- 1
- Na ka haere atu a Rawiri i reira, a rere ana ki te ana o Aturama. A ka rongo ona tuakana, me te whare katoa o tona pāpā, na, ka haere mai ratou ki reira ki a ia.
- 2
- I huihui mai ano hoki ki a ia nga tangata katoa e pehia ana e te aha, e te aha, me nga tangata i a ratou nei etahi taonga tarewa, me nga tangata katoa e mamae ana te ngakau: a ko ia hei rangatira mo ratou, tata tonu ki te wha o nga rau nga tangata i piri ki a ia.
- 3
- Katahi a Rawiri ka haere atu i reira ki Mitipe o Moapa, a ka mea ki te kingi o Moapa, Tena, kia haere atu toku pāpā me toku whaea ki a koutou, kia mohio ra ano ahau ki ta te Atua e mea ai ki a au.
- 4
- Na, ka kawea mai raua e ia ki te aroaro o te kingi o Moapa, a noho ana raua ki a ia i nga ra katoa i noho ai a Rawiri i te pourewa.
- 5
- Katahi ka mea mai a Kara poropiti ki a Rawiri, Kaua e noho ki te pourewa, whakatika atu, haere ki te whenua o Hura. Na, ka haere a Rawiri, a noho ana i te nehenehe i Harete.
- 6
- A, te rongonga o Haora kua kitea a Rawiri ratou ko ona hoa; (na, i Kipea a Haora e noho ana, i raro i tetahi rakau i Rama, me tana tao i tona ringa, me te tu ano hoki ana tangata katoa i tona taha.)
- 7
- Na, ko te meatanga atu a Haora ki ana tangata e tu ana i tona taha, Whakarongo mai ki a au, e nga Peniamini; e homai ranei e te tama a Hehe nga māra ki a koutou katoa, me nga kāri waina, e meinga ranei koutou katoa e ia hei rangatira mano, hei rangatira rau;
- 8
- I huihuia ai nga whakaaro o koutou katoa ki te he moku; kahore hoki he tangata hei whakaatu ki a au kua whakarite kawenata taku tamaiti raua ko te tama a Hehe, kahore hoki tetahi o koutou hei tangi ki a au, hei whakaatu ki a au na taku tamaiti taku tangata i whakahihiri mai kia au hei whanga mai, hei penei ano me tenei inaianei?
- 9
- Na, ko te ohonga mai o Roeke Eromi, (he kai tohutohu hoki ia no nga tangata o Haora,) i ki mai ia, I kite ahau i te tama a Hehe e haere mai ana ki Nopo, ki a Ahimereke tama a Ahitupu.
- 10
- Na, uia ana e tera he tikanga māna i a Ihowa; i homai ano hoki e ia he o mona; ko te hoari ano hoki a Koriata Pirihitini i homai ano e ia ki a ia.
- 11
- Katahi te kingi ka unga tangata atu hei karanga i te tohunga i a Ahimereke tama a Ahitupu i te tohunga, ratou ko te whare katoa o tona pāpā, i nga tohunga e noho ana i Nopo, a ka haere katoa ratou ki te kingi.
- 12
- Na, ko te meatanga mai a Haora, Whakarongo mai, e te tama a Ahitupu. A ka mea tera, Tenei ahau, e toku ariki.
- 13
- Ano ra ko Haora ki a ia, Na te aha korua ko te tama a Hehe i huihui whakaaro ai ki te he moku, a hoatu ana e koe he taro mana, he hoari, uia ana ano e koe he tikanga māna i te Atua, kia whakatika mai ai ia ki a au whanga ai; koia ano tenei inaianei?
- 14
- Katahi ka whakahokia mai e Ahimereke ki te kingi, a ka mea, Ha, ko wai o o tangata katoa hei rite mo Rawiri, te pono? ko te hunaonga hoki ia a te kingi, e haere ana i to ngare, e whakahonoretia ana hoki i roto i tou whare?
- 15
- Ko te timatanga ianei tena o taku ui-tikanga māna i te Atua? Ha! kia pena ahau! kaua tetahi mea e whakairia mai e te kingi ki tana pononga, ki tetahi ranei o te whare o toku pāpā: kahore hoki tou pononga i mohio ki tetahi aha o tenei, ahakoa iti, ahakoa rahi.
- 16
- Na, ko te meatanga mai a te kingi, He mate kau mou, e Ahimereke, mou, mo te whare katoa ano hoki o tou pāpā.
- 17
- Katahi ka mea te kingi ki nga kai oma e tu ana i tona taha, Tahuri atu, whakamatea nga tohunga a Ihowa; he mea kua huihui atu ano hoki o ratou ringa ki a Rawiri; i mohio hoki ratou e rere ana ia, a kihai i whakaatu mai ki a au. Heoi kihai i pai nga tangata a te kingi kia totoro atu o ratou ringa, kia rere ki runga ki nga tohunga a Ihowa.
- 18
- Na, ka mea te kingi ki a Roeke, Tahuri atu koe, rere ki runga ki nga tohunga. Na, tahuri ana a Roeke Eromi, a rere ana ia ki runga ki nga tohunga, a e waru tekau ma rima nga tangata i patua e ia i taua ra, he hunga kakahu i te epora rinena.
- 19
- I patua ano hoki e ia a Nopo te pa o nga tohunga ki te mata o te hoari, te tangata, te wahine, nga tamariki, nga mea ngote u, nga kau, nga kaihe, nga hipi ki te mata o te hoari.
- 20
- Otiia i mawhiti atu tetahi o nga tama a Ahimereke tama a Ahitupu, tona ingoa ko Apiatara; a rere ana ki te whai i a Rawiri.
- 21
- A na Apiatara i korero ki a Rawiri ta Haora patunga i nga tohunga a Ihowa.
- 22
- Na, ka mea mai a Rawiri ki a Apiatara, I mohio ano ahau i taua ra i a Roeke Eromi i kona, ka whakaaturia e ia ki a Haora; naku i mate ai nga tangata katoa o te whare o tou pāpā.
- 23
- E noho ki a au; kaua e wehi; ta te mea te tangata e whai ana kia whakamatea ahau, e whai ana kia whakamatea koe; na, kei a au koe, ka tiakina koe.
Address: 
Phone: 
Email: