- 1
- Tau tahi e kingi ana a Haora; i te mea ka rua ona tau e kingi ana ki Iharaira,
- 2
- Katahi ka whiriwhiria e Haora etahi tangata o Iharaira mana, e toru nga mano. Na, e rua o era mano i a Haora i Mikimaha, i Maunga Pete-ere, kotahi hoki te mano i a Honatana i Kipea o Peniamine; ko te nuinga ia o te iwi i tonoa atu e ia ki tona teneti, ki tona teneti.
- 3
- Na, ka patua e Honatana nga hoia pupuri a nga Pirihitini i Kepa, a rongo ana nga Pirihitini. Katahi ka whakatangihia te tētere e Haora puta noa i te whenua katoa, a ka mea, Kia rongo nga Hiperu.
- 4
- A, te rongonga o Iharaira katoa i te korero kua patua e Haora nga hoia pupuri a nga Pirihitini, a kua piro ano a Iharaira ki nga Pirihitini, na, ka huihui te iwi ki te whai i a Haora ki Kirikara.
- 5
- Me nga Pirihitini ano hoki, i huihui ratou ki te whawhai ki a Iharaira, e toru tekau mano nga hariata, e ono mano nga hoia eke hoiho, me nga tangata ano hoki e rite ana ki te onepu i te taha o te moana te tini. Na, ka haere mai ratou, a ka noho ki Mikimaha ki te taha ki te rawhiti o Pete-awene.
- 6
- A, te kitenga o nga tangata o Iharaira i te he mo ratou, (i taea hoki te rare o te iwi,) na, piri ana te iwi i roto i nga ana, i nga wahi ururua, i runga i nga kamaka, i nga taumaihi, i roto i nga rua.
- 7
- Na, etahi o nga Hiperu i whiti atu i Horano ki te whenua o Kara o Kireara. Ko Haora, i Kirikara na ano ia; a, aru wehi ana te iwi katoa i a ia.
- 8
- A e whitu nga ra i tatari ai ia; ko te wa hoki ia i whakaritea e Hamuera; heoi kahore a Hamuera i tae mai ki Kirikara; a marara noa atu tona nuinga.
- 9
- Na, ko te meatanga ake a Haora, Kawea mai te tahunga tinana ki a au, me nga whakamarietanga. Na, whakaekea ana e ia te tahunga tinana.
- 10
- A ka oti tana tahunga tinana te whakaeke, na ko te putanga mai o Hamuera; a haere ana a Haora ki te whakatau i a ia, ki te oha atu ki a ia.
- 11
- Na, ko te meatanga mai a Hamuera, He mahi aha tau? Ano ra ko Haora, I kite hoki ahau kua marara noa atu toku nuinga, a kahore ano koe kia tae mai i nga ra i whakaritea, heoi e huihui ana ano nga Pirihitini ki Mikimaha:
- 12
- Na, ka mea ahau, Akuanei nga Pirihitini haere mai ai ki a au ki Kirikara, a kahore ano ahau kia inoi ki Ihowa: Na, pehia ana e ahau toku ngakau, a whakaekea ana e ahau te tahunga tinana.
- 13
- Na, ko te kianga mai a Hamuera ki a Haora, He mahi kuare tau; kihai nei i pupuri i te whakahaunga a Ihowa a tou Atua i whakahau ai ia ki a koe: penei kua whakapumautia e Ihowa aianei tou kingitanga ki a Iharaira, a ake ake ake.
- 14
- Ko tenei, e kore e tu tou kingitanga: kua rapua e Ihowa tetahi tangata māna, ta tona ngakau i pai ai, kua oti ano hoki ia te whakahau iho e Ihowa hei rangatira mo tona iwi; mou kihai i pupuri i ta Ihowa i whakahau ai ki a koe.
- 15
- Na, whakatika ana a Hamuera, a, haere atu ana i Kirikara ki Kipea o Peniamine. A taua ana e Haora nga tangata i piri ki a ia; tata tonu aua tangata ki te ono o nga rau.
- 16
- Na, i Kepa o Peniamine a Haora raua ko tana tama ko Honatana, me te hunga hoki i piri ki a raua: i Mikimaha ano hoki nga Pirihitini e noho ana.
- 17
- Na, ka puta mai nga kai pahua i roto i te puni o nga Pirihitini, e toru nga ngohi: kotahi te ngohi i anga na te ara ki Opora, ki te whenua o Huara:
- 18
- Kotahi te ngohi i anga na te huarahi ki Pete-horono: kotahi te ngohi i anga na te ara ki te rohe e aro nui atu ana ki Raorao Tepoimi whaka-te-koraha.
- 19
- Na, kahore he parakamete i kitea puta noa i te whenua katoa o Iharaira: i mea hoki nga Pirihitini, Kei hangā he hoari, he tao ranei, e nga Hiperu.
- 20
- Haere ai a Iharaira katoa ki raro ki nga Pirihitini ki te whakakoi i te hea, i te maripi o tana parau, i tana titaha, i tana ko.
- 21
- Otiia he whairu ano ta ratou mo nga hea, mo nga maripi o nga parau, mo nga marau, mo nga titaha, hei oro ano hoki mo nga wero-kau,
- 22
- Na, i te ra o te whawhaitanga kahore i kitea he hoari, he tao i roto i te ringa o tetahi o nga tangata a Haora raua ko Honatana: otiia i kitea ano ki a Haora, raua ko tana tama ko Honatana.
- 23
- Na ka haere atu nga hoia pupuri a nga Pirihitini ki te whakawhitinga atu o Mikimaha.
Address: 
Phone: 
Email: