- 1
- Na, ka tonoa mai a Natana e Ihowa ki a Rawiri: a, tona taenga mai ki a ia, ka mea ki a ia, Tokorua nga tangata i roto i te pa kotahi; he taonga o tetahi, he rawa-kore tetahi.
- 2
- He tini noa iho nga hipi, me nga kau a te tangata taonga:
- 3
- Hore rawa ia he mea a te rawa-kore; kotahi ano te reme, he mea nohinohi, he mea hoko, he mea whakatupu ake nāna; a, i a ia, ratou ko ana tamariki, taua reme, e neke ake ana ki te katua; e kai ana i tana kongakonga, e inu ana i roto i tana pāta; i takoto ki tona uma, a, ki a ia, e rite ana ki te tamahine.
- 4
- Na, kua tae mai he pahi ki te tangata taonga, a ka manawapa tera ki te tango i tetahi o ana hipi, o ana kau, kia takā ma te manuhiri i haere mai ki a ia; heoi tangohia ana e ia te reme a te tangata rawa-kore, takā ana e ia ma te tangata i haere mai nei ki a ia.
- 5
- Te tino muranga o te riri a Rawiri ki taua tangata, ka mea ki a Natana, E ora ana a Ihowa, ka mate te tangata nana tenei mahi.
- 6
- Ko te reme hoki, kia wha ana e homai ai e ia hei utu; mona i mea i tenei mea, mona hoki kihai i whai whakaro.
- 7
- Na, ko te meatanga mai a Natana ki a Rawiri, Taua tangata ra, ko koe. Ko te kupu tenei a Ihowa a te Atua a Iharaira, Naku koe i whakawahi hei kingi mo Iharaira, naku hoki koe i whakaora i roto i te ringa o Haora:
- 8
- A, hoatu ana e ahau te whare o tou ariki ki a koe, me nga wahine a tou ariki ki tou uma: i hoatu ano e ahau te whare o Iharaira raua ko Hura ki a koe; a, me i iti tenei, kua tapiritia e ahau era atu ano mea maū.
- 9
- He aha koe i whakahawea ai ki te kupu a Ihowa? i mea ai i tenei kino i tana tirohanga? Ko Uria Hiti i patua e koe ki te hoari, a, tangohia ana tana wahine hei wahine mau; ko ia hoki tukitukia ana e koe ki te hoari a nga tamariki a Amona.
- 10
- Na, e kore te hoari e whakakorea atu aianei i roto i tou whare, a ake, ake, ake; mou i whakahawea ki a au, i tango hoki i te wahine a Uria Hiti hei wahine maū.
- 11
- Ko te kupu tenei a Ihowa, Nana, ka whakaara tenei ahau i te kino mou i roto i tou whare, ka tango ano hoki i o wahine i to tirohanga, a ka hoatu ki tou hoa, na, ka takotoria e ia o wahine i te tirohanga a tenei ra.
- 12
- I meatia pukutia hoki tenei mea e koe: ko au ia ka mea i tenei mea i te aroaro o Iharaira katoa, i mua ano hoki i te ra.
- 13
- Na, ko te meatanga mai a Rawiri ki a Natana, Kua hara ahau ki a Ihowa. A ka mea a Natana ki a Rawiri, Kua kauparea atu ano hoki tou hara e Ihowa; e kore koe e mate.
- 14
- Otiia hei take nei koe, ara tenei mea, e kohukohu ai nga hoa riri o Ihowa, mo reira ka tino mate rawa to tamaiti ka whanau nei.
- 15
- Na, haere ana a Natana ki tona whare: a ka pangia e Ihowa te tamaiti a Rawiri i whanau nei i te wahine a Uria; he nui te mate.
- 16
- Na, ka inoi a Rawiri ki te Atua mo taua tamaiti; a, noho puku ana a Rawiri i te kai, haere ana ki roto, pau noa taua po e takoto ana i te whenua.
- 17
- Na, ka whakatika mai nga kaumatua o tona whare ki a ia, ki te whakaara i a ia i te whenua: heoi kihai ia i pai, kihai hoki i kai i ta ratou taro.
- 18
- Na, i te whitu o nga ra ka mate te tamaiti. A ka wehi nga tangata a Rawiri ki te korero ki a ia kua mate te tamaiti: i mea hoki ratou, Na, i te mea e ora ana te tamaiti, i korero tatou ki a ia, a, kihai ia i whakarongo ki to tatou reo: na, tera noa ake te kino e mea ai ia ki a ia, ki te korerotia e tatou ki a ia te matenga o te tamaiti.
- 19
- A, i kite a Rawiri i ana tangata e kowhetewhete ana ki a ratou ano, a ka mohio a Rawiri kua mate te tamaiti. Na, ka mea a Rawiri ki ana tangata, Kua mate ranei te tamaiti? A ka mea ratou, Kua mate.
- 20
- Katahi ka whakatika ake a Rawiri i te whenua, ka horoi i a ia, ka whakawahi i a ia, ka tango ke mai ano hoki i etahi kakahu mona; a, haere ana ki te whare o Ihowa ki te koropiko. Na, haere ana ia ki tona whare. Katahi ka tonoa atu e ia, a ka whakatakotoria e ratou he taro māna, a, kai ana ia.
- 21
- Katahi ka mea mai ana tangata ki a ia, He aha tenei mea i mea nei koe? I noho puku koe, a, tangihia ana e koe te tamaiti i a ia e ora ana: te matenga o te tamaiti, na, whakatika ana koe ki te kai taro mau.
- 22
- Ano ra ko ia, i te tamaiti ano e ora ana, i noho puku ahau, i tangi: i mea hoki, Ko wai ka tohu? Tera pea a Ihowa ka aroha ki a au, a ka ora te tamaiti.
- 23
- Ko tenei ka mate nei ia, kia noho puku ahau hei aha? E taea ranei ia e ahau te whakahoki mai? Ko ahau e haere ki a ia, na, e kore ia e hoki mai ki a au.
- 24
- Na, ka whakamarie a Rawiri i tana wahine i a Pate-hepa, a, haere ana ki roto ki a ia, takoto tahi ana raua; a ka whanau ano ia, he tamaiti, huaina iho tona ingoa ko Horomona; a, i aroha a Ihowa ki a ia.
- 25
- I tono mai hoki i a Natana poropiti, hei hua i tona ingoa, Ko Teriria; he whakaaro hoki ki a Ihowa.
- 26
- A, i whawhai ano a Ioapa ki Rapa o nga tamariki a Amona; a, horo ana i a ia te pa kingi.
- 27
- Katahi a Ioapa ka tono tangata mai ki a Rawiri, ka mea, Kua tauria a Rapa e ahau, kua horo ano hoki te pa o nga wai.
- 28
- Na, huihuia mai te nuinga o te iwi ki te whakapae i te pa, kia riro ai i a koe: kei riro mai te pa i a au, a, noku te ingoa e karangatia ki reira.
- 29
- Na, huihuia ana te iwi katoa e Rawiri, a, haere ana ki Rapa; na, tauria ana a reira e ia, a, riro ana i a ia.
- 30
- Tangohia mai ana e ia te karauna o to ratou kingi i tona mātenga, tona taimaha kotahi taranata koura ki te huia atu ki nga kohatu utu nui; a, potaea iho ki te mātenga o Rawiri. I whakaputaina mai ano hoki e ia nga taonga o te pa, tona tini noa iho.
- 31
- Na, nga tangata i roto, whakaputaina mai ana e ia ki waho, a, meinga ana ki nga kani, ki nga harou rino, ki nga toki rino; i meinga ano hoki ratou kia tika na roto i te tahunga kotakota. Ko tana hoki tenei i mea ai ki nga pa katoa o nga tamariki a Amona. Na, hoki ana a Rawiri ratou ko te iwi katoa ki Hiruharama.
Address: 
Phone: 
Email: