- 1
- Na, he whakahau tenei naku ki nga kaumatua i roto i a koutou, he hoa kaumatua hoki ahau, he kai whakaatu mo nga mamae o te Karaiti, a kua whiwhi tahi nei ki te kororia e whakakitea mai i muri:
- 2
- Whangainga te kahui a te Atua i roto i a koutou; kaua e ngakau kore tirotiro, engari kia hihiko; kaua e waiho i runga i te taonga hē, engari i te ngakau nui;
- 3
- Kaua ano hoki e whakatupu rangatira ki ta te Atua wahi, engari hei tauira koutou ki te kahui.
- 4
- A ka puta mai te tino Hepara, ka whiwhi koutou ki te karauna kororia e kore e pirau.
- 5
- Me koutou ano hoki, e nga taitamariki, kia ngohengohe ki nga kaumatua, Kia ngohengohe ano hoki koutou katoa tetahi ki tetahi, ko te ngakau papaku ano hei kakahu mo koutou: no te mea hoki e pakeke ana te Atua ki te hunga whakapehapeha, a ka hoatu e ia he aroha noa ki te hunga papaku.
- 6
- Na, whakaititia iho koutou i raro i te ringaringa kaha o te Atua, kia whakateiteitia ake ai koutou e ia i te wa e pai ai:
- 7
- Makā atu o koutou manukanukatanga katoa ki runga ki a ia; e whakaaro ana hoki ia ki a koutou.
- 8
- Kia mataara, kia matapopore; kei te haereere hoki to koutou hoa whawhai te rewera, ano he raiona tangi e ngengere ana, e rapu ana i te tangata hei horomanga māna:
- 9
- Kia u ki runga i te whakapono, ka whawhai atu ki a ia; me te mahara ano ka rite aua mamae nei ano i o koutou teina i te ao.
- 10
- Na, ma te Atua o nga mahi aroha noa katoa, i karangatia ai tatou ki tona kororia mutunga kore i roto i a Karaiti Ihu, ka oti koutou te whakamamae i tenei wa iti nei, māna koutou e mea kia tino rite, māna e whakau, māna e whakakaha, māna e whakapumau.
- 11
- Waiho atu i a ia te kororia me te kaha, ake ake ake. Amine.
- 12
- Kua tuhituhia atu nei e ahau etahi kupu torutoru, hei maunga ma Hirawanu, he teina pono ia no koutou, ki toku whakaaro: he whakahau atu tenei, he whakaatu naku, ko te tino aroha noa tenei o te Atua e tu nei koutou.
- 13
- Tenei te oha atu nei ki a koutou te hahi i Papurona, i whiriwhiria ngatahitia nei koutou; me taku tamaiti ano hoki me Maka.
- 14
- Oha atu koutou tetahi ki tetahi hei te kihi aroha ano. Kia tau te rangimarie ki a koutou katoa i roto nei i a Karaiti Ihu. Amine.
Address: 
Phone: 
Email: