- 1
- Te taenga mai o Petuha ki te kawanatanga, ka toru nga ra, ka haere atu ia i Hiharia ki Hiruharama.
- 2
- Na, ka korero atu te tohunga nui, me nga rangatira o nga Hurai ki a ia mo Paora, ka tohe ki a ia,
- 3
- Kia whakaaetia ta ratou mona, kia tikina atu ia ki Hiruharama, he whanga hoki ta ratou mona kia whakamatea ki te ara.
- 4
- Na, ka whakahokia atu e Petuha, me pupuri a Paora ki Hiharia, e hohoro ana hoki tona haere ki reira.
- 5
- I mea ano ia, Me haere tahi ano ki raro nga mea o koutou e watea ana, ki te whakawa i taua tangata, ki te mea he kino tana.
- 6
- A ngahuru noa atu nga ra i noho ai ia ki a ratou, ka haere ia ki Hiharia; ao ake te ra ka noho ki runga ki te nohoanga whakawa, a ka mea kia arahina mai a Paora.
- 7
- Na, kua tae mai ia, kua tu hoki nga Hurai i haere mai i Hiruharama, he maha he nui nga hē i whakapangia e ratou ki a Paora; heoi kihai i u ta ratou.
- 8
- A ka utua e ia, Kahore rawa oku hara ki te ture a nga Hurai, kahore ki te t emepara, kahore ano hoki ki a Hiha.
- 9
- Heoi ka mea a Petuha kia manawarekatia nga Hurai, a ka ki atu ki a Paora, ka mea atu, E pai ana koe kia haere ki Hiruharama, ki reira whakawakia ai mo enei mea ki toku aroaro?
- 10
- Ano ra ko Paora, E tu ana ahau ki te whakawakanga o Hiha, ko te wahi tika tenei hei whakawakanga moku: kahore aku hē ki nga Hurai, kua tino kitea na hoki e koe.
- 11
- Me he hē toku, a kua meinga e ahau tetahi mea e tika ai te mate, e kore ahau e kino kia mate: tena ko tenei teka kau nga mea e whakawakia nei ahau e ratou, e kore e ahei kia tukua ahau ki a ratou e te tangata. He karanga tenei naku ki a Hiha.
- 12
- Na, ka korerorero a Petuha ki te runanga, ka mea, Kua karanga koe ki a Hiha? me haere ano koe ki a Hiha.
- 13
- A muri iho i etahi ra, ka tae mai a kingi Akaripa raua ko Pereniki ki Hiharia, ki te oha atu ki a Petuha.
- 14
- A ka po maha raua e noho ana i reira, ka korerotia atu e Petuha ki te kingi nga meatanga ki a Paora, ka mea, Tenei tetahi tangata kua waiho e Pirika e here ana:
- 15
- A, taku taenga atu ki Hiruharama, ka korerotia mai ia e nga tohunga nui, ratou ko nga kaumatua o nga Hurai, ka tono ratou kia whakawakia ia.
- 16
- Na, ko taku whakahokinga atu ki a ratou, Ehara i te ritenga na nga tāngata o Roma kia tukua he tangata kia mate, i te mea kiano i tutataki noa te tangata e whakawakia ana ki nga kai whakawa, me tuku ano ia ki te whakahoki kupu atu ki te kupu whakawa.
- 17
- A, to ratou whakaminenga ki konei, kihai ahau i whakaroa; ao ake te ra ka noho ahau ki runga ki te nohoanga whakawa, ka mea atu kia arahina mai taua tangata.
- 18
- A, te turanga o nga kai whakawa, kihai tetahi hē o aku i whakaaro ai i korerotia mai e ratou mona:
- 19
- Heoi he kupu tautohenga no ta ratou karakia ta ratou i mea ai ki a ia, ko tetahi Ihu ano hoki i mate, a e kiia ana e Paora kei te ora.
- 20
- Heoi pohewa noa iho ahau ki taua tautotohenga, a ka mea atu me kore ia e pai kia haere ki Hiruharama, ki reira whakawakia ai mo aua mea.
- 21
- A, te karangatanga a Paora kia waiho ia kia whakarangona tana e Akuhata, ka mea ahau kia waiho ia, kia tonoa ra ano ki a Hiha.
- 22
- Ka mea a Akaripa ki a Petuha, E hiahia ana ahau kia rongo i ta tera tangata. Ka mea ia, Ko apopo koe rongo ai ki a ia.
- 23
- I te aonga ake ka tae atu a Akaripa raua ko Pereniki, me nga whakapaipai maha, a tomo ana ki roto ki te whare whakarongo, ratou ko nga rangatira mano, ko nga tāngata nunui o te pa, a ka kiia atu e Petuha, ka mauria mai a Paora.
- 24
- Na, ko te kianga mai a Petuha, E kingi Akaripa, e koutou katoa e noho nei tatou, ka kite koutou i tenei tangata i tohe mai ai ki a au te huihui katoa o nga Hurai i Hiruharama, i konei ano hoki, i karanga ai, Ehara rawa i te tika kia waiho ia i te ora.
- 25
- A, taku kitenga kahore ana mahi e tika ai te mate, a ka karanga ano ia ki a Akuhata, ka mea ahau kia ungā atu ia.
- 26
- Kahore ia aku tino mea e tuhituhi atu ai ahau mona ki taku ariki. Koia ahau ka arahi mai nei i a ia ki a koutou, ki a koe rawa ano hoki, e kingi Akaripa, kia whai mea ai ahau hei tuhituhinga atu, ua mutu te uiui.
- 27
- Ki taku hoki he mea hē kia ungā atu he herehere, a kia kaua e korerotia te mea i whakawakia ai ia.
Address: 
Phone: 
Email: