- 1
- A, ka korerotia te korero ki a Rawiri, Nana, kei te whawhai nga Pirihitini ki Keira, a e pahua ana i nga patunga witi.
- 2
- Katahi a Rawiri ka ui ki a Ihowa, ka mea, Me haere ranei ahau ki te patu i enei Pirihitini? Na ko te meatanga mai a Ihowa ki a Rawiri, Haere, patua nga Pirihitini, whakaorangia hoki a Keira.
- 3
- Katahi ka mea nga tangata a Rawiri ki a ia, Nana, e wehi nei tatou i konei i Hura, a tera noa ake ki te haere ki Keira ki nga taua a nga Pirihitini.
- 4
- Na, ka ui ano hoki a Rawiri ki a Ihowa, a ka whakahokia mai te korero e Ihowa ki a ia, Whakatika, haere ki raro ki Keira; kua hoatu hoki nga Pirihitini e ahau ki tou ringa.
- 5
- Na, haere ana a Rawiri, ratou ko ana tangata ki Keira, a whawhai ana ki nga Pirihitini, a aia mai ana e ia a ratou kararehe, patua iho hoki ratou, he nui te parekura. Na, whakaorangia ana nga tangata o Keira e Rawiri.
- 6
- Na, i te rerenga mai o Apiatara tama a Ahimereke ki a Rawiri ki Keira; i maua mai e ia tetahi epora i tona ringa.
- 7
- A ka korerotia ki a Haora, kua tae mai a Rawiri ki Keira, ka mea a Haora, Kua tukua mai ia e te Atua ki toku ringa; ka tutakina nei hoki ki roto, i a ia ka haere nei ki roto ki te pa whai tatau, whai tutaki.
- 8
- Katahi ka karangatia te iwi katoa e Haora ki te whawhai, ki te haere ki raro ki Keira, ki te whakapae i a Rawiri ratou ko ana tangata.
- 9
- Heoi kua mohio a Rawiri e whakatakoto puku ana a Haora i te kino mona; na, ka mea ia ki a Apiatara ki te tohunga, Kawea mai te epora.
- 10
- Na, ko te meatanga a Rawiri, E Ihowa, e te Atua o Iharaira, kua tino rongo to pononga e mea ana a Haora kia haere mai ki Keira, ki te whakangaro i te pa; he meatanga hoki nana ki a au.
- 11
- Tera ranei e tukua atu ahau e nga tangata o Keira ki roto ki tona ringa? e haere mai ranei a Haora, e pera ranei me ta to pononga i rongo ai? E Ihowa, e te Atua o Iharaira, tena ra, whakaaturia mai ki to pononga. Katahi ka mea mai a Ihowa, Ina haere mai ano ia.
- 12
- Ano ra atu ko Rawiri, Tera ranei nga tangata o Keira e tuku i a matou ko aku tangata ki roto ki te ringa o Haora? Na, ka mea mai a Ihowa, Ka tuku ano.
- 13
- Katahi a Rawiri ka whakatika, ratou ko ana tangata (tata tonu ratou ki nga rau e ono) a haere atu ana i Keira; i haere ratou i ta ratou haere noa atu. A ka korerotia ki a Haora kua rere atu a Rawiri i Keira, na, kore ake tana haere atu.
- 14
- Heoi ka noho a Rawiri i te koraha i nga pourewa, i noho hoki i te maunga i te koraha o Tiwhi. A rapua ana ia e Haora i nga ra katoa; otiia kihai ia i tukua e te Atua ki tona ringa.
- 15
- Na, kua kite a Rawiri kua puta mai a Haora, e whai ana kia whakamatea ia; i te koraha ano hoki o Tiwhi a Rawiri, i roto i te ngahere.
- 16
- Na, ka whakatika a Honatana, tama a Haora, a haere ana ki a Rawiri ki roto ki te ngahere, a whakakahangia ana e ia tona ringa i roto i te Atua.
- 17
- I mea hoki ia ki a ia, Kaua e wehi; e kore hoki te ringa o Haora o toku pāpā e pono ki a koe; a ko koe ano hei kingi mo Iharaira, ko au hoki ki muri iho i a koe; e mohiotia ana ano hoki tenei e Haora e toku pāpā.
- 18
- Na, whakarite kawenata ana raua i te aroaro o Ihowa: a noho ana a Rawiri i roto i te ngahere, ko Honatana hoki i haere ki tona whare.
- 19
- Na, ka haere mai nga Tiwhi ki a Haora ki Kipea, a ka mea, He teka ianei kei te piri a Rawiri i roto i a matou i nga pourewa i roto i te ngahere i Maunga Hakira, i te taha ki te tonga o Hehimono.
- 20
- Na, tena ra, e te kingi, kua hiahia rawa nei hoki tou ngakau ki te haere ki raro; haere ake, a ma matou te tuku i a ia ki roto ki te ringa o te kingi.
- 21
- Na ko te meatanga mai a Haora, Kia manaakitia koutou e Ihowa; mo koutou i aroha ki a au.
- 22
- Na, haere, whakatikaia rawatia, kia mohiotia, kia kitea, tona wahi e haereere ai, i kitea hoki ia e wai ki reira; e korerotia ana hoki ki a au he tupato rawa ia.
- 23
- Tirohia iho, kia mohio hoki ki nga piringa katoa e piri ai ia, ka hoki mai ai ki a au ina tino tika, a ka haere tahi atu tatou. Na, ki te mea kei te whenua nei ia, maku ia e rapu atu i roto i nga mano katoa o Hura.
- 24
- Na, whakatika ana ratou, haere ana ki Tiwhi ki mua i a Haora: i te koraha ia o Maono a Rawiri ratou ko ana tangata, i te mania i te taha ki te tonga o Hehimono,
- 25
- Katahi ka haere a Haora ratou ko ana tangata ki te rapu; A ka korerotia ki a Rawiri, na, ka haere atu ia ki raro ki tetahi kamaka, a noho ana i te koraha o Maono. A ka rongo a Haora, na, ka whaia e ia a Rawiri i te koraha o Maono.
- 26
- Heoi i tenei taha o te maunga a Haora e haere ana, i tera taha hoki o te maunga a Rawiri ratou ko ana tangata: na, ka hohoro a Rawiri te haere atu i te wehi i a Haora; e karapotia ana hoki a Rawiri ratou ko ana tangata e Haora ratou ko ana tangata, kia hopukia.
- 27
- Na, ko te taenga mai o te karere ki a Haora, hei mea, Kia hohoro te haere; kua huaki mai hoki nga Pirihitini ki te whenua.
- 28
- Katahi a Haora ka hoki atu i te whai i a Rawiri, a haere ana ki te tu i nga Pirihitini; no reira i karangatia ai te ingoa o tera wahi, ko te Kohatu o nga wehewehenga.
- 29
- Na, haere atu ana a Rawiri i reira, a noho ana i te pourewa i Enekeri.
Address: 
Phone: 
Email: