- 1
- Ano ra ko Eriha, Whakarongo mai koutou ki te kupu a Ihowa; Ko te kupu tenei a Ihowa, Kia penei apopo ka riro te mehua paraoa mo te hekere, nga mehua parei e rua mo te hekere, i te kuwaha ano o Hamaria.
- 2
- Na, ka whakahokia mai ki te tangata a te Atua e tetahi rangatira nona nei te ringa i okioki ai te kingi; i mea ia, Nana, ki te hangā e Ihowa etahi matapihi ki te rangi, ka rite tenei kupu. Ano ra ko ia, Tera ou kanohi e kite; otiia e kore tetahi wahi o taua mea e kainga e koe.
- 3
- Na, kei te kuwaha o te kēti etahi tangata tokowha, he repera, a ka mea ratou tetahi ki tetahi, He aha tatou i noho ai i konei, a, kia mate ra ano tatou?
- 4
- Ki te mea tatou, Tatou ka haere ki roto ki te pa, na, ko te mate-kai kei roto i te pa, a ka mate ana tatou ki reira: a, ki te noho tatou i konei, ka mate ano tatou. Na, kia haere tatou aianei, kia auraki atu ki te ope o nga Hiriani. Ki te whakaorangia tatou e ratou, ka ora tatou: ki te whakamatea, heoi ano, ka mate.
- 5
- Na, maranga ana ratou i te mea ka kakarauri, haere ana ki te puni o nga Hiriani. Te taenga atu ki te pito o te puni o nga Hiriani, na, kahore o reira tangata.
- 6
- Na te Ariki hoki i mea te puni o nga Hiriani kia rongo i te haruru hariata, i te haruru hoiho, i te haruru o te ope nui. Na, ko ta ratou meatanga tetahi ki tetahi, Nana, kua utua nga kingi o nga Hiti ratou ko nga kingi o nga Ihipiana e te kingi o Iharaira hei hoa whawhai mo tatou, kia haere mai ki te whawhai ki a tatou.
- 7
- Na, whakatika ana ratou, rere ana i te mea ka kakarauri; whakarerea ake e ratou o ratou teneti, o ratou hoiho, o ratou kaihe, me nga aha noa o te puni, a rere ana, he wehi kei mate.
- 8
- Te taenga atu o aua repera ki te pito o te puni, na, haere ana ratou ki roto ki tetahi teneti: na, kei te kai, kei te inu ratou, katahi ka tangohia ake e ratou i reira he hiriwa, he koura, he kakahu, a haere ana, hunā ana e ratou; na, hoki mai ana ratou, haere ana ki roto ki tetahi atu teneti, na, ka tangohia mai ano e ratou i reira, a, haere ana, hunā ana e ratou.
- 9
- Na, ko ta ratou meatanga tetahi ki tetahi, Ehara i te tika ta tatou e mea nei, he rangi rongo pai tenei rangi, a, e noho wahangu ana tatou: ki te tatari tatou kia mārama te ata, tera e rokohanga tatou e te he. Na, hoatu kia haere tatou ki te whare o te kingi korero ai.
- 10
- Na, haere ana ratou, karanga ana ki te kai tiaki o te kuwaha o te pa, na, ka whakaaturia atu e ratou ki a ratou, ka mea, To matou haerenga atu ki te puni o nga Hiriani, na, kahore he tangata o reira, kahore he reo tangata; ko nga hoiho anake e here ana, me nga kaihe e here ana, me nga teneti e tu ana ano.
- 11
- Na, karangatia ana e ia nga kai tiaki o te kuwaha, a, korerotia atu ana e ratou ki te whare o te kingi i roto atu.
- 12
- Na, whakatika ana te kingi i te po, a ka mea ki ana tangata, Maku e whakaatu ki a koutou aianei ta nga Hiriani e mea nei ki a tatou. E mohio ana ratou e mate ana tatou i te kai; koia ratou i haere atu ai i te puni ki te parai piri ai, e ki ana, Tera e puta mai ratou i roto i te pa, a ka hopukia oratia e tatou, ka tae ano hoki tatou ki roto ki te pa.
- 13
- Katahi ka whakahokia mai e tetahi o ana tangata, a ka mea, Kia tangohia etahi o nga hoiho kua mahue nei, kia rima, o enei kua mahue nei ki konei; (nana, penei tonu ratou me te huihui katoa o Iharaira kua mahue nei ki konei; nana, rite tonu ratou ki te huihui katoa o Iharaira kua moti ra;) kia tonoa atu hoki ratou e tatou kia kite.
- 14
- Katahi ka tangohia e ratou etahi hoiho hariata, e rua, a, ungā ana e te kingi ki te whai i te ope o nga Hiriani; i mea ia,Tikina, tirohia.
- 15
- Na, haere ana raua ki te whai i a ratou, a Horano ra ano. Na, kapi tonu te ara katoa i nga kakahu, i nga mea i makā atu e nga Hiriani i to ratou potatutatunga. Na, hoki mai ana aua tangata ki te korero ki te kingi.
- 16
- Na, ko te putanga mai o te iwi ki waho; kei te pahua i te puni o nga Hiriani. Na, te utu mo te mehua paraoa, kotahi ano hekere, a, e rua nga mehua parei mo te hekere: rite tonu ki ta Ihowa kupu.
- 17
- Na, i whakaritea e te kingi ko te rangatira i okioki atu nei ia ki tona ringa, hei rangatira mo te kuwaha. Na, takahia iho ia e te iwi ki te kuwaha, a mate ake; i rite tonu ki ta te tangata a te Atua i korero ai, ki tana ra i korero ai i te haerenga mai o te kingi ki raro ki a ia.
- 18
- I rite tonu ano hoki ki ta te tangata a te Atua i korero ai ki te kingi, i mea ai, E rua nga mehua parei mo te hekere, kotahi ano hoki mehua paraoa mo te hekere i te kuwaha o Hamaria i te wa penei apopo.
- 19
- Na, ko te whakahokinga mai a taua rangatira ki te tangata a te Atua, te meatanga mai, Nana, Ki te hangā e Ihowa etahi matapihi ki te rangi, ka rite tenei kupu. Na, ko ta tera meatanga ake, Tera ou kanohi e kite; otiia e kore tetahi wahi o taua mea e kainga e koe.
- 20
- Pera tonu te meatanga ki a ia: i takahia hoki ia e te iwi ki te kuwaha, a mate ake.
Address: 
Phone: 
Email: