- 1
- Na, ka mea a Ihowa ki a Hamuera, Kia pehea ake te roa o to tangihanga ki a Haora, kua whakakahoretia nei hoki ia e ahau hei kingi mo Iharaira? whakakiia to haona ki te hinu, a haere, maku koe e tono atu ki a Hehe o Pete-rehema: kua kitea hoki e ahau he kingi maku i roto i ana tama.
- 2
- Na, ka mea a Hamuera, Me pehea ahau e haere ai? ki te rongo hoki a Haora, ka patua ahau e ia. Ano ra atu ko Ihowa, Kawea atu e tou ringa tetahi kuao kau, ki te uwha, ka mea atu, I haere mai ahau ki te patu whakahere ki a Ihowa.
- 3
- Katahi ka karangatia e koe a Hehe ki te patunga tapu, a maku e whakaatu ki a koe tau e mea ai: me whakawahi ano hoki e koe ki a au te tangata e korero atu ai ahau ki a koe.
- 4
- Na, meatia ana e Hamuera ta Ihowa i korero ai, a, haere ana ki Pete-rehema. Na, pawera noa iho nga kaumatua o te pa i tona taenga mai, a ka mea, E haere mai ana ranei koe i runga i te rangimarie?
- 5
- Ano ra ko ia, I runga ano i te rangimarie: I haere mai ahau ki te patu whakahere ki a Ihowa: whakatapua koutou, ka haere tatou ki te patunga tapu. I whakatapua ano hoki e ia a Hehe ratou ko ana tama, a, karangatia ana ratou e ia ki te patunga tapu.
- 6
- A, to ratou taenga mai, na ka titiro atu ia ki a Eriapa, a ka mea, He pono kei te aroaro o Ihowa tana tangata e whakawahi ai.
- 7
- Na ko te meatanga mai a Ihowa ki a Hamuera, Kaua e titiro atu ki tona ahua, ki tona roa ranei, i a ia e tu ra; kua whakaparahako atu hoki ahau ki a ia: e kore hoki e rite ta Ihowa ki ta te tangata titiro atu: he titiro hoki ta te tangata ki te kanohi; ko ta Ihowa ia he titiro ki te ngakau.
- 8
- Katahi ka karangatia e Hehe a Apinarapa, a ka meinga kia haere atu i te aroaro o Hamuera. Na, ka mea mai ia, Ehara ano hoki tenei i ta Ihowa i whiriwhiri ai.
- 9
- Katahi ka meinga e Hehe a Hamaha kia haere atu. A ka mea ia, Ehara ano hoki tenei i ta Ihowa i whiriwhiri ai.
- 10
- Heoi meinga ana e Hehe ana tama tokowhitu kia haere atu i te aroaro o Hamuera. A ka mea a Hamuera ki a Hehe, Kihai enei i whiriwhiria e Ihowa.
- 11
- Na, ka mea a Hamuera ki a Hehe, Tenei ranei o tamariki katoa? A ka mea mai ia, Tera ano tetahi, to muri rawa; kei te tiaki hipi hoki ia. Ano ra ko Hamuera ki a Hehe, Tonoa atu he tangata ki te tiki i a ia: e kore hoki tatou e noho ki te kai, kia tae mai ra ano ia ki konei.
- 12
- Katahi tera ka tono tangata atu, a, tikina ana ia. Na he kiri whewhero ia, he kanohi ataahua ano hoki, he pai ki te titiro atu. Na, ko te meatanga mai a Ihowa, Whakatika, whakawahia ia, koia hoki ia.
- 13
- Na, ka mau a Hamuera ki te haona hinu, a, whakawahia ana ia i roto i ona tuakana: te tino putanga mai o te Wairua o Ihowa ki runga ki a Rawiri i taua rangi ano, i o muri iho ano hoki. Na, whakatika ana a Hamuera, a, haere ana ki Rama.
- 14
- Na, kua mawehe atu i a Haora te Wairua o Ihowa, a, hē iho āna whakaaro i tetahi wairua kino no Ihowa.
- 15
- Katahi ka mea mai nga tangata o Haora ki a ia Nana, he wairua kino no te Atua te whakararu nei i a koe.
- 16
- Na, kia ki mai to matou ariki ki ana pononga i tou aroaro kia rapua he tangata e mohio ana ki te whakatangi hāpa: a ka tau te wairua kino o te Atua ki runga ki a koe, na, me whakatangi e ia ki tona ringa, a ka marie koe.
- 17
- Na, ka mea a Haora ki ana tangata, Tena ra, tirohia atu tetahi tangata whakatangi pai, ka kawe mai ki a au.
- 18
- Na, ka oho mai tetahi o nga tangata, ka mea, Nana, kua kite ahau i tetahi o nga tama a Hehe o Pete-rehema, he mohio ki te whakatangi, he toa, he pakari, he tangata hapai patu, he whakahaere tupato, he tangata ataahua, kei a ia ano hoki a Ihowa.
- 19
- Katahi a Haora ka tono tangata atu ki a Hehe, hei mea atu, Tena a Rawiri to tamaiti i nga hipi ra, tonoa mai ki a au.
- 20
- Na, ka mau a Hehe ki tetahi kaihe, he taro tana pikaunga, me tetahi ipu waina, me tetahi kuao koati, a, ungā ana kia kawea e tana tama e Rawiri ki a Haora.
- 21
- Na, ka tae mai a Rawiri ki a Haora, a, tu ana i tona aroaro: a, nui whakaharahara te aroha o tera ki a ia; meinga ana ia e ia hei kai mau mo ana patu.
- 22
- Katahi a Haora ka tono tangata ki a Hehe hei mea ki a ia, Kia tu a Rawiri ki toku aroaro, ne? e manakohia ana hoki ia e ahau.
- 23
- A i nga wa i puta mai ai taua wairua a te Atua ki a Haora, na ka mau a Rawiri ki te hāpa, a, whakatangihia ana e tona ringa: katahi ka to te manawa o Haora, a ka marie, a, mahue ake ia i te wairua kino.
Address: 
Phone: 
Email: