- 1
- Na, ka mea a Rawiri i roto i tona ngakau, Akuanei ahau ngaro ai i te ringa o Haora i tetahi o nga ra e haere ake nei; kahore ake he mea pai maku engari kia hohoro taku mawhiti atu ki te whenua o nga Pirihitini, kia whakaparahako ai a Haora, ki te rapu ano i a au i nga rohe katoa a Iharaira: penei ka mawhiti atu ahau i roto i tona ringa.
- 2
- Na, whakatika ana a Rawiri, a haere atu ana ratou ko ona hoa e ono rau ki a Akihi, tama a Maoko, ki te kingi o Kata.
- 3
- Na, ka noho a Rawiri ki a Akihi ki Kata, a ia me ana tangata, tenei tangata me tona whare, tenei tangata me tona whare, a Rawiri ratou ko ana wahine tokorua, ko Ahinoama o Ietereere, raua ko Apikaira o Karamere, wahine a Napara.
- 4
- A, ka korerotia ki a Haora, kua rere a Rawiri ki Kata, na, mutu ake tana rapu i a ia.
- 5
- Na, ka mea a Rawiri ki a Akihi, Ki te mea kua manakohia ahau e koe, kia homai e ratou tetahi wahi ki a au i roto i tetahi o nga pa i te koraha noa atu, hei nohoanga moku: he aha hoki to pononga, i noho tahi ai ki a koe i roto i te pa kingi?
- 6
- Na, ka homai e Akihi ki a ia i taua ra a Tikiraka: no reira nga kingi o Hura i taunga ai ki Tikiraka, a mohoa noa nei.
- 7
- Na, te maha o nga ra i noho ai a Rawiri ki te whenua o nga Pirihitini, kotahi tau, e wha nga marama.
- 8
- Katahi a Rawiri ka haere atu, ratou ko ana tangata, a whakaekea ana e ratou nga Kehuri, nga Kireti, me nga Amareki; ko era hoki nga iwi kua noho noa ake ki tera whenua i te haerenga atu ki Huru, a te whenua o Ihipa atu ano.
- 9
- Na, patua iho e Rawiri tera whenua; kihai hoki i whakaorangia tetahi tangata, wahine ranei; i tangohia mai ano hoki e ia nga hipi, nga kau, nga kaihe, nga kamera, me nga kakahu, a hoki ana, haere ana ki a Akihi.
- 10
- Na, ka mea mai a Akihi, Ko hea i whakaekea e koutou inaianei? Ano ra ko Rawiri, Ko te taha ki te tonga o Hura, ko te taha ki te tonga o nga Ierameeri, ko te taha ano hoki ki te tonga o nga Keni.
- 11
- Kihai hoki i whakaorangia e Rawiri tetahi tangata, wahine ranei, hei kawe korero ki Kata; i mea hoki, Kei korerotia ta tatou, kei mea ratou, Ko te mahi tenei a Rawiri, ko te tikanga ano hoki tenei mana i nga ra katoa e noho ai ia ki te whenua o nga Pirihitini.
- 12
- Heoi whakapono tonu mai a Akihi ki ta Rawiri, ka mea, Kua tino mea rawa ia i a ia kia whakariharihangia e tona iwi e Iharaira: na, hei tangata tupu tonu ia maku.
Address: 
Phone: 
Email: