- 1
- A ka ora ratou, katahi ka mohio ko Merita te ingoa o te motu.
- 2
- Na, kihai i nohinohi te atawhai a nga tāngata maori ki a matou: ka tahuna he kapura, a whakamanuhiritia ana matou katoa, no te mea e ua ana te ua, no te matao hoki.
- 3
- Na, ka kohikohia e Paora he pupu wahie, a makā ana e ia ki te kapura: heoi puta mai ana he neke i te werawera, ka mau ki tona ringa.
- 4
- A, te kitenga o nga tāngata maori i te ngarara e werewere ana ki tona ringaringa, ka mea ratou tetahi ki tetahi, Koia, he tangata kohuru tenei, ka ora nei ia i te moana, na, kihai i tukua e te Tika kia ora.
- 5
- Otiia i ruia atu e ia te ngarara ki te kapura, a kihai i mate, kihai i aha.
- 6
- Na, whanga noa ratou kia tetere ia, kia hinga whakarere ranei, kia mate: heoi ka roa noa to ratou whanganga, a, te kitenga kahore he aha i pa ki a ia, ka puta ke o ratou whakaaro, ka mea ratou, he atua ia.
- 7
- I taua wahi ano te kāinga o te tino rangatira o te motu, ko Pupiria te ingoa: he manuhiri matou nāna; e toru nga ra i atawhaitia ai matou e ia.
- 8
- Na, i te takoto te pāpā o Pupiria, e mate ana i te kiri ka, i te koripi: heoi ka tomo atu a Paora ki a ia, ka inoi, ka pakia iho ona ringaringa ki a ia, a ora ake.
- 9
- A, te meatanga o tenei, na, ka haere mai ano era atu o te motu he mate o ratou, a ka whakaorangia:
- 10
- A nui atu te honore i whakahonoretia ai matou e ratou; a i to matou rerenga ka utaina mai nga mea e pai ana ma matou.
- 11
- A muri iho i nga marama e toru, ka rere matou i runga i tetahi kaipuke o Arehanaria, i tu nei ki taua motu i te hotoke, ko Katoro raua ko Poruku te ingoa.
- 12
- Na, ka u atu ki Hairakuha, a e toru o matou ra i noho ai ki reira.
- 13
- Na, ka awhio ake matou i reira, a ka u ki Rekiuma: ka po tahi ka pa te tonga, a i te rua o nga ra ka u ki Puteori:
- 14
- Ano ka kitea nga tuakana i reira, ka tohea matou kia noho i a ratou, kia whitu nga ra: heoi haere ana matou ki Roma.
- 15
- A ka rongo nga tuakana o reira ki a matou, ka haere mai ki te whakatau i a matou ki Apiuwhoruma, ki Wharetoru: a, te kitenga o Paora i a ratou, ka whakawhetai atu ki te Atua, ka ora te ngakau.
- 16
- Na, ka tae matou ki Roma, a ka hoatu nga herehere e te keneturio ki te rangatira hoia: ko Paora ia i tukua kia noho motu ke raua ko tetahi hoia, hei tiaki i a ia.
- 17
- A muri iho i nga ra e toru, ka huihuia e Paora nga tino tāngata o nga Hurai: a, to ratou minenga mai, ka mea ia ki a ratou, E hoa ma, e aku tuakana, kahore nei aku hara ki te iwi, ki nga ritenga ranei o nga mātua, i tukua ai ahau i Hiruharama hei herehere ki nga ringaringa o nga tāngata o Roma.
- 18
- A, toku whakawakanga e ratou, ka mea ratou kia tukua ahau, no te mea kahore he take e mate ai ahau.
- 19
- Heoi ka whakahe tonu nga Hurai; e taea hoki te aha? karanga ana ahau ki a Hiha; kahore ia aku mea e whakawa ai ahau i toku iwi.
- 20
- Koia ahau i karanga ai i a koutou kia kite, kia korero ki a koutou: no te mea hoki ko ta Iharaira e tumanako atu nei te mea i herea ai ahau ki tenei mekameka.
- 21
- Na, ko ta ratou meatanga mai ki a ia, Kahore ano he pukapuka mou i tae mai ki a matou i Huria, kahore ano hoki tetahi o nga tuakana i haere mai nei i kawe kupu mai, i korero mai ranei i tetahi kino mou.
- 22
- Otira e mea ana matou kia rongo ki a koe i āu whakaaro: e mohio ana hoki matou ki tenei tikanga, e korerotia kinotia ana i nga wahi katoa.
- 23
- A ka oti te whakarite he ra ki a ia, he tokomaha i haere mai ki a ia ki tona whare; a whakakitea atu ana e ia ki a ratou, whakaaturia atu ana e ia, te rangatiratanga o te Atua, me te tiki ano i ta te ture a Mohi i ta nga poropiti, hei kukume i a ratou ki nga mea o Ihu, no te ata a ahiahi noa.
- 24
- Ko etahi i whakapono ki nga mea i korerotia, ko etahi kihai i whakapono.
- 25
- A, tē rite a ratou korero, ka puta atu ratou, me te korero ano a Paora i tetahi kupu, Tika tonu te korero a te Wairua Tapu i a Ihaia poropiti ki o tatou mātua,
- 26
- I mea nei, Haere ki tenei iwi, mea atu, Rongo noa koutou, na, e kore e mātau; titiro noa koutou, na, e kore e kite:
- 27
- Kua matotoru hoki te ngakau o tenei iwi, e puhoi ana nga taringa ki te whakarongo, ko o ratou kanohi kua oti te whakamoe e ratou; kei kite nga kanohi, kei rongo nga taringa, kei mātau te ngakau, a ka tahuri ratou, ka whakaorangia e ahau.
- 28
- Na, kia mohio koutou, ka tonoa te whakaoranga a te Atua ki nga tauiwi, a ka rongo ano ratou.
- 29
- A ka mutu tenei korero āna, ka haere nga Hurai, he nui hoki ta ratou tautohetohe ki a ratou ano.
- 30
- A e rua tino tau i noho ai a Paora ki tona whare i utua e ia, a tukua tonutia mai ana e ia te hunga katoa e tomo mai ana ki a ia;
- 31
- A maia tonu ia ki te kauwhau i te rangatiratanga o te Atua, ki te whakaako i nga mea o te Ariki o Ihu Karaiti, kihai ano hoki i riria.
Address: 
Phone: 
Email: