- 1
- Na, kua koroheketia a Hamuera, a meinga ana e ia ana tama hei kai whakarite whakawa mo Iharaira.
- 2
- Na, te ingoa o tana tama matamua ko Hoere; ko Apia hoki te ingoa o tana tuarua. I whakarite whakawa raua ki Peere-hepa.
- 3
- Otiia kihai ana tama i tika i tona ara; heoi peka ke ana raua ki te apo; i tango hoki i te moni whakapati, whakapeaua ketia ake te whakaritenga o te whakawa.
- 4
- Katahi ka huihui mai nga kaumatua katoa o Iharaira, a haere ana ki a Hamuera ki Rama.
- 5
- Ka mea ki a ia, Kua koroheketia tena koe, kahore ano hoki o tama e tika i ou huarahi, na, whakaritea mai he kingi mo matou, hei whakarite whakawa mo matou, hei pera ano me o nga iwi katoa.
- 6
- Na, kino tonu taua kupu ki te whakaaro iho a Hamuera, mo ratou i mea, Homai he kingi ki a matou, hei whakarite whakawa mo matou. Na, ka inoi a Hamuera ki a Ihowa.
- 7
- Na, ko te meatanga mai a Ihowa ki a Hamuera, Whakarongo atu ki te reo o te iwi na, ki nga mea i korerotia ra e ratou ki a koe; ehara hoki i te mea ko koe ta ratou i paopao ai, ko ahau ano hoki ta ratou i paopao mai na hei kingi mo ratou.
- 8
- E rite tonu ana ki nga mea katoa i mea ai ratou, o te ra iho ano i kawea mai ai ratou e ahau i Ihipa, a tae noa ki tenei ra; i whakarere hoki ratou i a au, i mahi atu ki nga atua ke: ko ta ratou mahi hoki tena ki a koe.
- 9
- Na, whakarongo aianei ki to ratou reo: otiia kia kaha te kauwhau ki a ratou, whakaaturia atu ano hoki nga tikanga o te kingi e whakakingitia mo ratou.
- 10
- Na, ka korerotia atu e Hamuera nga kupu katoa a Ihowa ki te hunga i tono kingi nei i a ia.
- 11
- Ka mea, Ko te tikanga tenei a te kingi e whakakingitia mo koutou: Ko a koutou tama ka tangohia e ia, ka meinga mana, mo ana hariata, hei tangata eke hoiho hoki mana, hei rere ano hoki ki mua i ana hariata;
- 12
- Ka meinga ano hoki hei rangatira mano mana, hei rangatira mo nga rima tekau, hei parau i tana mara, hei kokoti i ana witi, hei hanga ano hoki i ana mea mo te whawhai, i ana mea mo ana hariata;
- 13
- Ka tangohia ano hoki e ia a koutou tamahine hei kai konatunatu, hei tuari, hei taka kai.
- 14
- Me a koutou māra, a koutou kāri waina, a koutou kāri oriwa, ka tangohia e ia nga mea papai, a ka hoatu ki ana pononga.
- 15
- Ka tangohia ano hoki e ia te whakatekau o a koutou purapura, o a koutou kāri waina, a ka hoatu ki ana rangatira, ki ana pononga.
- 16
- Ka tangohia ano e ia a koutou pononga tane, a koutou pononga wahine, a koutou taitamariki papai, me a koutou kaihe, a ka whakamahia ki tana mahi.
- 17
- Ka tangohia ano e ia nga whakatekau o a koutou hipi: ka waiho ano hoki koutou hei pononga māna.
- 18
- A ka tangi koutou i taua wa i ta koutou kingi i whiriwhiri ai hei kingi mo koutou; otiia e kore a Ihowa e whakarongo ki a koutou i taua wa.
- 19
- Heoi kihai te iwi i pai kia whakarongo ki te reo o Hamuera. Na, ka mea mai ratou, Kahore; engari me whai kingi ano matou;
- 20
- Kia rite ai hoki matou ki nga iwi katoa; a ka whakarite whakawa to matou kingi mo matou, ka haere atu hoki i to matou aroaro, hei whawhai i ā matou whawhai.
- 21
- A, te rongonga o Hamuera i nga kupu katoa a te iwi, na, korerotia ana e ia ki nga taringa o Ihowa.
- 22
- Na, ko te meatanga mai a Ihowa ki a Hamuera, Whakarongo atu ki to ratou reo, whakaritea hoki he kingi mo ratou. Katahi ka mea a Hamuera ki nga tangata o Iharaira, Haere atu koutou ki tona pa, ki tona pa.
Address: 
Phone: 
Email: