- 1
- Ano ka takoto te tikanga kia rere matou ki Itari, ka tukuna atu a Paora, me ara atu herehere ki tetahi keneturio, ko Huriu te ingoa, no te hapu io Akuhata.
- 2
- Na, eke ana matou ki tetahi kaipuke o Ataramitiuma, i mea kia tika ra nga kāinga o Ahia rere ana; ko Aritaku o Teharonika he tangata no Makeronia, to matou hoa.
- 3
- Po tahi ka whakau ki Hairona. Na, ka ngawari te mahi a Huriu ki a Paora, a tukua ana ia kia haere ki ona hoa kia atawhaitia.
- 4
- Rere atu ana i reira, ka miri haere matou i te taha o Kaiperu, no te mea i hē te hau.
- 5
- Whiti atu ana matou i te moana o Kirikia, o Pamapuria, ka u ki Maira o Raikia.
- 6
- Na, ka mau i te keneturio he kaipuke ki reira no Arehanaria, e rere ana ki Itari; ka utaina matou ki runga.
- 7
- A ka po maha i puhoi ai te rere, ka whiti whakauaua ki te ritenga atu o Hiniru, a, tē tukua atu matou e te hau, ka miri haere matou i te taha o Kariti i te ritenga atu o Haramone;
- 8
- A ka pahemo whakauaua a reira, ka u matou ki tetahi kāinga, ko nga Kokoru ataahua te ingoa; e tata ana a reira, ki te pa o Rahia.
- 9
- A ka maha nga ra ka pahemo, na, kua kino te rerenga, no te mea kua pahemo ke te po noho puku, ka whakatupato a Paora,
- 10
- Ka mea ki a ratou, E mara ma, e kite ana ahau i te kino i te nui o te hē e pa mai i tenei rerenga, ehara i te mea ko te utanga anake me te kaipuke, engari ko tatou ano hoki.
- 11
- Heoi ka whakaae atu te keneturio ki ta te rangatira, raua ko te tangata nona te kaipuke, whakanuia ake e ia ta raua i ta Paora i korero ai.
- 12
- A, tē pai taua kokorutanga hei tunga i te hotoke, i mea te tokomaha kia rere atu ano i reira, me kore e u ki Piniki, ki reira tu ai i te hotoke; he kokorutanga ia no Kariti, e anga ana ki te weta ma tonga ki te weta ma nota.
- 13
- A ka parekareka te tonga, ka mea ratou kua taea ta ratou i whakaaro ai, ka hutia; miri haere ana i Kariti.
- 14
- Na, kihai i roa ka puta ke he hau nui whakaharahara, ko Urokaraiona te ingoa.
- 15
- A ka kahakina te kaipuke, te ngongo ki te hau, na, ka tukua kia paea.
- 16
- Na, ka miri i te taha ruru o tetahi motu, tona ingoa ko Karaura, ka riro whakauaua mai te poti i a matou:
- 17
- A ka hutia ake, ka hangā ki te whakau, ka whakawhaiawhitia te tangere o te puke; ano ka mataku kei eke ki te tahuna, ka tukua te ra, a ka paea haeretia.
- 18
- Ano ka tino akina matou e te tupuhi, i te aonga ake ka akiritia e ratou nga utanga;
- 19
- A i te toru o nga ra, ka makā atu e o matou ringaringa ake nga mea ake ano o te kaipuke.
- 20
- A he maha nga ra i kore ai i puta te ra me nga whetu, kihai ano hoki i iti te tupuhi i akina ai matou, na, ka mahue katoa ta matou whakaaro ki te ora.
- 21
- Heoi ka roa te nohoanga pukutanga, na, ka tu a Paora i waenganui o ratou, ka mea, E mara ma, engari ra me i whakarongo koutou ki a au, a kihai i rere mai i Kariti, kei pa mai tenei kino, tenei mate.
- 22
- Na, ko taku kupu tenei ki a koutou, Kia mārama te ngakau: e kore hoki e mate tetahi o koutou, ko te kaipuke anake.
- 23
- I tu hoki ki toku taha i tenei po he anahera no te Atua, nāna nei ahau, ko ia taku e karakia atu nei,
- 24
- I mea mai, Aua e mataku, e Paora; me tu koe ki te aroaro o Hiha: na, tena kua hoatu ki a koe e te Atua te hunga katoa e rere tahi na koutou.
- 25
- Na, kia mārama te ngakau, e hoa ma: e whakapono ana hoki ahau ki te Atua, e rite ano ki tana i korero mai ai ki a au.
- 26
- Otira kua takoto te tikanga kia eke tatou ki tetahi motu.
- 27
- Na, i te tekau ma wha o nga po, i a matou e kahakihakina ana i Aria, i waenganui po, ka mea nga kai mahi kaipuke ka tata tetahi whenua ki a ratou;
- 28
- Na, ka whakatatūtū ratou, ka kite e rua tekau maro: a ka neke tata atu, ka whakatatūtū ano, ka kite ratou kotahi tekau ma rima maro.
- 29
- Na, ka mataku kei paea matou ki nga toka, ka tukua nga punga e wha i te kei, ka hiahia ki te awatea.
- 30
- A i nga kai mahi kaipuke e mea ana kia oma atu i te kaipuke, a e tuku ana i te poti ki te moana, he whakaware, kia kiia ai e tukua ana etahi punga i te ihu,
- 31
- Ka mea a Paora ki te keneturio ratou ko nga hoia, Ki te kore enei e noho ki te kaipuke, e kore koutou e taea te whakaora.
- 32
- Katahi ka kotia nga whakaheke o te poti e nga hoia, a tukua ana kia taka atu.
- 33
- A i te mea meake puao te ra, ka tohe a Paora ki a ratou katoa kia kai, ka mea, Ko te tekau ma wha tenei o nga ra e tatari nei koutou, e noho puku nei, tē o te kai.
- 34
- Koia ahau ka tohe atu nei kia kai: ko tetahi mea hoki tenei e ora ai koutou: e kore hoki e ngahoro tetahi huruhuru o te upoko o tetahi o koutou.
- 35
- A, tana korerotanga i enei kupu, na, ka mau ia ki te taro, ka whakawhetai atu ki te Atua i te aroaro o te katoa: a ka whawhati, ka timata te kai.
- 36
- Na, ka mārama nga ngakau o ratou katoa, a ka kai ano hoki ratou.
- 37
- Na, e rua rau e whitu tekau ma ono matou katoa i te kaipuke.
- 38
- Ano ka makona i te kai, ka whakamama ratou i te kaipuke, ka akiritia te witi ki te moana.
- 39
- A ka ao te ra kihai ratou i mohio ki tera whenua: a, te kitenga i tetahi kokorutanga he one ano to reira, na, ka mea ratou me kore e ahei te aki atu i te kaipuke ki roto.
- 40
- Na, kotia ana e ratou nga punga, tukua ana ki te moana, i whakakorokoroa ano hoki nga here o te urungi, ka hutia ano te ra nui ki te hau, ka tika atu ki te one.
- 41
- A ka puta atu ki tetahi wahi i nga tai papaki rua, ka whakaekea te kaipuke; a titi tonu te ihu, mau tonu, ko te kei i pakaru i te kaha o te ngaru.
- 42
- A ki ta nga hoia whakaaro me whakamate nga herehere, kei kau tetahi ki uta, kei oma.
- 43
- Ko te keneturio ia i mea kia whakaorangia a Paora, a kihai i tukua ki ta ratou i whakaaro ai; na, ka mea ia, kia mātua peke atu te hunga e mātau ana ki te kau, kia kau atu ki uta:
- 44
- Ara atu, etahi i runga i nga papa, etahi i runga i etahi o nga mea o te kaipuke. Heoi tae ora katoa ana ratou ki uta.
Address: 
Phone: 
Email: