- 1
- Katahi ka korero atu a Eriha ki te wahine nāna nei te tamaiti i whakaorangia e ia, ka mea. Whakatika, haere koutou ko tou whare, a, e noho ki tau wahi e noho ai koe: kua karangatia hoki e Ihowa he mate-kai, a ka tae mai ano ki te whenua, e whitu nga tau.
- 2
- Na, ka whakatika taua wahine, ka mea i ta te tangata a te Atua i ki ai, a, haere ana ratou ko tona whare, noho ana ki te whenua o nga Pirihitini, e whitu nga tau.
- 3
- Na, te takanga o nga tau e whitu, ka hoki mai taua wahine i te whenua o nga Pirihitini, a, haere ana ki te kingi karanga ai, he mea hoki mo tana whare, mo tana mara.
- 4
- Na, i te korero te kingi ki a Kehati tangata a ta te Atua tangata; i mea hoki ia, Tena, taua mai ki a au nga mahi nui katoa i mea ai a Eriha.
- 5
- E korerotia ana e ia ki te kingi tana whakaoranga i te tupapaku, na, ko te wahine nāna nei te tamaiti i whakaorangia e ia e karanga ana ki te kingi mo ona whare, mo tana mara. Na, ko te meatanga ake a Kehati, E taku ariki, e te kingi, koia tenei te wahine, ko tana tamaiti ano hoki tenei i whakaorangia ra e Eriha.
- 6
- Katahi te kingi ka ui atu ki te wahine, a korerotia ana e ia ki a ia. Na, ka tukua atu e te kingi ki a ia tetahi o nga rangatira, i ki atu ano ia, Whakahokia mai āna mea katoa, me nga hua katoa o te mara o te ra iho ano i mahue ai i a ia te whenua, a mohoa noa nei.
- 7
- A, i haere ano a Eriha ki Ramahiku. Na, e mate ana a Pene-harara kingi o Hiria, a ka whakaaturia ki a ia, ka meatia mai, Kua tae mai te tangata a te Atua ki konei.
- 8
- Na, ka mea te kingi ki a Hataere, Maua atu tetahi hakari i roto i tou ringa, ka haere ki te whakatau i te tangata a te Atua, ka ui atu ki ta Ihowa ki a ia, ka mea, E ora ranei au i tenei mate?
- 9
- Na, haere ana a Hataere ki te whakatau i a ia, me te mau ano tona ringa i te hakari, ara, i etahi o nga mea pai katoa o Ramahiku, e wha tekau nga kamera ki te pikau. Na, haere mai ana ia, tu ana ki tona aroaro, a ka mea, Na to tamaiti, na Pene-harara kingi o Hiria, ahau i unga mai ki a koe; hei ki atu, E ora ranei ahau i tenei mate?
- 10
- Ano ra ko Eriha ki a ia, Haere, mea atu ki a ia, E ora ano koe; otiia kua oti i a Ihowa te whakakite mai ki a au tera ia e mate.
- 11
- Na, tau tonu iho tona mata, u tonu, a whakama noa; te tino tangihanga o te tangata a te Atua.
- 12
- Na, ko te meatanga mai a Hataere, Na te aha toku ariki i tangi ai? Ano ra, ko ia, No te mea e mohio ana ahau ki te kino e meatia e koe ki nga tamariki a Iharaira; ko o ratou pa kaha e tahuna e koe ki te ahi, ko a ratou taitamariki e patua e koe ki te hoari; ko a ratou kohungahunga e taia iho e koe; ko a ratou wahine hapu ka ripiripia e koe.
- 13
- Ano ra ko Hataere, Ha! he aha? He kuri koia to pononga kia meatia e ia tenei mea nui? Ano ra ko Eriha, Kua whakakitea mai e Ihowa ki a au ko koe hei kingi mo Hiria.
- 14
- Na, mawehe atu ana ia i a Eriha, a, te taenga atu ki tona ariki, ka mea mai tera ki a ia, I pehea mai te kupu a Eriha ki a koe? Ano ra ko ia, E ki ana ia, tera koe e ora.
- 15
- Na, i te aonga ake ka mau ia ki te kakahu matotoru, toua ana e ia ki te wai: whakatakotoria iho e ia ki runga ki tona mata. Na, kua mate, a, ko Hataere hei kingi i muri i a ia.
- 16
- I te rima o nga tau o Iorama tama a Ahapa kingi o Iharaira, i a Iehohapata ano e kingi ana ki a Hura, ka kingi ano hoki a Iehorama tama a Iehohapata kingi o Hura.
- 17
- E toru tekau ma rua ona tau i a ia ka kingi nei, a, e waru nga tau i kingi ai ia ki Hiruharama.
- 18
- Na, haere ana ia i te ara o nga kingi o Iharaira: pera tonu tana me nga mahi a te whare o Ahapa; i a ia hoki te tamahine a Ahapa hei wahine: kino iho tana mahi ki te titiro mai a Ihowa.
- 19
- Heoi kihai a Ihowa i pai ki te whakangaro i a Hura; i whakaaro hoki ki tana pononga ki a Rawiri, ki tana hoki i ki ai ki a ia, ka hoatu he rama ki a ia, ratou ko ana tamariki i nga ra katoa.
- 20
- I ona ra ka maunu mai a Eroma i raro i te ringa o Hura, a, whakakingitia ake e ratou he kingi mo ratou.
- 21
- Na, haere atu ana a Iorama ki Tairi; i a ia ano hoki nga hariata katoa. Na, whakatika ana ia i te po, a, patua iho e ia nga Eromi i karapotia ai ia, ratou ko nga rangatira o nga hariata, a, rere ana taua iwi ki tona teneti, ki tona teneti.
- 22
- Otiia i maunu mai ano nga Eromi i raro i te ringa o Hura, a, tae noa ki tenei ra. I taua wa ano hoki ka maunu mai ano a Ripina.
- 23
- Na, era atu meatanga a Iorama, me ana mahi katoa, kahore ianei i tuhituhia ki roto ki te pukapuka o nga meatanga o nga ra o nga kingi o Hura?
- 24
- Na, kua moe a Iorama ki ona mātua, a, tanumia iho ki ona mātua ki roto ki te pa o Rawiri; a, ko Ahatia ko tana tama te kingi i muri i a ia.
- 25
- Na, i te tekau ma rua o nga tau o Iorama tama a Ahapa kingi o Iharaira ka kingi a Ahatia tama a Iehorama kingi o Hura.
- 26
- E rua tekau ma rua nga tau o Ahatia i a ia ka kingi nei; a, kotahi ona tau i kingi ai ia ki Hiruharama. Na, te ingoa o tona whaea ko Ataria, he tamahine na Omori kingi o Iharaira.
- 27
- Na, haere ana ia i te ara o te whare o Ahapa, a, mahia ana e ia te kino ki te titiro a Ihowa, pera tonu tana me ta te whare o Ahapa; he hunaonga hoki ia no te whare o Ahapa.
- 28
- Na, haere ana ia hei hoa mo Iorama tama a Ahapa ki te whawhai ki a Hataere kingi o Hiria ki Ramoto-kireara. Na, kua tu a Iorama i nga Hiriani.
- 29
- Na, hoki ana a kingi Iorama ki Ietereere kia rongoatia nga tūnga, i tu ai ia i nga Hiriani ki Rama, i tana whawhaitanga ki a Hataere kingi o Hiria; a ka haere mai a Ahatia tama a Iehorama kingi o Hura ki raro kia kite i a Iorama tama a Ahapa ki Ietereere; no te mea e mate ana ia.
Address: 
Phone: 
Email: