- 1
- Katahi ka karakia a Hana, a ka mea, E whakamanamana ana toku ngakau ki a Ihowa, kua ara toku haona i a Ihowa, ka rahi toku waha ki oku hoa riri; noku ka koa ki tau whakaoranga.
- 2
- Kahore he mea tapu, ko Ihowa anake: kahore ke atu, ko koe anake: kahore ano hoki he kamaka hei rite mo to tatou Atua.
- 3
- Kati te whakanui i te korero whakahihi; kei puta te whakapehapeha i o koutou mangai: he Atua mohio hoki a Ihowa, a ka paunatia e ia nga mahi.
- 4
- Whati ana nga kopere a te hunga marohirohi; te hunga i tūtuki te waewae, ko te kaha hei whitiki mo ratou.
- 5
- E mahi ana hei utu taro te hunga i makona i mua; a mutu ake ta te hunga i mate-kai: heoi kua tokowhitu a te pakoko i whanau ai; a iwi-kore noa iho te mea kua tokomaha nei ana tamariki.
- 6
- Ko Ihowa te kai whakamate, me te kai whakaora: mana e riro ai ki raro ki te reinga, mana e kake ai ki runga.
- 7
- Ko Ihowa hei whakarawa-kore, ko ia hei whakawhiwhi ki te taonga: mana e whakaiti iho, mana ano hoki e whakaara ake.
- 8
- Whakaarahia ana e ia te iti i roto i te puehu, ara ana i a ia te rawa-kore i roto i te puranga paru, a whakanohoia iho ki roto ki nga rangatira, meinga ana kia whiwhi ki te torona kororia: no Ihowa hoki nga pou turanga o te whenua; whakanohoia iho ano hoki e ia te ao ki runga.
- 9
- Mana nga waewae o tona hunga tapu e tiaki; ka noho wahangu te hunga kino i roto i te pouri; ehara hoki te kaha i te mea e riro ai te papa i te tangata.
- 10
- Ihowa, mongamonga noa ona hoa riri; ka papā mai tana whatitiri i te rangi ki runga ki a ratou: ka whakarite whakawa a Ihowa mo nga pito o te whenua; mana e homai he kaha ki tona kingi, e whakaara te haona o tana i whakawahi ai.
- 11
- Na, ka haere a Erekana ki Rama ki tona whare. A minita ana taua tamaiti ki a Ihowa i te aroaro o te tohunga o Eri.
- 12
- Na, he tamariki na Periara nga tama a Eri; kihai ratou i mohio ki a Ihowa.
- 13
- Na, ko te tikanga tenei a nga tohunga i roto i te iwi; i te patunga a tetahi tangata i te whakahere, na, ka haere mai te tangata a te tohunga, i te mea kei te kohua ano nga kiko, me te marau e toru nei nga koikoi i tona ringa;
- 14
- Na, werohia atu ana e ia ki roto ki te peihana, ki te pāta ranei, ki te hopana ranei, ki te kohua ranei; ko nga mea katoa i riro ake i te marau, i tangohia e te tohunga māna. Pena tonu ta ratou mahi i Hiro ki nga Iharairi katoa i haere mai ki reira.
- 15
- I te mea ano hoki kahore ano i tahuna noatia nga ngako, ka haere mai te tangata a te tohunga, a ka mea ki te tangata nāna te whakahere, Homai tetahi wahi kiko kia tunua ma te tohunga; e kore hoki ia e tango i au kiko, i te mea kohua, engari i te mea mata.
- 16
- A i te kianga mai a tetahi tangata ki a ia, Kia ata tahuna te ngako aianei, ka tango ai koe i ta to ngakau i pai ai; na, ka mea tera, Kahore; engari me homai e koe aianei: a ki te kahore, ka tangohia maoritia e ahau.
- 17
- Heoi, nui atu te hara o aua taitamariki i te aroaro o Ihowa: no te mea, i whakarihariha nga tangata ki te whakahere a Ihowa.
- 18
- Ko Hamuera ia, i minita ki te aroaro o Ihowa, he tamariki nei ia, whitiki rawa tona epora rinena.
- 19
- I hangā ano hoki tetahi koroka iti e tona whaea mona, a kawea mai ana ki a ia i tenei tau, i tenei tau, i o raua haerenga mai ko tona tahu ki te patu i te whakahere o te tau.
- 20
- Na, ka whakapai a Eri i a Erekana raua ko tana wahine, ka mea, Ma Ihowa e homai he uri ki a koe i roto i tenei wahine mo tenei ka tukua atu nei ki a Ihowa. Na, hoki ana raua ki to raua wahi.
- 21
- Na, ka titiro mai a Ihowa ki a Hana, a ka hapu ano ia, ka whanau, tokotoru nga tamariki tane, tokorua nga kotiro. A tupu ana te tamaiti, a Hamuera, i te aroaro o Ihowa.
- 22
- Na, kua koroheke rawa a Eri; kua rongo ano hoki ki nga mea katoa i mea ai ana tama ki a Iharaira katoa, ki to raua takotoranga ano hoki ki nga wahine i huihui mai ki te whatitoka o te tapenakara o te whakaminenga.
- 23
- Na, ko tana meatanga atu ki a raua, He aha korua i mahi ai i enei mea? kua rongo hoki ahau ki tenei iwi katoa ki ā korua mahi kino.
- 24
- Kati ra, e aku tamariki; ehara hoki i te pai te korero e rangona nei e ahau: na korua i poke ke ai te iwi o Ihowa.
- 25
- Ki te hara he tangata ki tona hoa, ka whakarite nga kai whakarite i te whakawa mona: tena ko tenei ka hara te tangata ki a Ihowa, ko wai hei kai wawao mona? Heoi kihai raua i pai ki te whakarongo ki te reo o to raua pāpā, no te mea i pai a Ihowa kia whakamatea raua.
- 26
- Heoi e nui haere ana ano taua tamaiti, a Hamuera, e paingia ana e Ihowa, e nga tangata ano hoki.
- 27
- Na, ka haere mai tetahi tangata a te Atua ki a Eri, a ka mea ki a ia, Ko te kupu tenei a Ihowa, Kahore ianei ahau i puta mārama atu ki te whare o tou pāpā, i a ratou i Ihipa i te whare o Parao?
- 28
- I whiriwhiri ano i a ia i roto i nga iwi katoa o Iharaira hei tohunga moku, hei whakaeke whakahere ki runga ki taku aata, hei tahu whakakakara, hei kakahu i te epora ki toku aroaro? hoatu ana ki te whare o tou pāpā nga whakahere ahi katoa a nga tamariki a Iharaira?
- 29
- A na te aha koutou i takahi ai i aku patunga tapu me aku whakahere, i kiia e ahau mo toku nohoanga; i a koe ka whakahonore nei i o tama ki runga ake i a au, a ka tetere nei koutou i nga mea papai o nga whakahere katoa a Iharaira a toku iwi?
- 30
- No reira tenei kupu a Ihowa Atua o Iharaira, I mea ano ahau, ko tou whare me te whare o tou matua ka haere i toku aroaro, a ake ake: na, ko ta Ihowa kupu tenei inaianei, Kahore ra hoki; ka whakahonore hoki ahau i te hunga e whakahonore ana i a au, ka whakaiti ano hoki i te hunga e whakahawea ana ki a au.
- 31
- Nana, meake puta nga ra e tapahia ai e ahau tou ringa, me te ringa o te whare o tou pāpā, a kore iho tetahi koroheke mo tou whare.
- 32
- A ka kite koe i te hoa riri i toku nohanga, i nga atawhaitanga katoa a te Atua i a Iharaira; e kore ano hoki tou whare e whai koroheke, ake ake ake.
- 33
- Na, te tangata āu e kore e hautopea atu e ahau i taku aata, ka ai ia hei whakapaunga mo ou kanohi, hei whakamamae mo tou ngakau: whakakau-matua kau hoki nga whanau hou o tou whare, ka mate.
- 34
- Ko te tohu ano hoki tenei ki a koe, ka puta mai ki o tama tokorua, ki Hoponi raua ko Pinehaha, kotahi ano te ra e mate ai raua tokorua.
- 35
- A ka whakaarahia e ahau he tohunga pono maku, hei mahi i ta toku ngakau i ta toku hinengaro i pai ai, maku ano hoki e hanga he whare pono mona, a ka haereere ia i nga ra katoa i te aroaro o taku e whakawahi ai.
- 36
- A ka haere mai nga oranga katoa o tou whare, ka piko iho ki a ia ki tetahi pīhi hiriwa, ki tetahi wahi taro, ka mea, Tena, kia uru ahau ki tetahi o nga mahi tohunga, kia kai ai ahau i tetahi kongakonga taro.
Address: 
Phone: 
Email: