- 1
- Na, puta mai ana te kupu a Hamuera ki a Iharaira katoa. I haere atu ano hoki a Iharaira ki te tu i nga Pirihitini ki te riri, a ka noho ki Epene-etere; ko nga Pirihitini ano hoki i noho ki Apeke.
- 2
- Na, ka whakaritea e nga Pirihitini a ratou ngohi hei whawhai ki a Iharaira: a ka horapa haere te whawhai, na, ka patua a Iharaira e nga Pirihitini: e wha mano nga tangata o te ope i patua e ratou ki te parae.
- 3
- A, te taenga o nga tangata ki te puni, ka mea nga kaumatua o Iharaira, Na te aha tatou i patua ai e Ihowa inaianei i te aroaro o nga Pirihitini? Kia tikina ki a tatou te aaka o te kawenata a Ihowa i Hiro, hei haere atu i roto i a tatou, hei whakaora i a tatou i roto i te ringa o o tatou hoa riri.
- 4
- Katahi ka tono tangata atu te iwi ki Hiro, hei mau mai i reira i te aaka o te kawenata a Ihowa o nga mano, e noho nei i waenganui i nga kerupima: na, kei reira ano hoki nga tama tokorua a Eri, a Hoponi raua ko Pinehaha, kei te aaka o te kawenata a te Atua.
- 5
- A, te taenga mai o te aaka o te kawenata a Ihowa ki te puni, na, ka hamama a Iharaira katoa, he nui te hamamatanga, a ngateri ana te whenua.
- 6
- A ka rongo nga Pirihitini i te reo e hamama ana, ka mea ratou, He aha tenei reo nui e hamama nei i te puni o nga Hiperu? Katahi ratou ka mohio kua tae mai te aaka a Ihowa ki te puni.
- 7
- Na, ka wehi nga Pirihitini; i mea hoki, Kua tae mai te Atua ki te puni. Na, ka mea ratou, Aue, te mate mo tatou! kahore hoki he penei me tenei i mua ake nei.
- 8
- Aue, te mate mo tatou! ma wai tatou e whakaora i roto i te ringa o enei Atua nui? ko nga Atua enei nana nga patunga katoa i patua ai nga Ihipiana i te koraha.
- 9
- Kia maia, whakatangata, e nga Pirihitini, kei whakataurerekatia koutou e nga Hiperu, kei peratia me ratou i whakataurerekatia na e koutou: na, me whakatangata koutou, me whawhai.
- 10
- Na, ka whawhai nga Pirihitini, a patua ana a Iharaira e ratou, a rere ana ki tona teneti, ki tona teneti: he nui whakaharahara te parekura; a e toru tekau mano o Iharaira i hinga, he hunga haere i raro.
- 11
- Na, ka mau te aaka a te Atua; i mate ano hoki a Hoponi raua ko Pinehaha nga tama tokorua a Eri.
- 12
- Na, ka rere mai tetahi tangata o Peniamine i te ope, tae tonu mai ki Hiro i taua rangi ano, he mea haehae ona kakahu, he oneone ano hoki i runga i tona mātenga.
- 13
- A, tona taenga mai, na, e noho ana a Eri i runga i te nohoanga i te taha o te ara, e tutei atu ana: he pawera hoki no tona ngakau mo te aaka a te Atua. A ka tae mai taua tangata ki te pa, ka korero, na, hamama katoa ana te pa.
- 14
- A ka rongo a Eri i te reo e hamama ana, ka mea ia, He reo aha tenei e ngangau nei? Na, hohoro tonu taua tangata, a kua tae mai kua korero ki a Eri.
- 15
- Na, e iwa tekau ma waru nga tau o Eri; kua atarua ano hoki ona kanohi, tē ahei ia te titiro atu.
- 16
- Na, ko te meatanga mai a taua tangata ki a Eri, i haere mai ahau i te ope, i rere mai inaianei i te ope. A ka mea mai tera, I pehea te mea ra, e taku tamaiti?
- 17
- Katahi ka whakahokia mai e taua kai kawe korero, ka mea, I rere a Iharaira i te aroaro o nga Pirihitini, he nui hoki te parekura o te iwi; ko āu tamariki tokorua ano hoki, ko Hoponi, raua ko Pinehaha, kua mate; kua riro ano hoki te aaka a te Atua.
- 18
- Na, tana whakahuatanga i te aaka a te Atua, hinga ana tera ki muri i runga i te nohoanga, ki te taha o te kuwaha, a whati iho tona kaki, mate ake: he koroheke hoki ia, he taimaha. Na, e wha tekau nga tau i whakarite whakawa ai ia mo Iharaira.
- 19
- Na, e hapu ana tana hunaonga, te wahine a Pinehaha, meake whanau: a tona rongonga i te korero o te aaka a te Atua kua riro, o te matenga ano hoki o tona hungawai raua ko tona tahu, na, ka piko iho ia, ka whanau; i pa whakarere mai hoki te mamae ki a ia.
- 20
- A i a ia e whakahemohemo ana, ka mea mai nga wahine e tu ana i tona taha, Kaua e wehi; he tane hoki tenei tamaiti au. Heoi kahore ana kupu i whakahoki mai ai, kihai ano hoki i anga mai tona ngakau.
- 21
- Na, huaina iho e ia te tamaiti ko Ika-poro, i mea, Kua heke te kororia o Iharaira: no te mea kua riro te aaka a te Atua, mo tona hungawai ano hoki raua ko tona tahu.
- 22
- I mea ano ia, Kua heke te kororia o Iharaira, kua riro nei hoki te aaka a te Atua.
Address: 
Phone: 
Email: