- 1
- Na, i aua ra kua huihuia e nga Pirihitini a ratou taua mo te pakanga, whawhai ai ki a Iharaira. Na, ko te meatanga mai a Akihi ki a Rawiri, Kia tino mohio koe me haere tahi taua ki te whawhai, koutou ko o tangata.
- 2
- Ano ra ko Rawiri ki a Akihi, Ma reira koe ka mohio ai ki nga mahi a to pononga: A ka mea a Akihi ki a Rawiri, Koia ahau ka mea nei i a koe hei tiaki mo toku upoko i nga ra katoa.
- 3
- Na, kua mate a Hamuera, kua uhungatia hoki e Iharaira katoa, kua tanumia ano hoki ki Rama ki tona pa. A, kua kore i a Haora nga waka atua me nga rapa maori o te whenua.
- 4
- Na, ka huihui nga Pirihitini, a, haere mai ana, noho ana ki Huneme; i huihuia ano hoki e Haora a Iharaira katoa, a noho ana ki Kiripoa.
- 5
- A, te kitenga o Haora i te taua a nga Pirihitini, na, ka wehi, pawera rawa tona ngakau.
- 6
- A, te uinga atu a Haora ki a Ihowa, na, kore rawa he kupu a Ihowa i whakahokia mai ki a ia e nga moe, e nga Urimi, e nga poropiti.
- 7
- Na, ka mea a Haora ki ana tangata, Rapua mai maku tetahi wahine he atua maori tona, a, ka haere atu ahau ki a ia ki te rapu tikanga i a ia. Ano ra ko ana tangata ki a ia, Tera tetahi wahine, he atua maori tona, kei Ene-roro.
- 8
- Na, ka whakaahua ke a Haora i a ia, a, kakahuria ana etahi kakahu ke, haere ana ratou tahi ko etahi o ana tangata tokorua: te taenga atu ki taua wahine i te po, ka mea atu, Tena koa, karakiatia te atua maori, whakaputaina ake hoki ki a au taku tangata e ki ai ahau ki a koe.
- 9
- Na, ko te meatanga mai a taua wahine ki a ia, Ha, kua mohio ano koe ki ta Haora i mea ai, ki tana hautopenga atu i te hunga atua maori, me nga rapa maori, o te whenua nei; na te aha koe i mea mahanga ai mo toku wairua, kia whakamatea ai ahau?
- 10
- Na, ka oatitia atu a Ihowa e Haora ki a ia, i mea ia, E ora ana a Ihowa, e kore tetahi he e pa ki a koe mo tenei mea.
- 11
- Katahi te wahine ka mea, Ko wai kia whakaputaina ake e ahau ki a koe? Ano ra ko ia, Ko Hamuera tau e whakaputa ake ai ki a au.
- 12
- A, te kitenga o te wahine i a Hamuera, na, nui atu tona reo ki te hamama, a ka korero te wahine ki a Haora, ka mea, He aha koe i tinihanga ai ki a au? ko Haora hoki koe.
- 13
- Katahi te kingi ka mea ki a ia, Kaua e wehi: i kite hoki koe i te aha? Na, ka mea te wahine ki a Haora, I kite ahau i nga atua e haere ake ana i roto i te whenua.
- 14
- Ano ra ko tera ki a ia, He ahua aha tona? A, ka mea mai ia, He koroheke te haere ake nei; he koroka hoki te kakahu. Na ka mohio a Haora ko Hamuera ia. Tuohu iho ana tona mata ki te whenua, piko iho ana ia.
- 15
- Na, ko te meatanga mai a Hamuera ki a Haora, He aha koe i whakaoho ai i a au, i mea ai kia haere mai ahau? Ano ra ko Haora, Nui whakaharahara toku mate; e whawhai ana hoki nga Pirihitini ki a au, a kua mahue ahau i te Atua, kahore ake ano hoki he kupu āna e whakahokia mai ki a au e nga poropiti, e nga moe ranei; koia ahau i karanga ai ki a koe, kia whakakitea mai ai e koe he tikanga maku.
- 16
- Katahi a Hamuera ka mea mai, He aha ra koe i ui mai ai ki a au, kua mahue nei hoki koe i a Ihowa, a hei hoa riri ia ki a koe.
- 17
- Ka meatia ano hoki e Ihowa ki a ia tana mea i whakapuakina e ahau: ka haea atu hoki te kingitanga i roto i tou ringa, a ka hoatu ki tou hoa, ki a Rawiri.
- 18
- Mou kihai i whakarongo ki te reo o Ihowa, kihai i whakaputa i tana riri weriweri ki a Amareke, no reira a Ihowa i mea ai i tenei mea ki a koe inaianei.
- 19
- Ka hoatu ngatahi ano hoki koutou ko Iharaira e Ihowa ki te ringa o nga Pirihitini, a, apopo koutou ko o tama tae ake ai ki a au: ka hoatu ano hoki e Ihowa te taua a Iharaira ki te ringa o nga Pirihitini.
- 20
- Na, takoto wharoro tonu iho a Haora ki te whenua, nui rawa hoki tona wehi mo nga kupu a Hamuera: kahore ano hoki he kaha i roto i a ia; kihai hoki ia i kai taro, a pau noa taua rangi, pau noa taua po.
- 21
- Na, ka haere mai taua wahine ki a Haora; a, tona kitenga e pororaru rawa ana āna whakaaro, ka mea ki a ia, Na, kua whakarongo nei to pononga ki tou reo, a whakamomori atu ana ahau ki te mate, whakarongo ana ahau ki au kupu i korerotia mai e koe ki a au.
- 22
- Na, tena, whakarongo mai hoki koe aianei ki te reo o to pononga, Kia whakatakotoria e ahau tetahi wahi taro ki tou aroaro; me kai ano e koe, kia whai kaha ai koe ina haere i tou huarahi.
- 23
- Otiia i whakakahore ia, i mea, E kore ahau e kai. Heoi tohea ana ia e ana tangata ratou ko te wahine; na, ka whakarongo ia ki to ratou reo, a, whakatika ake ana i te whenua, noho ana ki runga ki te moenga.
- 24
- Na, he kuao kau ta taua wahine i roto i te whare, he mea whangai; na, hohoro tonu tana patu, tikina ana e ia he paraoa, pokepokea ana, tunua iho e ia etahi keke rewena-kore.
- 25
- Kawea mai ana e ia ki te aroaro o Haora, ki te aroaro ano hoki o ana tangata. Na, kai ana ratou, a whakatika ana, haere ana i taua po ano.
Address: 
Phone: 
Email: