- 1
- Na, ka haere mai a Rawiri ki Nopo ki a Ahimereke ki te tohunga. A wehi noa iho a Ahimereke i te tutakitanga ki a Rawiri, a ka mea ki a ia, He aha koe i haere mai, tou kotahi, kahore na hoki au hoa?
- 2
- Na, ko te meatanga mai a Rawiri ki te tohunga ki a Ahimereke, He mea i whakahaua mai ai ahau e te kingi; i mea mai hoki ia ki a au, Kei mohio tetahi tangata ki tetahi wahi o te mea ka tonoa atu nei koe e ahau, i whakahaua atu nei koe e ahau. Ko aku tangata, i kiia iho e ahau, hei te wahi i ko rara.
- 3
- Na, he aha kei raro i tou ringa? homai etahi taro ki toku ringa, kia rima: au ranei e kite ai.
- 4
- Katahi ka whakahokia mai e te tohunga ki a Rawiri, a ka mea, Kahore he taro noa i toku ringa: engari tenei te taro tapu; ki te mea ra ia kahore i tata nga tangata ki te wahine.
- 5
- Na, ka whakahokia atu e Rawiri ki te tohunga, a ka mea ki a ia, He pono kihai tetahi wahine i tukua kia tata ki a matou i enei rangi ka toru, noku i haere mai nei; e tapu ana ano nga mea o nga tamariki: tata pu ano hoki taua taro ki te noa, kua whakatapua na hoki etahi atu inaianei i runga i te rihi.
- 6
- Katahi ka hoatu te mea tapu e te tohunga ki a ia: kahore hoki o reira taro, heoi ano ko te taro aroaro i tangohia mai nei i te aroaro o Ihowa, kia whakatakotoria ai he taro mahana i te ra i tangohia ia.
- 7
- Na, i reira ano tetahi o nga tangata a Haora i taua ra, e whakawarea ana e tetahi mea ki te aroaro o Ihowa, tona ingoa ko Roeke, he Eromi, te tino o nga kai tiaki hipi a Haora.
- 8
- Na, ko te meatanga mai a Rawiri ki a Ahimereke, Kahore ianei i konei i raro i tou ringa tetahi tao, hoari ranei: kihai hoki i maua mai e ahau taku hoari me aku mea, he mea whakapotatutatu hoki te mahi a te kingi.
- 9
- Ano ra atu ko te tohunga, Ko te hoari a Koriata Pirihitini i patua na e koe ki Raorao Eraha: koia tenei e takai nei i roto i te kakapu i tua atu o te epora. Ki te tangohia tena e koe mau, tangohia; kahore atu hoki, ko tena anake. Na, ka mea mai a Rawiri, Kahore ona rite, homai ki a au.
- 10
- Katahi a Rawiri ka whakatika, a rere ana i taua rangi ano i te aroaro o Haora, a tae tonu atu ki a Akihi kingi o Kata.
- 11
- Na, ko te meatanga mai a nga tangata a Akihi ki a ia, Ehara ano hoki ianei tenei i a Rawiri i te kingi o te whenua? kihai ranei tenei i waiatatia i a ratou i kanikani ra, i a ratou i mea ra, Na Haora ana mano, na Rawiri ana tekau o nga mano i patu?
- 12
- Na, mau tonu iho enei kupu i te ngakau o Rawiri, a nui atu tona wehi i a Akihi kingi o Kata.
- 13
- Na, ka whakaahua ke ia ki to ratou aroaro, a ka whakahaurangi ia i a ia i roto i a ratou; ka haehae hoki i nga tatau o te kuwaha, ka tuku ano hoki i tona huhare kia tarere iho ki tona kumikumi.
- 14
- Na, ko te meatanga a Akihi ki ana tangata, Nana, kua kite koutou i te tangata nei e haurangi ana; he aha i kawea mai ai e koutou ki a au?
- 15
- He onge no aku tangata haurangi i kawea mai ai tenei e koutou hei mahi i nga mahi a te haurangi ki a au? e tae ake koia tenei ki toku whare?
Address: 
Phone: 
Email: