- 1
- A te rironga o te aaka a te Atua i nga Pirihitini, ka kawea atu e ratou i Epene-etere ki Aharoro.
- 2
- Na, ka mau nga Pirihitini ki te aaka a te Atua, a kawea ana e ratou ki te whare o Rakono, whakaturia ake e ratou ki te taha o Rakono.
- 3
- A, te marangatanga ake o nga Aharori i te aonga ake, na, kua taka, kua tapapa iho a Rakono ki te whenua ki mua i te aaka a Ihowa. Na, ka mau ratou ki a Rakono, whakanohoia ake ana e ratou ki tona wahi ano.
- 4
- A, to ratou marangatanga ake i te ata o tetahi ra, na, kua taka a Rakono, kua tapapa iho ki te whenua ki mua i te aaka a Ihowa, a ko te mātenga o Rakono me nga kapu e rua o ona ringa, kua motuhia i runga i te paepae o te tatau; ko te tinana anake o Rakono i mahue ki a ia.
- 5
- Koia nga tohunga o Rakono me te hunga katoa e haere ana ki te whare o Rakono tē takahi ai ki runga ki te paepae o Rakono i Aharoro, a mohoa noa nei.
- 6
- Na, ka pehia iho nga Aharori e te ringa o Ihowa, a hunā iho ratou e ia; i patua hoki ratou e ia ki te pukupuku, ara, a Aharoro me ona rohe.
- 7
- A, te kitenga o nga tangata o Aharoro i taua meatanga, na, ka moe ratou, E kore te aaka a te Atua o Iharaira e noho ki a tatou: e uaua mai ana hoki tona ringa ki a tatou, ki to tatou atua ano hoki ki a Rakono.
- 8
- Katahi ratou ka unga tangata atu hei huihui mai i nga rangatira katoa o nga Pirihitini ki a ratou. Na, ka mea ratou, Me aha matou ki te aaka a te Atua o Iharaira? A ka mea ratou, Me kawe te aaka a te Atua o Iharaira ki Kata. Na, kawea ana e ratou te aaka a te Atua o Iharaira.
- 9
- A ta ratou kawenga i taua mea, katahi ka pa te ringa o Ihowa ki te pa, he nui whakaharahara te aitua; i patua hoki e ia nga tangata o te pa, te iti te rahi, a ka whai pukupuku o ratou wahi ngaro.
- 10
- Na, ka ungā e ratou te aaka a te Atua kia kawea ki Ekerono. A, te taenga atu o te aaka a te Atua ki Ekerono, na, ka karanga nga Ekeroni, ka mea, Kua kawea mai e ratou te aaka a te Atua o Iharaira ki a tatou, hei whakamate i a tatou me to tatou iwi.
- 11
- Katahi ratou ka unga tangata atu, ka huihui i nga rangatira katoa o nga Pirihitini, a ka mea, Ungā atu te aaka a te Atua o Iharaira kia whakahokia atu ki tona wahi, kei whakamatea matou me to matou iwi: he aitua whakamate hoki kei te pa katoa; he nui whakaharahara te ringa o te Atua ki reira.
- 12
- Ko nga tangata hoki kihai i mate, i patua ki te pukupuku, a kake ana te aue o te pa ki te rangi.
Address: 
Phone: 
Email: