki to ratou reo, a, peratia ana e ia.
- 26
- Na, te tikanga o te tau, ka taua e Pene-harara nga Hiriani, a, haere ana ki Apeke ki te whawhai ki a Iharaira.
- 27
- Na, ka taua ano nga tamariki a Iharaira, a ka whai kai, ka haere ki te tu i a ratou: a, noho ana nga tamariki a Iharaira i te ritenga atu ki a ratou: koia ano kei nga kahui iti e rua o nga kuao koati; ko nga Hiriani ia, kapi ana te whenua i a ratou.
- 28
- Na, ka haere mai te tangata a te Atua, a ka korero ki te kingi o Iharaira, ka mea. Ko te kupu tenei a Ihowa, Kua mea nei nga Hiriani, He Atua maunga a Ihowa, a ehara i te Atua raorao, na, ka hoatu e ahau tenei ope nui katoa ki tou ringa, a ka mohio koutou ko Ihowa ahau.
- 29
- Na, noho ana ratou tetahi tetahi, anga atu anga mai, e whitu nga ra. A, i te whitu o nga ra ka pipiri ki te whawhai. Na, patua iho nga Hiriani e nga tamariki a Iharaira kotahi rau nga mano i taua rangi kotahi.
- 30
- Na, ka rere nga morehu ki Apeke ki te pa; a, e rua tekau ma whitu mano nga tangata o ana morehu i hingaia e tetahi taiepa kohatu; ko Pene-harara ia i rere, a, haere ana ki roto ki te pa ki tetahi ruma i roto rawa.
- 31
- Na, ko te meatanga a ana tangata ki a ia, Nana, kua rongo matou he kingi tohu tangata nga kingi o te whare o Iharaira: tena, kia makā iho e matou he kakahu taratara ki o matou hope, me etahi taura ki o matou mātenga, a, kia haere atu ki te kingi o Iharaira: tera pea koe e whakaorangia e ia.
- 32
- Na, whitikiria ana e ratou he kakahu taratara ki o ratou hope, i o ratou mātenga ano hoki etahi taura; haere ana ki te kingi o Iharaira, ka mea, E mea ana to pononga a Pene-harara, Tena ra, kia ora ahau. A ka mea tera, Kei te ora ano ranei ia? ko toku tuakana ia.
- 33
- Na, i ata whakarongo atu aua tangata ki tana, a, hohoro tonu ta ratou hopu atu, te mea atu, Tou tuakana ra a Pene-harara. Ano ra ko ia, Haere atu ki te tiki i a ia. Na, ka puta mai a Pene-harara ki a ia, a ka mea tera kia eke ia ki runga ki te hariata.
- 34
- Na, ko te meatanga atu a Pene-harara ki a ia, Ko nga pa i tangohia e toku pāpā i tou pāpā me whakahoki atu e ahau; a, mau e hanga etahi huanui mau ki Ramahiku kia rite ki a toku pāpā i hanga ai ki Hamaria. Ano ra ko Ahapa, Me tuku atu koe e ahau i runga i tenei kawenata. Na, whakaritea ana he kawenata e raua, a tukua atu ana ia.
- 35
- Katahi ka mea tetahi tangata o nga tamariki a nga poropiti ki tona hoa, (he mea ki mai na Ihowa,) Tena, patua ahau. Heoi kihai taua tangata i pai ki te patu i a ia.
- 36
- Na, ko te meatanga mai a tera ki a ia, Kihai nei koe i whakarongo ki te reo o Ihowa, mo reira ka mawehe atu nei koe i a au, ka patua koe e te raiona. A, te haerenga atu i tona taha, ka tutaki tetahi raiona ki a ia, patua iho.
- 37
- Na, ka tutaki ia ki tetahi atu tangata, a ka mea, Tena, patua ahau. Na, ka patu taua tangata i a ia, he patu i motu ai.
- 38
- Na, haere ana taua poropiti, a, tu ana i te ara, he whanga i te kingi; i whakaahua ke hoki i a ia, he pungarehu kei tona mata.
- 39
- A, i te kingi e haere ana, ka karanga ia ki te kingi, ka mea, I haere tou pononga ki waenganui o te whawhaitanga: na, ko te pekanga mai o tetahi tangata, kawea mai ana e ia tetahi tangata ki a au, ka mea, Tiakina tenei tangata: ki te mea ka riro ia, ko koe ka mate hei ritenga mo tona matenga: me utu ranei e koe kia kotahi taranata hiriwa.
- 40
- A, i to pononga e mea noa ana i tenei mea i tera mea, kua riro tera. Na, ko te meatanga mai a te kingi o Iharaira ki a ia, Koia ano tena te tikanga ki a koe; kua tika mai ra i a koe.
- 41
- Na, hohoro tonu te tango a tera i te pungarehu o tona mata, a ka mohio te kingi o Iharaira ki a ia ko tetahi ia o nga poropiti.
- 42
- Na, ko te meatanga tera ki a ia, Ko te kupu tenei a Ihowa, Kua tuku atu nei i roto i tou ringa taku tangata i tukua putia e ahau ki te mate; na, ko tou matenga hei ritenga mo tona matenga, me tou iwi hei utu mo tona iwi.
- 43
- Na, pouri ana, riri ana te kingi o Iharaira, a, haere ana ki tona whare; tae tonu atu ki Hamaria.
Address: 
Phone: 
Email: