- 1
- Na, ka haere mai a Nahaha te Amoni, a ka noho ki Iapehe-kireara. Katahi ka mea nga tangata katoa o Iapehe ki a Nahaha, Whakaritea mai he kawenata ki a matou, a ka mahi matou ki koe.
- 2
- Na, ko te meatanga mai a Nahaha Amoni ki a ratou, Ko te mea tenei e whakarite kawenata ai ahau ki a koutou, Kia pokaia e ahau nga kanohi matau o koutou katoa, a ka waiho hei tawainga mo Iharaira katoa.
- 3
- Ano ra ko nga kaumatua o Iapehe ki a ia, Taihoa matou e mea e koe, kia whitu nga ra, kia tono tangata ai matou puta noa i nga rohe katoa a Iharaira; a ki te kahore he kai whakaora mo matou, na, ka puta atu matou ki a koe.
- 4
- Na, ka haere mai nga karere ki Kipea o Haora, a korerotia ana enei korero ki nga taringa o te iwi: na, nui atu te reo o te iwi katoa ki te tangi.
- 5
- Na, e haere mai ana tera a Haora i te māra, e aru mai ana i nga kau; na, ko te meatanga mai a Haora, Na te aha te iwi ra i tangi ai? Na, ka korerotia mai e ratou ki a ia nga korero a nga tangata o Iapehe.
- 6
- Te tino putanga mai o te Wairua o te Atua ki runga ki a Haora i tona rongonga ai i enei korero, na, mura rawa tana riri.
- 7
- Na, ka mau ia ki etahi kau e rua, tapatapahia ana e ia; hoatu ana, kia kawea ki nga rohe katoa o Iharaira, he mea kawe na nga karere, a ka mea, Ki te kahore tetahi e puta mai ki te aru i Haora, ki te aru hoki i a Hamuera, ka peneitia āna kau. Na, ka tau te wehi o Ihowa ki runga ki te iwi, a ka puta mai ratou ano he tangata kotahi.
- 8
- Na, ka taua ratou e ia ki Peheke, a e toru rau mano nga tamariki a Iharaira, e toru tekau hoki mano nga tangata o Hura.
- 9
- Katahi ratou ka mea ki nga karere i haere mai ra, Kia penei ta koutou ki atu ki nga tangata o Iapehe-kireara, Apopo ka puta atu he whakaoranga mo koutou, ina mahana te ra. Na, haere ana aua karere, a korerotia atu ana ki nga tangata o Iapehe; a koa ana ratou.
- 10
- Na, ka mea nga tangata o Iapehe, Apopo ka puta atu matou ki a koutou, a ma koutou e mea ki a matou nga mea e pai ana ki to koutou whakaaro iho.
- 11
- Heoi i te aonga ake ka wehea e Haora te iwi kia toru nga ngohi. Na, haere mai ana ratou ki waenga nui o te puni i to te ata whakaaraara, patua iho nga Amoni, a mahana noa te ra: a, nga toenga, marara noa atu; kihai hoki i waiho kia tokorua o ratou e haere tahi ana.
- 12
- Na, ko te meatanga atu a te iwi ki a Hamuera, Ko wai tenei i mea nei, Hei kingi koia a Haora mo tatou? Homai aua tangata kia whakamatea e matou.
- 13
- Ano ra ko Haora, E kore tetahi tangata e whakamatea aianei; ko te ra hoki tenei i puta ai ta Ihowa whakaoranga mo Iharaira.
- 14
- Katahi ka mea a Hamuera ki te iwi, Haere mai tatou ka haere ki Kirikara, ki reira whakahou ai i te kingitanga.
- 15
- Na, haere ana te iwi katoa ki Kirikara, a whakakingitia ana a Haora ki reira ki te aroaro o Ihowa ki Kirikara. Na, patua ana e ratou ki reira nga patunga whakamarietanga ki te aroaro o Ihowa; a nui whakaharahara te koa o Haora, ratou ko nga tangata katoa o Iharaira i reira.
Address: 
Phone: 
Email: