- 1
- Na, ka mura ano hoki te riri a Ihowa ki a Iharaira, a ka whakahihiri i a Rawiri ki te he mo ratou, ki te mea, Tikina, taua a Iharaira raua ko Hura.
- 2
- Na, ko te kianga atu a te kingi ki a Ioapa ki te rangatira ope, ko tona hoa hoki ia, Tena, haereerea nga iwi katoa o Iharaira, o Rana mai ano, a tae noa ki Peere-hepa, ka tatau i te iwi, kia mohio ai ahau ki te tokomahatanga o te iwi.
- 3
- Ano ra ko Ioapa ki te kingi, Ma Ihowa ma tou Atua e tapiri mai a muri o tona iwi ki nga rau e rite ana ki a ratou e noho nei, me te titiro ano nga kanohi o toku ariki o te kingi: otiia he aha toku ariki te kingi i aro ai ki tenei mea?
- 4
- Heoi u tonu te kupu a te kingi ki Ioapa, ratou ko nga rangatira ope. Na, haere ana a Ioapa ratou ko nga rangatira ope i te aroaro o te kingi ki te tatau i te iwi i a Iharaira.
- 5
- Na, to ratou whitinga i Horano, ka noho ki Aroere, ki te taha ki matau o te pa i waenganui o te awa o Kara, ki te taha ano hoki ki Iatere:
- 6
- Na, ka tae mai ki Kireara, ki te whenua ano hoki o Tahatimihorohi, a ka tae ki Rana-iaana, awhio haere ana ki Hairona.
- 7
- A, tae atu ana ki te pa kaha ki Taira, ki nga pa katoa ano hoki o nga Hiwi, o nga Kanaani: a, puta tonu atu ki te taha ki te tonga o Hura, ki Peere-hepa.
- 8
- A ka oti te whenua katoa te haere e ratou, ka tae mai ratou ki Hiruharama i te mutunga o nga marama e iwa o nga ra ano hoki e rua tekau.
- 9
- Na, ka homai e Ioapa te tokomahatanga o te iwi i taua ki te kingi: a, e waru rau mano nga tangata marohirohi o Iharaira, he hunga unu hoari; na, e rima rau mano nga tangata o Hura.
- 10
- Na, ka whakawiri te ngakau o Rawiri i muri iho i tana tauanga i te iwi. A ka mea a Rawiri ki a Ihowa, Nui atu toku hara i taku i mea ai: na, tena, kia whakarerea noatia iho, e Ihowa, te he o to pononga, nui whakaharahara hoki toku kuaretanga.
- 11
- I te marangatanga ake hoki o Rawiri i te ata, kua puta mai te kupu a Ihowa ki a Kara poropiti, ki ta Rawiri matakite; i ki ia,
- 12
- Haere, mea atu ki a Rawiri, Ko te kupu tenei a Ihowa, E toru enei pikaunga aku mau, whiriwhirihia tetahi o enei mau, a ka meatia e ahau ki a koe.
- 13
- Na, te taenga mai o Kara ki a Rawiri, ka korero ki a ia, ka mea ki a ia, Kia tae mai ki a koe etahi tau mate-kai e whitu ki tou whenua? kia toru ranei nga marama e rere ai koe i te aroaro o ou hoa riri, me ta ratou whai ano i a koe? kia toru ranei nga ra o te mate uruta ki tou whenua? Na, whakaaroa e koe kia kitea ai taku kupu e whakahoki atu ai ki taku kai tono mai.
- 14
- Ano ra ko Rawiri ki a Kara, Hē noa iho aku whakaaro: na, kia taka tatou ki roto ki te ringa o Ihowa, he nui hoki tona aroha; kaua hoki ahau e taka ki roto ki te ringa tangata.
- 15
- Na, whakapangia atu ana e Ihowa he mate uruta ki a Iharaira, o te ata iho ano, a, taea noatia te wa i whakaritea: a, mate ake o te iwi, o Rana a tae noa ki Peere-hepa, e whitu tekau mano tangata.
- 16
- A, te toronga o te ringa o te anahera ki Hiruharama whakangaro ai, ka puta ke ta Ihowa whakaaro mo te kino, a ka mea ki te anahera e whakangaro ana i te iwi, Kua nui: kati tou ringa: a, i te patunga witi a Arauna Iepuhi tera te anahera a Ihowa.
- 17
- Na, ka korero atu a Rawiri ki a Ihowa i tona kitenga i te anahera i patua ai te iwi, ka mea, Ko au tenei te mea i hara, naku hoki te mahi he: ko enei hipi ia, i aha ratou? Tena, kia pa tou ringa ki a au, ki te whare ano hoki o toku pāpā.
- 18
- Na, ka haere atu a Kara ki a Rawiri i taua ra, a ka mea ki a ia, Whakatika, whakaarahia he aata ki a Ihowa ki te patunga witi a Arauna Iepuhi.
- 19
- Na, whakatika ana a Rawiri, pera ana me te kupu a Kara, me ta Ihowa i whakahau ai.
- 20
- A, te tirohanga atu a Arauna, ka kite i te kingi ratou ko ana tangata e haere mai ana ki a ia: na, puta atu ana a Arauna, piko ana ki te kingi, ahu ana tona mata ki te whenua.
- 21
- Na, ka mea a Arauna, He aha toku ariki te kingi i haere mai ai ki tana pononga? Na, ko te meatanga a Rawiri, Ki te hoko i to patunga witi, kia hangā ai he aata ki a Ihowa, kia mutu ai te whiunga o te iwi.
- 22
- Katahi a Arauna ka mea ki a Rawiri, Me tango e toku ariki e te kingi, me whakaeke te mea e pai ana ki tana titiro iho, Nana, nga kau hei tahunga tinana, me nga patu witi, me nga mea o nga kau hei wahie.
- 23
- Te homaitanga o ena mea katoa e Arauna ki te kingi, me te mea na te kingi. I mea ano a Arauna ki te kingi, Kia manako mai a Ihowa tou Atua ki a koe.
- 24
- Na, ko te meatanga a te kingi ki a Arauna, Kahore, engari me ata hoko e ahau tou wahi ki te utu, e kore hoki e whakaherea e ahau he tahunga tinana utu-kore ki a Ihowa ki toku Atua. Na, hokona ana e Rawiri taua patunga witi me nga kau ki nga hiriwa, e rima tekau nga hekere.
- 25
- A hangā ana e Rawiri tetahi aata ki reira ma Ihowa, whakaekea ana e ia etahi tahunga tinana me etahi whakamarietanga: katahi ka marie mai a Ihowa ki te whenua, a ka mutu te whiu o Iharaira.
Address: 
Phone: 
Email: