- 1
- A, te takanga o te tau, te wa ano e haere ai nga kingi ki te whawhai, na, ka ungā e Rawiri a Ioapa ratou ko ana tangata, ko Iharaira katoa ano hoki; a, hunā iho e ratou nga tamariki a Amona, whakapaea ana hoki e ratou a Rapa. Ko Rawiri ia i noho ki Hiruharama.
- 2
- A, i te mea ka ahiahi, na, ka maranga ake a Rawiri i tona moenga, a, haereere ana i runga i te tuanui o te whare o te kingi: na, ka kitea iho e ia i runga i te tuanui tetahi wahine e horoi ana i a ia; a, he ataahua rawa te wahine ki te titiro atu.
- 3
- Katahi ka tono tangata atu te kingi, a, uia ana e ia taua wahine. Na, ko te meatanga mai, Ehara ianei tenei i a Pate-hepa tamahine a Eriama, he wahine na Uria Hiti.
- 4
- Na, ka ungā etahi tangata e Rawiri ki te tiki i a ia; a ka haere mai ia ki a ia; a takoto tahi ana raua; (kua oti hoki tona poke te pure,) hoki ana ki tona whare.
- 5
- Na, ka hapu te wahine, a ka tono tangata mai ki a Rawiri, ka mea, E hapu ana ahau.
- 6
- Katahi a Rawiri ka tono tangata atu ki a Ioapa, ka mea, Tena a Uria te Hiti tonoa mai ki a au. Na, tonoa mai ana e Ioapa a Uria ki a Rawiri.
- 7
- A, te taenga mai o Uria ki a ia, na, ka ui a Rawiri ki te pai o Ioapa, ki te pai o te iwi, ki te pai o te whawhai.
- 8
- Katahi a Rawiri ka mea ki a Uria, Haere ki raro ki tou whare ki te horoi i ou waewae. Na, ka puta mai a Uria i roto i te whare o te kingi; a, i maua mai ano hoki i muri i a ia tetahi wahi kai a te kingi.
- 9
- Heoi moe ana a Uria ki te tatau o te whare o te kingi i roto i nga tangata katoa a tona ariki, kihai hoki i haere ki raro ki tona whare.
- 10
- A ka korerotia mai te korero ki a Rawiri, Kihai a Uria i haere ki raro ki tona whare, na, ka mea a Rawiri ki a Uria, He teka ianei i te haere koe, a katahi ka tae mai? he aha koe tē haere ai ki raro ki tou whare?
- 11
- Na, ko te meatanga mai a Uria ki a Rawiri, Kei roto te aaka i te tihokahoka, me Iharaira ano hoki ratou ko Hura; kei te mata ano o te parae toku ariki a Ioapa ratou ko nga tangata a toku ariki e noho ana; a, kia haere koia ahau ki toku whare ki te kai, ki te inu, ki te takoto ki taku wahine? E ora ana koe, e ora ana hoki tou wairua, e kore tenei mea e meatia e ahau.
- 12
- Na, ka mea a Rawiri ki a Uria, E noho koe ki konei i tenei ra ano hoki, a, apopo ahau unga ai i a koe. Na, noho ana a Uria i taua rangi, i te aonga ake ano hoki, ki Hiruharama.
- 13
- Na, ka karangatia ia e Rawiri, a, kai ana tera ki tona aroaro, inu ana, a haurangi ana: a, i te ahiahi ka puta mai ki waho ki te takoto ki tona takotoranga i roto i nga tangata a tona ariki, kihai ano hoki i haere ki raro ki tona whare.
- 14
- Na, i te ata ka tuhituhia he pukapuka e Rawiri ki a Ioapa, a, tonoa ana kia kawea e Uria.
- 15
- I tuhituhi hoki ia ki te pukapuka, i mea, Tena a Uria hoatu ki mua rawa, ki te wahi e nui rawa ana te whawhai, ka hoki mai ai i muri i a ia, kia patua ai ia, kia mate ai.
- 16
- Na, i a Ioapa e whakapae ana i te pa, ka hoatu e ia ki a Uria te wahi i mohio ai ia kei reira nga tangata toa.
- 17
- A, te putanga mai o nga tangata o te pa ki te whawhai ki a Ioapa, na, ka hinga etahi o te iwi, no nga tangata a Rawiri; a, i mate ano hoki a Uria Hiti.
- 18
- Katahi a Ioapa ka tono tangata mai hei korero ki a Rawiri i nga mea katoa o te whawhaitanga.
- 19
- A, i ako ano ia i te karere, i mea, E poto i a koe nga mea katoa o te whawhaitanga te korero ki te kingi;
- 20
- Na, ki te ara te riri a te kingi, a ka mea ia ki a koe, He aha koutou i whakatata rawa ai ki te pa tatau ai? kahore ianei koutou i mohio ka kopere mai ratou i te taiepa?
- 21
- Na wai a Apimereke te tama a Ierupehete i patu? he teka ianei na te wahine i maka he maramara no te kohatu huri ki runga ki a ia i runga i te taiepa, a, mate iho ia ki Tepehe? he aha koutou i whakatata atu ai ki te taiepa? Katahi koe ka mea atu, Kua mate ano hoki to pononga a Uria Hiti.
- 22
- Na, haere mai ana te karere, a ka tae mai, korerotia ana e ia ki a Rawiri nga mea katoa i ungā mai ai ia e Ioapa.
- 23
- I mea hoki te karere ki a Rawiri, I kaha rawa mai aua tangata ki a matou, a, puta mai ana ki a matou ki te parae. Na, whakaekea atu ana ratou e matou, a, tae noa ki te kuwaha o te keti.
- 24
- Na, ko te koperenga mai a nga kai kopere i runga i te taiepa ki o tangata, mate iho etahi o nga tangata a te kingi; me to pononga ano hoki me Uria Hiti kua mate.
- 25
- Na, ko te meatanga mai a Rawiri ki te karere, Kia penei to ki atu ki a Ioapa, Kei he tenei mea ki to whakaaro iho, he kai noa iho hoki ta te hoari i tetahi, i tetahi: kia kaha to whawhai ki te pa, whakangaromia ano hoki. Mau ano hoki ia e whakatenatena.
- 26
- A, te rongonga o te wahine a Uria kua mate tona tahu a Uria, na, ka tangihia e ia tona tahu.
- 27
- A ka pahemo te tangihanga, na, ka tono tangata a Rawiri ki te tiki i a ia ki tona whare, a ka waiho hei wahine mana, a ka whanau ta raua tama. Otiia i kino ki ta Ihowa titiro iho taua mea i mea ai a Rawiri.
Address: 
Phone: 
Email: