- 1
- I Ramataima-Topimi i Maunga Eperaima tetahi tangata, ko Erekana tona ingoa, he Eparati, he tama na Ierohama, tama a Erihu, ko ia nei he tama na Tohu, a he tama tenei na Tupu:
- 2
- A tokorua ana wahine; ko Hana te ingoa o tetahi, ko Penina te ingoa o tetahi: na, he tamariki ano a Penina, kahore ia he tamariki a Hana.
- 3
- A tatau ā tau tonu te haere atu a tenei tangata i tona pa ki te koropiko, ki te patu whakahere ki a Ihowa o nga mano, ki Hiro. I reira ano hoki nga tama tokorua a Eri, a Hoponi raua ko Pinehaha nga tohunga a Ihowa.
- 4
- A i te ra i patu whakahere ai a Erekana, na, ka homai etahi mea e ia ki a Penina ki tana wahine, ki ana tamariki katoa ano hoki, ratou ko ana tamahine:
- 5
- E rua ia nga wahi i homai e ia ki a Hana; i aroha hoki ia ki a Hana; otiia kua oti tona kopu te tutaki e Ihowa.
- 6
- A nui atu te whakatoi a tona hoa tauwhainga ki a ia, a mamae noa ia, no te mea kua tutakina tona kopu e Ihowa.
- 7
- Pena tonu ta te tane mahi i ia tau, i ia tau, i nga haerenga a tenei ki runga ki te whare o Ihowa; pena tonu ta tera whakatoi i tenei, a tangi noa ia, kihai hoki i kai.
- 8
- Na, ko te meatanga mai a tona tahu a Erekana ki a ia, E Hana, he aha koe i tangi ai? he aha hoki koe tē kai ai? he aha ano hoki i pouri ai tou ngakau? ki tau e kore ianei e nui atu toku pai i to nga tamariki kotahi tekau?
- 9
- A ka mutu te kai, te inu ki Hiro, na, ka whakatika atu a Hana; (i runga ano hoki i te nohoanga a Eri te tohunga e noho ana i tetahi pou o te temepara a Ihowa:)
- 10
- A e pouri ana te ngakau o tera, ka inoi ki a Ihowa; nui atu tona tangi.
- 11
- Na, ka puaki tana kupu taurangi, i mea ia, E Ihowa o nga mano, ki te ata titiro mai koe ki te pouri o to pononga wahine, a ka mahara ki a au, a e kore e wareware ki to pononga, engari ka homai i tetahi tamaiti tane ki to pononga, na, ka hoatu ia e ahau ki a Ihowa i nga ra katoa e ora ai ia; e kore ano hoki he heu e heua ki tona matenga.
- 12
- Na, i te mea e nui rawa ana tana inoi ki te aroaro o Ihowa, ka tirohia mai tona waha e Eri.
- 13
- Na, a Hana, e korero ana ia i roto i tona ngakau, ko ona ngutu kau e oraora ana, kihai tona reo i rangona: na, ka mea a Eri e haurangi ana ia.
- 14
- Katahi a Eri ka mea ki a ia, Ka tae te roa o tou haurangitanga! whakarerea atu ra tou waina.
- 15
- Na, ka whakahokia mai e Hana, a ka mea, Kahore, e toku ariki; he wahine ngakau pouri ahau: kahore ahau i inu i te waina, i te wai whakahaurangi; engari e ringitia ana e ahau toku ngakau ki te aroaro o Ihowa.
- 16
- Kaua to pononga e kiia he tamahine na Periara: na te nui hoki o toku mamae, o toku pouri, enei korero aku.
- 17
- Katahi ka whakahokia atu e Eri, i mea ia, Haere marie: a ma te Atua o Iharaira, e homai tau mea i inoi ai koe ki a ia.
- 18
- Na, ka mea mai tera, Kia manakohia to pononga e koe. Katahi taua wahine ka haere, ka kai, a mutu ake te pouri o tona mate
- 19
- Na, ka maranga wawe ratou i te ata, a ka koropiko ki te aroaro o Ihowa, a hoki ana, haere ana ki to ratou whare i Rama. Na, ka mohio a Erekana ki a Hana, ki tana wahine; a i mahara ano a Ihowa ki a ia.
- 20
- A te takanga o nga ra o te haputanga o Hana, na, ka, whanau he tamaiti, a huaina ana e ia tona ingoa ko Hamuera, No te mea i inoia ia e ahau i a Ihowa.
- 21
- A i haere ano taua tangata a Erekana, me tona whare katoa, ki runga ki te patu i te whakahere o te tau ki a Ihowa, i tana mea ano hoki i ki taurangi ai.
- 22
- Ko Hana ia kihai i haere; i mea hoki ki tona tahu, Kia whakamutua ra ano te kai u a te tamaiti, ko reira ahau kawe atu ai i a ia, kia puta ai ia ki te aroaro o Ihowa, mo tana noho tonu atu ki reira.
- 23
- Na, ko te meatanga mai a Erekana a tona tahu ki a ia, Meatia ta to whakaaro e whakapai ai; e noho, kia whakamutua ra ano tana kai u; otiia kia mau te kupu a Ihowa. Na, noho ana taua wahine, a whakangotea ana tana tamaiti, a mutu noa tana kai u.
- 24
- Na, ka kawea ia e ia i te mutunga o tana kai u, me etahi puru e toru, kotahi hoki te epa paraoa, me te pounamu waina, kawea ana ia e ia ki te whare o Ihowa ki Hiro: he tamariki rawa hoki taua tamaiti.
- 25
- Na, patua ana e ratou tetahi puru, a kawea ana te tamaiti ki a Eri.
- 26
- Na, ko tana meatanga mai, E toku ariki, kia ora tou wairua. E toku ariki, ko au te wahine i tu i tou taha i konei nei, i inoi ra ki a Ihowa.
- 27
- Ko tenei tamaiti taku i inoi atu ai; a homai ana e Ihowa ki a au taku mea i inoi ai ahau ki a ia:
- 28
- Na, kua tukua atu nei ia e ahau ki a Ihowa; he mea tuku ia ki a Ihowa i nga ra katoa e ora ai ia. A koropiko ana te tamaiti ki a Ihowa ki reira.
Address: 
Phone: 
Email: