- 1
- Na, ko tetahi tangata o Peniamine, ko Kihi tona ingoa, he tama na Apiere, tama a Teroro, tama a Pekorata, tama a Apiaha, he Peniamini, he tangata marohirohi.
- 2
- A he tama ano tana, tona ingoa, ko Haora, he taitama, he ataahua, he pai, kahore he tangata o nga tamariki a Iharaira i ataahua rawa i a ia; purero tonu ona pokohiwi ki runga ake i te iwi katoa.
- 3
- Na, kua ngaro nga kaihe a Kihi pāpā o Haora, a ka mea a Kihi ki a Haora ki tana tama, Tangohia tetahi o nga tamariki hei hoa mou, whakatika, haere ki te rapu i nga kaihe.
- 4
- Na, ka tika atu ia na Maunga Eperaima, a haere tonu atu na te whenua o Hariha; heoi kihai i kitea: katahi raua ka tika atu na te whenua o Harimi, heoi kahore noa iho: na, ka haere atu ia na te whenua o nga Peniamini, a kahore i kitea.
- 5
- A, to raua taenga mai ki te whenua o Tupu, ka mea a Haora ki tana tangata ki tona hoa, Haere mai, taua ka hoki; kei mutu ta toku pāpā whakaaro ki nga kaihe, a ka manukanuka ki a taua.
- 6
- Na, ko te meatanga mai a tera ki a ia, He tangata na te Atua tenei kei te pa nei, he tangata e whakahonoretia ana; mana pu ana kupu katoa: na, kia haere taua ki reira; tera pea e korerotia mai e ia ki a taua te ara e haere ai taua.
- 7
- Ano ra ko Haora ki tana tangata, Ha, ki te haere nei tāua, he aha te mea hei kawenga atu ma tāua ki taua tangata, kua hemo nei hoki te taro i roto i a tāua putea, kahore hoki he hakari hei kawenga atu ki taua tangata a te Atua: he aha ta taua?
- 8
- Na, ka whakahokia mai ano e taua tangata ki a Haora, ka mea, Nana, ko te whakawha tenei o nga wahi o te hekere hiriwa kei toku ringa: me hoatu e ahau ki taua tangata a te Atua, kia whakaaturia mai e ia to taua ara ki a taua.
- 9
- (I mua ko te ki tenei a te tangata i roto i a Iharaira ina haere ki te ui tikanga ki te Atua, Hoake, taua ka haere ki te matakite: he Matakite hoki ta mua ingoa mo te poropiti.)
- 10
- Na, ko te meatanga ake a Haora ki tana tangata, Ka pai to kupu; hoatu, taua ka haere. Na, haere ana raua ki te pa kei reira nei taua tangata a te Atua.
- 11
- I a raua e piki ana i te pikitanga ki te pa, ka tutaki ki etahi kotiro e puta mai ana ki te utu wai. Na, ko ta raua meatanga atu ki a ratou, Tenei ranei te matakite?
- 12
- Na, ka whakahokia mai e ratou ki a raua, ka mea, Tenei ano; Nana, kei mua atu ra i a koe: hohoro atu inaianei nei ano, no tenei ra hoki ia i tae mai ai ki te pa; he patunga tapu hoki ta tenei iwi aianei i te wahi tiketike.
- 13
- Tomo kau atu korua ki te pa, ka tupono atu ki a ia i te mea kahore ano i haere noa ki runga ki te wahi tiketike ki te kai: e kore hoki te iwi e kai, kia tae atu ra ano ia; ko ia hoki hei whakapai i te patunga tapu, muri iho ka kai te hunga i karangatia. Na, haere atu korua ki runga; ko te wa hoki tenei e kitea ai ia e korua.
- 14
- Na, piki ana raua ki te pa. Ka tae atu raua ki roto ki te pa, na, ko te putanga mai o Hamuera; tutaki tonu ki a raua; e haere ana ki runga ki te wahi tiketike.
- 15
- Na, kua whakapuaki a Ihowa ki te taringa o Hamuera i te ra i mua ake o te putanga mai o Haora, kua mea,
- 16
- Kia penei apopo ka ungā mai e ahau ki a koe tetahi tangata i te whenua o Peniamine, na, me whakawahi ia e koe hei rangatira mo toku iwi, mo Iharaira, a mana e whakaora toku iwi i te ringa o nga Pirihitini: kua titiro atu hoki ahau ki toku iwi, no te mea kua tae ake ta ratou karanga ki a au.
- 17
- A, te kitenga o Hamuera i a Haora, na, ka mea ake a Ihowa ki a ia, Ko te tangata tenei i korerotia e ahau ki a koe. Mana e whakahaere tikanga mo toku iwi.
- 18
- Na, ko te whakatatanga mai o Haora ki a Hamuera ki te kuwaha, ka mea mai, Tena koa, whakaaturia mai ki a au, kei hea te whare o te matakite.
- 19
- Katahi ka whakahokia atu e Hamuera ki a Haora, a ka mea, Ko ahau te matakite: piki ake ki mua i a au ki te wahi tiketike; me kai tahi hoki tatou aianei, a ka tukua atu koe e ahau i te ata, ka whakaaturia hoki ki a koe nga mea katoa i tou ngakau.
- 20
- Ko āu kaihe hoki, ka toru nei nga ra ka ngaro na, kaua tou ngakau e whai ki era; kua kitea hoki. A kei a wai te hiahia katoa o Iharaira? he teka ianei kei a koe, kei te whare katoa ano hoki o tou pāpā?
- 21
- Na, ko te whakahokinga mai a Haora, ka mea mai, He teka ianei he Peniamini ahau, no te iti rawa o nga iwi o Iharaira, ko toku hapu hoki te iti rawa o nga hapu katoa o te iwi o Peniamine? a he aha ena kupu i puaki mai ai i a koe?
- 22
- Na, ka mau a Hamuera ki a Haora raua ko tana tangata, a kawea ana ki roto ki te whare, a hoatu ana e ia he nohoanga ki a raua i runga ake o te hunga i karangatia; e toru tekau ano hoki ratou.
- 23
- Katahi ka mea a Hamuera ki te tuari, Homai te wahi i hoatu e ahau ki a koe, tera i kiia atu ra e ahau ki a koe, Kia takoto tena ki a koe.
- 24
- Na, hapainga mai ana e te tuari te peke me te mea i takoto i runga, a whakatakotoria ana ki te aroaro o Haora. Na, ka mea a Hamuera, Nana, ko te wahi tera i mahue, waiho i tou aroaro hei kai mau: he mea rongoa tonu hoki mau, a tae noa ki tenei wa, no taku kianga ra ano, He hunga ano tenei kua karangatia e ahau. Na, kai tahi ana a Haora raua ko Hamuera i taua ra.
- 25
- A ka heke iho ratou i runga i te wahi tiketike ki te pa, na, ka korero ia ki a Haora i runga i te tuanui.
- 26
- Na, ka maranga wawe ratou: a i te mea ka puta ake te ra, ka karangatia a Haora e Hamuera ki runga ki te tuanui, i mea ia, Whakatika, kia ungā atu koe e ahau. Na, ka whakatika a Haora, a puta atu ana raua tokorua, a ia, a Hamuera, ki waho.
- 27
- I a raua e heke atu ana i te ngutu o te pa, na, ka mea a Hamuera ki a Haora, Mea atu ki te tangata ra kia haere atu ki mua i a taua; (katahi tera ka haere atu,) ko koe ia, tu marie koe, kia whakapuakina atu e ahau ki a koe te kupu a te Atua.
Address: 
Phone: 
Email: