- 1
- Na, ka huihuia ano hoki e Rawiri te hunga whiriwhiri katoa o Iharaira, e toru tekau nga mano.
- 2
- A ka whakatika a Rawiri ratou ko tona nuinga katoa, haere atu ana i Paare o Hura, tikina atu ana e ia i reira ta te Atua aaka, tona ingoa e karangatia nei Ko te ingoa o Ihowa o nga mano, e noho nei i waenganui o nga kerupima.
- 3
- Na, ka whakanohoia e ratou te aaka a te Atua ki runga ki te kāta hou, a kawea mai ana i roto i te whare o Apinarapa i Kipea: a, na Uha raua ko Ahio, na nga tama a Apinarapa, i arahi te kāta hou.
- 4
- Heoi kawea mai ana e ratou i roto i te whare o Apinarapa i Kipea, me te haere tahi ano ratou ko te aaka a te Atua; a, i haere a Ahio i mua i te aaka.
- 5
- Katahi ka takaro a Rawiri ratou ko te whare katoa o Iharaira ki te aroaro o Ihowa, me te whakatangi ano i a ratou mea katoa, he kauri nei te rakau, i nga hāpa, i nga hatere, i nga timipera, i nga korenete, i nga himipora.
- 6
- A ka tae mai ratou ki te patunga witi a Nakono, ka totoro mai a Uha ki te aaka a te Atua, a, puritia ana e ia; i whakaoioia hoki e nga kau.
- 7
- Na, ka mura te riri o Ihowa ki a Uha, a, patua iho ia i reira e te Atua mo tona he, a mate ake i reira i te taha o te aaka a te Atua.
- 8
- Na, ka pouri a Rawiri mo te toreretanga i torere ai a Ihowa ki a Uha; na, karangatia ana taua wahi e ia, Ko Perete-uha, e mau nei ano a taea noatia tenei ra.
- 9
- Na, ka wehi a Rawiri i a Ihowa i taua ra, a ka mea, Ma te aha e tae ake ai te aaka a Ihowa ki a au.
- 10
- Heoi kihai a Rawiri i pai ki te tango mai i te aaka a Ihowa ki a ia ki roto ki te pa o Rawiri; na, kawea ketia ana e Rawiri ki te whare o Opere-eroma Kiti.
- 11
- E toru nga marama i noho ai te aaka a Ihowa ki te whare o Opere-eroma Kiti: a ka manaakitia e Ihowa a Opere-eroma ratou ko tona whare katoa.
- 12
- A ka korerotia te korero ki a Kingi Rawiri, Kua manaakitia e Ihowa te whare o Opere-eroma, ratou ko ana mea katoa, he whakaaro ki te aaka a te Atua, na, ka haere a Rawiri, a kawea ana e ia te aaka a te Atua ki runga, i roto i te whare o Opere-eroma ki te pa o Rawiri, me te koa ano ia.
- 13
- A ka ono nga hikoinga i hikoi nga kai amo i te aaka a Ihowa, na, ka patua e ia etahi kau me etahi mea momona.
- 14
- Na, ka whakapaua katoatia tona kaha e Rawiri ki te kanikani ki te aroaro o Ihowa: i whitikiria ano hoki he epora rinena ki a Rawiri.
- 15
- Na, kawea mai ana te aaka a Ihowa e Rawiri ratou ko te whare katoa o Iharaira, me te hamama ano ratou, me te tangi ano hoki te tētere.
- 16
- A, te taenga mai o te aaka a Ihowa ki te pa o Rawiri, na, ka titiro mai a Mikara te tamahine a Haora na te matapihi, a ka kite i a Kingi Rawiri e tupekepeke ana, e kanikani ana i te aroaro o Ihowa; a whakahawea ana ki a ia i roto i tona ngakau.
- 17
- Na, ka kawea mai e ratou te aaka a Ihowa, a, whakaturia ana ki tona wahi, ki waenganui o te tapenakara i whakaarahia e Rawiri mona: katahi ka whakaekea atu e Rawiri etahi tahunga tinana ki te aroaro o Ihowa, me etahi whakamarietanga.
- 18
- A ka mutu ta Rawiri whakaeke i nga tahunga tinana me nga whakamarietanga, na, ka manaakitia e ia te iwi i runga i te ingoa o Ihowa o nga mano.
- 19
- A, i tuwhaina ano e ia ma te iwi katoa, ma te huihui katoa o Iharaira, ma te tane, ma te wahine, kotahi keke taro ma tenei, ma tenei, me tetahi wahi kikokiko, me tetahi oko waina. Na, haere ana te iwi katoa ki tona whare, ki tona whare.
- 20
- Na, hoki ana a Rawiri ki te manaaki i tona whare. A ka puta mai a Mikara te tamahine a Haora ki te whakatau i a Rawiri, a ka mea, Ano te kororia o te kingi o Iharaira inaianei, i whakakite nei i a ia inaianei ki te tirohanga o nga pononga wahine a ana tangata, i rite tonu nei ki tetahi o te hunga wairangi e whakakite nui ana i a ia!
- 21
- Na, ko te meatanga atu a Rawiri ki a Mikara, I te aroaro ra o Ihowa, i whiriwhiri nei i a au, i kape nei i tou pāpā, i tona whare katoa ano hoki, i whakarite hoki i a au hei rangatira mo te iwi o Ihowa, mo Iharaira; koia ahau i takaro ai ki te aroaro o Ihowa.
- 22
- A ka nui atu ano i tenei toku wairangi, ka iti iho ano hoki ahau ki taku titiro iho; a, nga pononga wahine i kiia mai na e koe, ka whakahonoretia ahau e ratou.
- 23
- Na, kore ake he tamariki ma Mikara tamahine a Haora, a taea noatia te ra i mate ai.
Address: 
Phone: 
Email: