- 1
- Na, muri iho i te matenga o Haora, i te mea kua hoki mai a Rawiri i te patunga i nga Amareki, a ka rua nga ra o Rawiri e noho ana ki Tikiraka;
- 2
- I te toru o nga ra, na, ko tetahi tangata e haere mai ana i te puni i a Haora, he mea haehae ona kakahu, he oneone ano hoki i runga i tona mātenga: a, tona taenga mai ki a Rawiri, na, ka hinga ia ki te whenua, piko iho ana.
- 3
- Na, ka mea a Rawiri ki a ia, I haere mai koe i hea? A ka mea mai tera ki a ia, I mawhiti mai ahau i roto i te puni o Iharaira.
- 4
- Ano ra atu ko Rawiri ki a ia, I pehea te mea ra? tena, korerotia mai ki a au. Na, ka mea mai ia, Kua whati te iwi i te whawhaitanga, he tokomaha ano hoki o te iwi i hinga, i mate; kua hinga ano hoki a Haora raua ko tana tama ko Honatana.
- 5
- Ano ra atu ko Rawiri ki te tamaiti nāna nei i korero ki a ia, I mohiotia e koe ki te aha kua mate a Haora raua ko tana tama ko Honatana.
- 6
- Na, ko te meatanga mai a taua tamaiti nāna nei i korero ki a ia, I runga ahau i Maunga Kiripoa, he tu noa iho, na, ko Haora e okioki atu ana ki tana tao, me te whai tata ano nga hariata, me nga kai eke hoiho, i a ia.
- 7
- Na, tona tahuritanga ki muri, ka kite i a au, a ka karanga ki a au. Katahi ahau ka mea atu, Tenei ahau.
- 8
- Ano ra ko ia ki a au, Ko wai koe? Ano ra atu ko ahau ki a ia, He Amareki ahau?
- 9
- Na, ko tana meatanga mai ki a au, Tena, e tu ki runga ki a au, whakamatea hoki ahau; mau pu hoki ahau i te pouri, e toitu ana hoki te ora i roto i a au.
- 10
- Na, tu ana ahau ki runga i a ia, whakamatea ana ia e ahau; i mohio hoki ahau e kore ia e ora ake i te mea ka hinga nei ia. Na, tangohia mai ana e ahau te karauna i runga i tona mātenga, me nga poroporo i tona ringaringa, a kawea mai ana e ahau ki konei ki toku ariki.
- 11
- Na, kua mau a Rawiri ki ona kakahu, haea ana e ia. I pera ano ona hoa katoa.
- 12
- Na, ka uhunga ratou, ka tangi, ka noho puku, a ahiahi noa, mo Haora, mo tana tama mo Honatana, mo te iwi ano hoki o Ihowa, mo te whare ano hoki o Iharaira, i hinga nei i te hoari.
- 13
- Na, ko te meatanga atu a Rawiri ki te tamaiti nāna nei i korero ki a ia, No hea koe? Ano ra ko tera, He tama ahau na tetahi manene, na tetahi Amareki.
- 14
- Ano ra ko Rawiri ki a ia, He aha koe tē wehi ai? he aha i totoro atu ai tou ringa ki te huna i ta Ihowa i whakawahi ai?
- 15
- Katahi a Rawiri ka karanga atu ki tetahi o ona taitamariki, ka mea atu, Whakatata atu, e rere ki runga ki a ia. Na, patua ana ia e ia, mate ake.
- 16
- I mea ano hoki a Rawiri ki a ia, Hei runga i tou mātenga ou toto; kua whakaatu mai na hoki tou waha i tou he, kua mea, Naku i whakamate ta Ihowa i whakawahi ai.
- 17
- Katahi ka waiatatia e Rawiri tenei apakura mo Haora raua ko tana tama ko Honatana:
- 18
- (I mea hoki kia whakaakona nga tamariki a Hura ki te waiata o te kopere: e mau na te tuhituhi ki te pukapuka, ki a Iahera.)
- 19
- Tukitukia ana te ataahua o Iharaira ki runga ki ou wahi teitei, Ano te hinganga o nga marohirohi!
- 20
- Kaua e korerotia ki Kata; kaua e kauwhautia ki nga huarahi o Ahakerono; kei koa nga tamahine a nga Pirihitini, kei whakamanamana nga tamahine a te kokoti-kore.
- 21
- E nga maunga o Kiripoa, kati rawa he tomairangi mo koutou, he ua, he mara ano hoki e tukua ai te whakahere; i akiritia hoki ki reira te pukupuku o nga marohirohi, te pukupuku o Haora, me te mea kihai i whakawahia ki te hinu.
- 22
- He toto tena, no te hunga i tu, he ngako tena, no nga marohirohi, kahore he whakahokinga mai mo te kopere a Honatana, kihai ano te hoari a Haora i hoki kau mai.
- 23
- Ko Haora, ko Honatana, he aroha, he whakaahuareka i to raua oranga; kihai hoki i wehea i to raua matenga; nui atu to raua tere i to nga ekara, to raua kaha i to nga raiona.
- 24
- E nga tamahine a Iharaira, tangihia a Haora, nāna nei o koutou kakahu ngangana, me era mea papai, nāna nei i piri ai nga whakapaipai koura ki o koutou weruweru.
- 25
- Ano te hinganga o nga marohirohi i waenganui o te tatauranga! ou e Honatana i werohia na i runga i ou wahi teitei.
- 26
- Mamae ana ahau, he whakaaro ki a koe, e taku tuakana, e Honatana; nui whakaharahara taku whakaahureka ki a koe: he hanga whakamiharo tou aroha ki a au, nui atu i to nga wahine aroha.
- 27
- Ano te hinganga o nga marohirohi! na, moti iho nga patu o te pakanga.
Address: 
Phone: 
Email: