- 1
- Na, ka rere a Rawiri i Naioto o Rama, a ka tae mai, ka korero ki a Honatana, I aha ahau? he aha toku hē? he aha hoki toku hara i te aroaro o tou pāpā, i whai ai ia kia whakamatea ahau?
- 2
- Na, ko te meatanga mai a tera, Kahore ra hoki, e kore koe e mate: nana, ahakoa nui, ahakoa iti, te mea, e kore e meatia e toku pāpā, ki te kahore e whakakitea mai e ia ki a au, a he aha tenei mea e hunā ai e toku pāpā i a au? He teka tena.
- 3
- Na, ka oati ano hoki a Rawiri, a ka mea, E tino mohio ana tou pāpā kua manakohia ahau e koe; koia ia i mea ai, Kei mohiotia tenei e Honatana, kei pouri: otiia e ora ana a Ihowa, e ora ana hoki tou wairua, kotahi ano te hikoinga atu i te takiwa oku, o te mate.
- 4
- Na, ko te meatanga mai a Honatana ki a Rawiri, Ma tou wairua e ki ake ki tetahi mea, a ka oti i a au tau mea.
- 5
- Katahi a Rawiri ka mea ki a Honatana, Na, apopo kowhiti ai te marama, ko te wa ia e noho ai ahau ki te kingi ki te kai; na, tukua ahau kia haere, kia piri ai ahau ki te parae, a, te ahiahi ra ano o te toru o nga ra.
- 6
- Ki te anga, ki te mea mai tou pāpā ki a au ka ngaro nei, ko reira koe ki atu ai; He nui te inoi a Rawiri ki a au kia tukua ia kia rere ki tona pa ki Pete-rehema: he patunga tapu hoki to reira, he mea no ia tau, no ia tau, na te hapu katoa.
- 7
- Ki te penei mai tana ki, E pai ana; ka mau te rongo ki tou pononga: na, e nui rawa tana riri, katahi koe ka mohio kua takoto noa ake te kino i a ia.
- 8
- Na, he mahi aroha tenei mau ki tou pononga, nau nei hoki i mea to pononga kia uru tahi me koe ki roto ki ta Ihowa kawenata. Otiia ki te mea he kino toku, mau ano ahau e whakamate; kia kawea atu hoki ahau e koe ki tou pāpā hei aha?
- 9
- Na, ko te meatanga mai a Honatana, Ha! kia meatia tena ki a koe! engari me i mohio ahau kua takoto i toku pāpā kia whakapikia he kino ki a koe, e kore ianei e korerotia e ahau ki a koe?
- 10
- Katahi a Rawiri ka mea ki a Honatana, Ma wai e korero ki a au, ki te pakeke te kupu e whakahokia mai e tou pāpā ki a koe?
- 11
- Ano ra ko Honatana ki a Rawiri, Haere mai, taua ka haere atu ki te parae. Na, haere ana raua tokorua ki te parae.
- 12
- Na, ko te meatanga a Honatana ki a Rawiri, E Ihowa, e te Atua o Iharaira, maku e rapu te whakaaro a toku pāpā i te penei apopo, i te toru ranei o nga ra: na, ki te pai te korero mo Rawiri, a e kore ahau e tono tangata i reira ki a koe, hei whakaatu ki ou taringa,
- 13
- Kia meatia mai tenei e Ihowa ki a Honatana, etahi mea ano hoki: tena ko tenei he kino ta toku pāpā e pai ai mou, na, me whakaatu e ahau ki ou taringa, ka tonoa atu ano hoki koe e ahau kia haere i runga i te rangimarie: kia noho ano hoki a Ihowa ki a koe, kia pera ano me ia i noho ki toku pāpā.
- 14
- Kaua ano hoki e waiho i toku oranga anake tau whakaputanga mai i ta Ihowa aroha ki a au, kia kaua e mate.
- 15
- Kaua ra e hautopea atu tau aroha ki toku whare a ake ake: kauaka, ina hautopea atu e Ihowa nga hoa riri o Rawiri, tenei tangata, tenei tangata, i te mata o te whenua.
- 16
- Na, ka whakarite kawenata a Honatana ki te whare o Rawiri, ka mea, Kia rapu utu ano hoki a Ihowa i te ringa o nga hoa riri o Rawiri.
- 17
- A i mea ano hoki a Honatana kia oati a Rawiri; he aroha hoki nona ki a ia: i aroha hoki ia ki a ia, me te mea, ko te aroha ki tona wairua ake.
- 18
- I mea ano hoki a Honatana ki a ia, Apopo te kowhiti ai te marama; a ka kitea tou ngaromanga, ka takoto kau hoki tou nohoanga.
- 19
- Na, ka toru ou ra, kia hohoro te haere mai ki raro, a ka tae ki te wahi i piri ai koe i te ra o tera meatanga, na, ka noho ki te taha o Etere-kohatu.
- 20
- A maku e kopere atu etahi pere kia toru ki tona taha, ano e kopere atu ana ki tetahi koperenga pere.
- 21
- Katahi ahau ka tono atu i te tamaiti, Tikina, rapua nga pere. Ki te mea nui atu ahau ki te tamaiti, Nei na nga pere, kei tenei taha ou, tikina mai; katahi koe ka haere mai; e mau ana hoki te rongo ki a koe, kahore hoki he rawa, e ora ana a Ihowa.
- 22
- A ki te penei taku ki atu ki te tamaiti, Na, nga pere, kei tua atu i a koe: katahi koe ka haere atu: he mea tono hoki koe na Ihowa.
- 23
- Na, tenei mea i korerotia nei e taua, nana, hei waenganui i a taua a Ihowa, a ake ake.
- 24
- Na, piri ana a Rawiri ki te parae: heoi, te kowhititanga o te marama ka noho te kingi ki te kai i tana kai.
- 25
- A i te noho te kingi ki tona nohoanga o mua iho, ki te nohoanga i te pakitara: i whakatika ano hoki a Honatana, a ka noho a Apanere ki te taha o Haora; na, e takoto kau ana to Rawiri wahi.
- 26
- Heoi kihai i puaki tetahi kupu a Haora i taua ra: i mea hoki ia, Kua pa mai tetahi mea ki a ia, kahore ano kia kore noa tona poke; ina kahore ano kia kore noa tona poke.
- 27
- Na, i te aonga ake, ara, i te rua o nga ra o te marama e takoto kau ana ano to Rawiri wahi. Na, ko te meatanga mai a Haora ki tana tama ki a Honatana, Na te aha te tama a Hehe te haere mai ai ki te kai inanahi, inaianei?
- 28
- Katahi ka whakahokia atu e Honatana ki a Haora, He nui te inoi a Rawiri ki a au kia tukua ia ki Pete-rehema:
- 29
- I mea mai hoki ia, Tukua ahau kia haere, ne? he patunga tapu hoki ta to matou hapu i taua pa; na toku tuakana pu ano hoki ahau i poroaki mai: na, ki te mea kua manakohia ahau e koe, tukua ahau kia oma atu kia kite i oku tuakana. Koia ia tē haere mai ai ki te tepara a te kingi.
- 30
- Te tino muranga o te riri a Haora ki a Honatana, ka mea ki a ia, Te tama a te parori ke, a te tutu! Kahore ranei ahau i mohio kua whiriwhiria e koe te tama a Hehe, a whakama iho koe, whakama iho tou whaea, nga wahi ona i takoto tahanga.
- 31
- Ta te mea hoki e kore koe e tu, me tou rangatiratanga, i nga ra katoa e ora ai te tama a Hehe ki runga ki te whenua. Na, tono tangata aianei ki te tiki i a ia ki a au, kua tino takoto hoki te mate mona.
- 32
- Na, ka whakahokia mai e Honatana ki tona pāpā, a ka mea ki a ia, He aha ia ka mate ai? i aha ia?
- 33
- Na, ko te werohanga mai a Haora i te tao ki a ia, hei wero mona. Katahi a Honatana ka mohio kua takoto i tona pāpā te whakamate mo Rawiri.
- 34
- Na, ka whakatika atu a Honatana i te tepara, mura tonu hoki tana riri, kihai ano hoki i kai i te rua o nga ra o te marama: i pouri hoki ki a Rawiri, mona i meinga e tona pāpā kia whakama.
- 35
- Na, i te ata ka haere atu a Honatana ki te parae i te wa i whakaritea ki a Rawiri, raua ko tetahi tamaiti nohinohi.
- 36
- Na, ka mea ia ki tana tamaiti, Rere atu ki te rapu i nga pere e koperea atu e ahau. Te rerenga atu o te tamaiti, na koperea atu ana e ia he pere ki tua noa atu i a ia.
- 37
- A, te taenga atu o te tamaiti ki te wahi i te pere i koperea nei e Honatana, ka karanga atu a Honatana i muri i te tamaiti, ka mea, Kahore iana te pere i tua atu i a koe?
- 38
- Na, ka karanga atu ano a Honatana i muri i taua tamaiti Kia kakama, kia hohoro, kati te tu kau. Na, kohikohia ana nga pere e te tamaiti a Honatana, a haere mai ana ki tona rangatira.
- 39
- Heoi kihai tetahi mea i mohiotia e taua tamaiti; engari a Honatana raua ko Rawiri, i mohio raua ki te tikanga.
- 40
- Katahi ka hoatu e Honatana ana mea ki taua tamaiti āna, a ka mea ki a ia, Haere, kawea atu ki te pa.
- 41
- A, te haerenga o taua tamaiti, na ka whakatika mai a Rawiri i te taha ki te tonga, a ka takoto tapapa iho ki te whenua, e toru hoki ana pikonga iho. Na, ka kihi raua i a raua ka tangi hoki tetahi ki tetahi, a rahi noa ake ta Rawiri.
- 42
- Katahi a Honatana ka mea ki a Rawiri, Haere i runga i te rangimarie. Kua oati nei hoki taua i runga i te ingoa o Ihowa, kua mea taua, Hei te takiwa oku, ou a Ihowa, hei te takiwa ano hoki o oku uri, o ou uri, a ake, ake, ake. Na, whakatika ana ia, a haere ana; ko Honatana hoki i haere ki te pa.
Address: 
Phone: 
Email: