- 1
- Na, kua mamae nei o te Karaiti kikokiko mo tatou, e mau koutou ki nga mea whawhai, ara ki taua whakaaro pu na ano: te tangata hoki kua mamae te kikokiko kua mutu te hara;
- 2
- A kore ake ana noho i te kikokiko i nga wa e takoto ake nei ki runga ki nga hiahia o nga tāngata, engari ki ta te Atua i pai ai.
- 3
- Kāti hoki ma tatou ko te wahi o to tatou oranga kua pahemo nei, hei mahinga ma tatou i ta nga tauiwi i pai ai, i a tatou i haere i runga i nga hiahia taikaha, i nga minaminatanga, i nga haurangitanga waina, i nga kakainga, i nga inumanga, i nga karakia whakarihariha ki nga whakapakoko:
- 4
- He hanga hou tenei ki a ratou, ara, koutou kahore e rere tahi e kokiri atu ki te kino, a kino iho a ratou korero:
- 5
- Me korero e ratou a ratou mahi ki te Kai whakawa mo te hunga ora mo te hunga mate, kua rite noa ake hoki tāna.
- 6
- Mo konei ra i kauwhautia ai ano hoki te rongo pai ki te hunga kua mate, hei whakaheanga hoki ratou, ara, te kikokiko ma te tangata, kia ora ia ratou, ara, te wairua i runga i ta te Atua.
- 7
- Heoi, kua tata te whakamutunga o nga mea katoa: na, kia whai whakaaro koutou, kia mataara, kia inoi.
- 8
- Na, i te tuatahi o nga mea katoa arohaina putia koutou e koutou ano: he tini hoki nga hara ka hipokina e te aroha.
- 9
- Whakamanuhiritia tetahi e tetahi kaua e amuamu.
- 10
- Te mea kua riro noa mai i tetahi i tetahi meatia atu ano e koutou ma tetahi ma tetahi, kia rite ki ta nga tuari pai o nga homaitanga maha a te Atua.
- 11
- Ki te korero tetahi, kia rite ki ta nga kupu a te Atua; ki te minita tetahi, hei to te kaha e homai ana e te Atua: kia whai kororia ai te Atua i nga mea katoa i roto i a Ihu Karaiti; kei a ia te kororia me te mana, ake ake ake. Amine.
- 12
- E aku hoa aroha, kaua e kiia he hanga hou te tahunga i roto i a koutou, hei whakamatautau i a koutou, kei mea he mea hou tenei kua pa ki a koutou:
- 13
- Engari ka uru nei koutou ki nga mamae o te Karaiti, kia hari koutou; he mea hoki e hari ai koutou, whakamanamana rawa, i te whakakitenga mai o tona kororia.
- 14
- Ki te tawaia koutou mo te ingoa o te Karaiti, ka hari koutou; no te mea e tau ana te Wairua o te kororia ara to te Atua ki runga ki a koutou: ta ratou mona he korero kino, ta koutou mona he whakakororia.
- 15
- Kaua ia tetahi o koutou e whakamamaetia mo te mahi patu tangata, mo te tahae, mo te mahinga i te kino, mo te pokanoa ki ta tera meatanga.
- 16
- Ki te whakamamaetia ia tetahi mo te ki he Karaitiana ia, kaua ia e whakama; engari hei mea tenei e whakakororia ai ia i te Atua.
- 17
- Ko te wa hoki tenei e timata ai te whakarite whakawa ki te whare o te Atua: a ki te mea kei a tatou te tuatahi, he pehea ra te whakamutunga ki te hunga e kore e tahuri ki te rongo pai o te Atua?
- 18
- A ki te mea ka ora noa te tangata tika, kei hea he putanga mo te tangata karakia kore mo te tangata hara?
- 19
- Na, te hunga kua pai nei te Atua kia whakamamaetia ratou, me tuku e ratou o ratou wairua ki a ia, ara, ki te Kai hanga pono, me te mahi ano ia ratou i te pai.
Address: 
Phone: 
Email: