- 1
- A i muri iho i enei mea, na, he māra waina ta tetahi Ietereeri, ta Napoto, i Ietereere i te taha o te whare o Ahapa kingi o Hamaria.
- 2
- Na, ka korero mai a Ahapa ki a Napoto, ka mea, Homai to māra waina ki a au, hei kāri otaota maku, e tata ana hoki ki te taha o toku whare, a, me hoatu e ahau tetahi māra waina, he pai ke atu i tena hei utu; ki te pai ranei ki tau titiro iho, me utu e ahau ki te moni.
- 3
- Na, ko te meatanga mai a Napoto ki a Ahapa, E! kaua ahau e tukua e Ihowa! E kore e hoatu e ahau te kāinga tupu o oku mātua ki a koe!
- 4
- Na, haere ana a Ahapa ki tona whare; pouri ana, riri ana mo te kupu i korero ai a Napoto Ietereeri ki a ia; mo tana i mea ra, E kore e hoatu e ahau te kāinga tupu o oku mātua ki a koe. Na, takoto ana ia i runga i tona moenga, me te ahu atu ano tona mata, kihai ano hoki i kai taro.
- 5
- Katahi tana wahine a Ietepere ka haere ki a ia, ka mea ki a ia, He aha tou wairua i pouri ai, tē kai taro ai koe?
- 6
- Na, ko te meatanga mai a tera ki a ia, I korero atu ahau ki a Napoto Ietereeri, i mea ki a ia, Homai to māra waina ki a au, me utu ki te moni: ki te pai ranei koe, me hoatu e ahau tetahi atu māra ki a koe hei utu. Na, ka mea mai ia, E kore e hoatu e ahau taku māra waina ki a koe.
- 7
- Katahi a Ietepere tana wahine ka ki mai ki a ia, Ko koe ranei te kai whakahaere o te kingitanga o Iharaira? Whakatika mai ki te kai taro mau, kia koa ano hoki tou ngakau. Maku e hoatu te māra waina a taua Ietereeri, a Napoto, ki a koe.
- 8
- Na, tuhituhia ana etahi pukapuka e ia, no Ahapa te ingoa, hiri rawa ki tana hiri; a, tukua atu ana aua pukapuka ki nga kaumatua, ki nga rangatira, e noho ana i te pa o Napoto.
- 9
- I tuhituhi ia ki nga pukapuka, i mea, Karangatia he noho puku, ka whakanoho i a Napoto ki runga ake i te iwi.
- 10
- Katahi ka whakanoho i etahi tangata, he tamariki na Periara, kia tokorua, ki tona aroaro, hei whakaatu i tona he, hei ki, Nau i kanga te Atua raua ko te kingi. Katahi ka kawea atu ia e koutou ki waho, ka akina ki te kohatu, kia mate.
- 11
- Na, ka meatia e nga tangata o tona pa, ara, e nga kaumatua ratou ko nga rangatira e noho ana i tona pa, te mea i tono tangata atu ai a Ietepere ki a ratou, te mea i tuhituhia ki roto ki nga pukapuka i tukna atu e ia ki a ratou.
- 12
- I karangatia he noho puku e ratou, a, whakanohoia ana a Napoto ki runga ake i te iwi.
- 13
- Na, tokorua nga tangata, he tamariki na Periara i haere mai, a noho ana i tona aroaro: kei te whakaatu aua tangata a Periara i te he mona, ara, mo Napoto i te aroaro o te iwi; i mea raua, I kangā e Napoto te Atua raua ko te kingi. Na, kawea ana ia e ratou ki waho o te pa, a, akina ana ki te kohatu, a mate noa ia.
- 14
- Katahi ratou ka tono tangata ki a Ietepere, a ka mea, Kua oti a Napoto te aki ki te kohatu, a kua mate.
- 15
- A, te rongonga o Ietepere kua oti a Napoto te aki ki te kohatu, a kua mate, na, ka mea a Ietepere ki a Ahapa, Whakatika, tangohia te māra a taua Ietereeri a Napoto, tana ra kihai na ia i pai kia hoatu ki a koe hei utu moni; kua kore hoki a Napoto te ora, kua mate.
- 16
- A ka rongo a Ahapa kua mate a Napoto, na, whakatika ana a Ahapa, haere ana ki raro ki te māra waina a taua Ietereeri, a Napoto, kia tangohia e ia.
- 17
- Katahi ka puta mai te kupu a Ihowa ki a Iraia Tihipi; i ki ia,
- 18
- Whakatika, haere ki raro ki te whakatau i a Ahapa kingi o Iharaira i Hamaria: tera ia kei te māra waina a Napoto, kua riro mai hoki ki reira kia tangohia e ia.
- 19
- Ka korero atu ki a ia, ka mea atu, Ko te kupu tenei a Ihowa, Kua patu i a koe? kua riro ano hoki i a koe? Ki atu ano ki a ia, mea atu, Ko te kupu tenei a Ihowa, Te wahi i mitikia ai e nga kuri nga toto o Napoto, ka mitikia ano e nga kuri ki reira ou toto, ae ra, ou ano.
- 20
- Na, ka mea a Ahapa ki a Iraia, Kua mau ahau i a koe, e toku hoa riri? Ano ra ko tera, Kua mau ano, no te mea kua hoko koe i a koe ki te mahi i te kino ki te aroaro o Ihowa.
- 21
- Nana, tenei ahau te tari kino atu nei ki runga i a koe, a ka tahia atu ou uri; ka hautopea atu ano hoki nga pi taiepa, o Ahapa, me nga mea i tutakina ki roto, me nga mea i mahue i roto i a Iharaira.
- 22
- Ka meinga ano hoki e ahau tou whare kia rite ki te whare o Ieropoama tama a Nepata, ki te whare ano hoki o Paaha tama a Ahia, mo te whakapataritaringa i whakapataritari ai koe i a au, mo te meatanga i a Iharaira kia hara.
- 23
- I korerotia ano hoki a Ietepere e Ihowa, i mea ia, Ka kainga a Ietepere e nga kuri ki te parepare o Ietereere.
- 24
- Te hunga o Ahapa e mate ki te pa, ma nga kuri ratou e kai; a, nga mea e mate ki te parae, ma nga manu o te rangi ratou e kai.
- 25
- Heoi kahore he rite mo Ahapa, i hoko atu nei i a ia ki te mahi kino ki te aroaro o Ihowa; he mea akiaki na tana wahine na Ietepere.
- 26
- Whakarihariha rawa tana haere ki te whai i nga whakapakoko: rite tonu tana ki nga mea katoa i mea ai nga Amoni i peia nei e Ihowa i te aroaro o nga tamariki a Iharaira.
- 27
- A, te rongonga o Ahapa i enei kupu, na, haea ana e ia ona kakahu, meatia ana he kakahu taratara ki tona kiri, a, noho puku ana, takoto ana ko taua mea taratara nei te kakahu, tē kaha ano te haere.
- 28
- Katahi ka puta mai te kupu a Ihowa ki te Tihipi, ki a Iraia, i mea ia,
- 29
- Kua kite koe i ta Ahapa whakangohengohenga i a ia ki toku aroaro? ka whakangohengohe nei ia i a ia ki toku aroaro, na, e kore e taria mai e ahau tenei kino i ona ra: engari hei nga ra o tana tama ahau tari mai ai i te kino ki tona whare.
Address: 
Phone: 
Email: