- 1
- Katahi ka haere mai nga iwi katoa o Iharaira ki a Rawiri ki Heperona, a ka korero, ka mea, Tenei matou he wheua nou, he kikokiko nou.
- 2
- A, i mua ake nei, i te mea ko Haora to matou kingi, ko koe te kai kawe atu, te kai kawe mai i a Iharaira: kua korerotia ano hoki koe e Ihowa, Ko koe hei hepara mo toku iwi mo Iharaira, ko koe ano hoki hei tino tangata mo Iharaira.
- 3
- Na, ka haere mai nga kaumatua katoa o Iharaira ki te kingi ki Heperona, a ka whakaritea he kawenata e te kingi, e Rawiri, ki a ratou ki Heperona ki te aroaro o Ihowa: a, whakawahia ana e ratou a Rawiri hei kingi mo Iharaira.
- 4
- E toru tekau nga tau o Rawiri i tona meatanga hei kingi, a, e wha tekau nga tau i kingi ai ia.
- 5
- E whitu nga tau e ono nga marama i kingi ai ia i roto i a Hura ki Heperona: a, e toru tekau ma toru nga tau i kingi ai ia i roto i a Iharaira katoa raua ko Hura ki Hiruharama.
- 6
- Katahi ka haere te kingi ratou ko ana tangata ki Hiruharama ki nga Iepuhi e noho ana i taua whenua: na, ko ta ratou korerotanga mai ki a Rawiri, te kianga mai, E kore koe e tae mai ki konei, ki te kahore koe e pei i nga matapo, i nga totitoti: hua noa e kore e taea atu a reira e Rawiri.
- 7
- Heoi riro ana i a Rawiri te pourewa i Hiona; ko te pa hoki tera o Rawiri.
- 8
- I mea hoki a Rawiri i taua ra, Te tangata ka taea e ia te rerenga wai, a ka patua ano e ia nga Iepuhi, nga totitoti me nga matapo e kinongia nei e te wairua o Rawiri, hei tino tangata ia, hei rangatira; mo ratou i mea, ara, nga matapo me nga totitoti, E kore ia e tae mai ki te whare.
- 9
- Na, ka noho a Rawiri ki te pourewa, a karangatia ana a reira, Ko te pa o Rawiri. I hangā ano hoki e Rawiri, a tawhio noa; o Miro mai ano, a, haere whakaroto.
- 10
- Na, ka tino nui haere a Rawiri, i a ia ano a Ihowa te Atua o nga mano.
- 11
- Na, ka ungā mai he karere e Hirama kingi o Taira ki a Rawiri, me etahi rakau, he hita, me nga kai mahi rakau, me nga kai mahi o nga kohatu whare; a, na ratou i hanga he whare mo Rawiri.
- 12
- Na, ka mohio a Rawiri kua whakapumautia ia e Ihowa hei kingi mo Iharaira, kua whakanuia ano hoki tona kingitanga, he whakaaro hoki ki tona iwi ki a Iharaira.
- 13
- A, i tangohia ano hoki e Rawiri etahi wahine iti māna, me etahi wahine tupu i roto i Hiruharama, i muri iho i tona haerenga mai i Heperona. Na, ka whanau ano etahi tamariki me etahi tamahine ma Rawiri.
- 14
- Ko nga ingoa ano enei o ana i whanau ki Hiruharama, Ko Hamua, ko Hopapa, ko Natana, ko Horomona.
- 15
- Ko Ipihara, ko Erihua, ko Nepeke, ko Iapia,
- 16
- Ko Erihama, ko Eriara, ko Eriparete.
- 17
- A, te rongonga o nga Pirihitini kua whakawahia a Rawiri hei kingi mo Iharaira, na, ka haere mai nga Pirihitini katoa ki te rapu i a Rawiri, a ka rongo a Rawiri, na, haere ana ia ki te pourewa.
- 18
- Na, te haerenga mai o nga Pirihitini, ka wawa noa atu ki Raorao Repaima.
- 19
- Na, ka ui atu a Rawiri ki a Ihowa, ka mea, Me haere ranei ahau ki nga Pirihitini? E homai ranei ratou e koe ki toku ringa? Na, ko te meatanga mai a Ihowa ki a Rawiri, Haere, ka tino hoatu hoki e ahau nga Pirihitini ki tou ringa.
- 20
- Na, ko te haerenga o Rawiri ki Paara-peratimi, a, patua iho ratou i reira e Rawiri. Na, ka mea ia, Pakaru ana i a Ihowa oku hoa riri i toku aroaro, koia ano kei te pakaruhanga wai. No reira i karangatia ai te ingoa o taua wahi, ko Paara-peratimi.
- 21
- A, mahue ana i a ratou a ratou whakapakoko i reira, tahuna ake e Rawiri ratou ko ana tangata.
- 22
- Na, ka haere mai ano hoki nga Pirihitini, a ka wawa noa atu ki Raorao Repaima.
- 23
- Na, ka ui a Rawiri ki a Ihowa, a ka mea mai ia, Kaua e haere ki runga; engari me haere awhio atu ki muri i a ratou, ka puta mai ai ki a ratou i te ritenga mai o nga maperi.
- 24
- A ka rangona e koe he haruru haere i nga kouru o nga maperi, ko reira koe korikori ai; no te mea ko te haerenga atu tena o Ihowa i tou aroaro ki te patu i te ope o nga Pirihitini.
- 25
- Na, peratia ana e Rawiri me ta Ihowa i whakahau ai ki a ia; a, patua iho e ia nga Pirihitini i Kepa, a tae noa koe ki Katere.
Address: 
Phone: 
Email: