- 1
- Na, ko te meatanga atu a Akaripa ki a Paora, Tena korerotia o korero. Katahi ka totoro atu te ringaringa o Paora, a korero ia:
- 2
- He koanga ngakau tenei ki a au, e kingi Akaripa, kia korerotia e ahau ki a koe aianei nga mea katoa e whakawakia nei ahau e nga Hurai:
- 3
- He mohio rawa hoki koe ki nga ritenga katoa me nga tautohenga a nga Hurai: tena koa, whakarongo marie mai ki a au.
- 4
- E mohio ana nga Hurai katoa ki taku whakahaere o taku tamarikitanga ake, no te oroko timatanga ra ano i roto i toku iwi i Hiruharama;
- 5
- Mohio tonu ratou ki a au o mua iho, me i pai ratou ki te whakaatu, taku mahi, no ta te titorehanga pakeke rawa o ta tatou karakia, no ta nga Parihi.
- 6
- Tenei ahau te tu nei, te whakawakia nei mo te tumanakotanga atu ki te mea i korerotia e te Atua i mua ki o tatou mātua:
- 7
- Ko te uru ano hoki ki tenei ta o tatou iwi kotahi tekau ma rua e tumanako atu nei, i a ratou e mahi tonu nei ki te Atua i te ao i te po. Ko tenei, e kingi Akaripa, e tumanakohia atu nei, te mea e whakawakia nei ahau e nga Hurai.
- 8
- Koia, ki ta koutou e kore e whakaponohia ta te Atua whakaarahanga i te hunga mate?
- 9
- Ko ahau nei, i whakaaro ano ahau ko te mea tika kia maha nga mea e mahia e ahau hei pehi mo te ingoa o Ihu o Nahareta.
- 10
- Ae, i meinga ano tenei e ahau ki Hiruharama: he tokomaha ano hoki te hunga tapu i uakina atu e ahau ki roto ki nga whare herehere, he mea tuku mai hoki nga tikanga na nga tohunga nui ki a au; a ka whakamatea ratou, i te whakaae ano ahau.
- 11
- He maha ano hoki aku whiunga i a ratou i roto i nga whare karakia katoa, i meinga ano ratou e ahau kia kohukohu; heoi haurangi noa iho ahau ki a ratou, whaia ana e ahau, a taea noatia nga pa o tawhiti.
- 12
- Nawaia, i a au e haere ana ki Ramahiku, me nga tikanga me te kupu whakaae a nga tohunga nui,
- 13
- I te poutumarotanga, e te kingi, ka kitea e ahau i te ara he māramatanga i te rangi, e tiaho ana ki a au, ki oku hoa haere ano hoki, tera atu i te māramatanga o te ra.
- 14
- Heoi hinga katoa ana matou ki te whenua, ka rongo ahau i te reo e korero mai ana ki a au, no nga Hiperu ano hoki te reo, e mea ana, E Haora, e Haora, he aha tau e whakatoi nei i a au? ehara tau te whana ki nga koikoi.
- 15
- Ano ra ko ahau, Ko wai koe, e te Ariki? Ka mea mai ia, Ko Ihu ahau e whakatoia nei e koe.
- 16
- Otira whakatika, e tu ou waewae ki runga: ko te mea tenei i puta ai ahau ki a koe, kia meinga koe hei kai mahi hei kai whakaatu mo nga mea i kite nei koe, me nga mea ano hoki e kitea ai ahau e koe.
- 17
- Ka whakaorangia koe i te iwi, i nga tauiwi ano hoki, ka tonoa nei koe ki a ratou,
- 18
- Hei whakatitiro i o ratou kanohi, hei whakatahuri mai i te pouri ki te māramatanga, i te kaha ano hoki o Hatana ki te Atua, kia whiwhi ai ratou ki te murunga hara, i runga o te whakapono ki a au, ki tetahi wahi ano hoki i roto i te hunga ka oti te whakatapu.
- 19
- No reira, kihai ahau i whakatuturi, e kingi Akaripa, ki te mea o te rangi i puta mai ra:
- 20
- Heoi i mātua korero ahau ki te hunga i Ramahiku, i Hiruharama, ki te whenua katoa ano hoki o Huria, ki nga tauiwi hoki, kia ripeneta, kia tahuri ki te Atua, me te mahi ano ratou i nga mahi tika o te ripeneta.
- 21
- No reira nga Hurai i hopu ai i a au i te temepara, i whai ai kia whakamatea ahau.
- 22
- Heoi ka awhinatia mai ahau e te Atua, ka tu tonu nei ahau, a mohoa noa nei, me te korero ki te iti ki te rahi, kahore aku kupu ke ake i ta nga poropiti ratou ko Mohi i mea ai meake puta mai:
- 23
- Ara ko te Karaiti kia mate, ko ia te matamua o te aranga mai o te hunga mate, a māna e whakapuaki te māramatanga ki te iwi, ki nga tauiwi ano hoki.
- 24
- I a ia e korero ana i enei mea, nui atu te reo o Petuha ki te karanga mai, E Paora, e haurangi ana koe; na te nui o tou korero pukapuka i haurangi ai koe.
- 25
- Ano ra hoki ko ia, Kahore oku haurangi, e Petuha, e te tangata pai rawa; engari he pono, he whai whakaaro, aku kupu e whakapuaki nei.
- 26
- E mātau ana hoki te kingi ki enei mea, i maia ai ahau ki te korero atu ki a ia: e mea ana hoki ahau, kahore tetahi o enei mea i ngaro i a ia; kihai hoki tenei mea i mahia i roto i te kokonga.
- 27
- E whakapono ana ranei koe ki nga poropiti, e Kingi Akaripa? e mea ana ahau, tenei koe te whakapono nei.
- 28
- Ano ra ko Akaripa ki a Paora, Wahi iti kua riro atu ahau ki tau ki ta te Karaiti tikanga.
- 29
- Na, ko te meatanga mai a Paora, Ko taku tenei e inoi nei ki te Atua, kia kaua e iti, engari kia tino nui, kia kaua ano hoki e waiho i tou kotahi, engari kia tino rite ki a au te hunga katoa e whakarongo mai nei ki a au i naianei: ko enei mekameka ia kia kore.
- 30
- A ka mutu enei korero ana, ka whakatika te kingi, raua ko te kawana, a Pereniki, ratou ko te hunga i noho tahi ratou:
- 31
- Na, haere ke ana ratou, ka korerorero ki a ratou ano, ka mea, Kahore he hanga a tenei tangata e tika ai te mate, te here ranei.
- 32
- Katahi ka mea a Akaripa ki a Petuha, Ka tukua tenei tangata kia haere, me i kaua ia te karanga ki a Hiha.
Address: 
Phone: 
Email: