- 1
- Katahi ka mea a Hamuera ki a Iharaira katoa, Nana, kua whakarongo atu nei au ki to koutou reo, ki nga mea katoa i kiia mai e koutou ki a au, kua whakakingi i tetahi kingi mo koutou.
- 2
- Na, te kingi ra, e haereere na i to koutou aroaro: Ko au hoki, kua koroheketia ahau, kua hina; ko aku tamariki ano hoki ena kei a koutou: no toku tamarikitanga hoki toku haereerenga i to koutou aroaro, a tae noa ki tenei ra.
- 3
- Tenei ahau: whakaaturia mai toku he i te aroaro o Ihowa, i te aroaro ano hoki o tana tangata i whakawahi ai: i tango ranei ahau i te kau a tetahi tangata? i tango ranei ahau i te kaihe a tetahi tangata? i riro mai ranei i a au nga taonga o tetahi tangata? i tukinotia ranei e ahau tetahi tangata? i tango ranei ahau i te utu whakapati a tetahi tangata, hei mea kia hunā oku kanohi? a, ka whakahokia atu e ahau ki a koutou.
- 4
- Ano ra ko ratou, Kihai tetahi mea a matou i riro he i a koe, kihai hoki koe i tukino i a matou, kihai ano hoki i tangohia e koe te mea a tetahi tangata, me he aha, me he aha.
- 5
- Na, ka mea ia ki a ratou, Ko Ihowa hei kai whakaatu mo ta koutou; hei kai whakaatu ano hoki inaianei tana tangata i whakawahi ai, kihai i mau i a koutou tetahi mea a toku ringa. A ka mea mai ratou, Hei kai whakaatu ano ia.
- 6
- Na, ko te meatanga a Hamuera ki te iwi, Na Ihowa i whakanui a Mohi raua ko Arona, nāna hoki o koutou mātua i kawe mai i te whenua o Ihipa.
- 7
- Na, tu tonu koutou, a ka whakahaerea e ahau ki a koutou ki te aroaro o Ihowa nga mahi tika katoa a Ihowa i mahia e ia ki a koutou, ki o koutou mātua.
- 8
- I te haerenga atu o Hakopa ki Ihipa, a ka tangi o koutou mātua ki a Ihowa, na, ka tonoa e Ihowa a Mohi raua ko Arona, hei whakaputa mai i o koutou mātua i Ihipa, hei whakanoho hoki i a ratou ki tenei wahi.
- 9
- A ka wareware ratou ki a Ihowa ki to ratou Atua, na, hokona ana ratou e ia ki te ringa o Hihera, rangatira o te ope o Hatoro, ki te ringa hoki o nga Pirihitini, ki te ringa ano hoki o te kingi o Moapa, a whawhai mai ana ratou ki a ratou.
- 10
- A ka tangi atu ratou ki a Ihowa, ka mea, Kua hara matou, i a matou i whakarere nei i a Ihowa, i mahi ki nga Paara, ki a Ahataroto; na, whakaorangia matou i te ringa o o matou hoa riri, a ka mahi matou ki a koe.
- 11
- Katahi ka ungā mai e Ihowa a Ierupaara, a Perana, a Iepeta, a Hamuera, a whakaorangia ana koutou i roto i nga ringa o o koutou hoa riri i tetahi taha, i tetahi taha, a noho wehi-kore noa iho ana koutou.
- 12
- A, to koutou kitenga e haere mai ana a Nahaha kingi o nga tamariki a Amona ki a koutou, na, ka mea mai koutou ki a au, Kahore, engari me whai kingi ano matou; i te mea ko Ihowa ko to koutou Atua to koutou kingi.
- 13
- Na, te kingi na i whiriwhiria ra e koutou, ta koutou i tono ai! Nana, kua hoatu na e Ihowa he kingi mo koutou.
- 14
- Ki te wehi koutou i a Ihowa, a ka mahi ki a ia, ka whakarongo hoki ki tona reo, e kore ano hoki e tutu ki te kupu a Ihowa, katahi koutou ko te kingi e kingi ana i a koutou ka whai tonu i a Ihowa, i to koutou Atua.
- 15
- Tena ko tenei e kore koutou e whakarongo ki te reo o Ihowa, a ka tutu ano koutou ki te kupu a Ihowa, katahi ka anga mai ki a koutou te ringa o Ihowa, ka rite ki tana ki o koutou mātua.
- 16
- Na, tu tonu koutou, kia kite koutou i tenei mea nui e meatia e Ihowa ki to koutou aroaro.
- 17
- Ehara ianei tenei i te kotinga witi inaianei? Ka karanga ahau ki a Ihowa, a ka homai he whatitiri, he ua, kia mohio ai koutou, kia kite ai, he nui to koutou hē i meatia nei e koutou i te aroaro o Ihowa i a koutou i tono kingi nei mo koutou.
- 18
- Katahi ka karanga atu a Hamuera ki a Ihowa, a, homai ana e Ihowa he whatitiri, he ua, i taua rangi ano. Na, nui noa atu te wehi o te iwi katoa ki a Ihowa, ki a Hamuera.
- 19
- Na, ko te meatanga rnai a te iwi katoa ki a Hamuera, Inoi atu mo o pononga ki a Ihowa, ki tou Atua, kei mate matou; kua tapiritia hoki o matou hara katoa ki tenei kino, ki ta matou tononga i te kingi mo matou.
- 20
- Ano ra ko Hamuera ki te iwi, Kaua e wehi: kua oti tenei kino katoa te mea e koutou: kaua ia e peka atu i te whai i a Ihowa; engari me whakapau o koutou ngakau ki te mahi ki a Ihowa.
- 21
- Kaua ano hoki e peka atu: ko reira hoki koutou whai ai i nga mea tekateka noa, e kore e mana, e kore ano hoki e whakaora; he mea tekateka noa hoki.
- 22
- E kore hoki a Ihowa e whakarere tona iwi, ka mahara ia ki tona ingoa nui; kua pai nei hoki a Ihowa ki te mea i a koutou hei iwi mona.
- 23
- Ko au hoki, ma te Atua te whakaaro ki a au, kei hara ahau ki a Ihowa, kei mutu taku inoi mo koutou, me whakaako ano hoki koutou e ahau ki te ara e pai ana, e tika ana.
- 24
- Engari kia wehi koutou i a Ihowa; whakapaua hoki o koutou ngakau ki te mahi atu ki a ia i runga i te pono; whakaaroa hoki nga mea nui i mea ai ia ki a koutou.
- 25
- Na, ki te mahi ano koutou i te he, ka ngaro ngatahi koutou ko to koutou kingi.
Address: 
Phone: 
Email: