- 1
- Na Paora, na te pononga o Ihu Karaiti, i karangatia hei apotoro, i motuhia ki te rongo pai a te Atua,
- 2
- (I korerotia e ia i mua, ara e ana poropiti i roto i nga Karaipiture tapu,)
- 3
- Mo tana Tama, mo to tatou Ariki mo Ihu Karaiti, i whanau nei he uri no Rawiri, no te wahi ki te kikokiko;
- 4
- I whakapuakina mai nei ko te Tama a te Atua i runga i te kaha, i runga i ta te Wairua o te Tapu, i te mea ka whakaarahia mai nei i te mate:
- 5
- Nāna nei matou i whiwhi ai ki te aroha noa, ki te mahi apotoro, kia ngohengohe mai ai kia whakapono ai nga iwi katoa, hei mea mo tona ingoa:
- 6
- No ratou nei hoki koutou, he hunga karanga na Ihu Karaiti:
- 7
- Ki te hunga katoa i Roma e arohaina nei e te Atua, ka oti nei te karanga hei hunga tapu: Kia tau ki a koutou te aroha noa me te rangimarie, he mea na te Atua, na to tatou Matua, na te Ariki hoki na Ihu Karaiti.
- 8
- Taku tuatahi he whakawhetai ki toku Atua, i roto i a Ihu Karaiti, mo koutou katoa, no te mea e korerotia ana to koutou whakapono i te ao katoa.
- 9
- Ko te Atua, e mahi nei toku wairua ki a ia i roto i te rongo pai o tana Tama, hei kai whakaatu moku, mo te mau tonu o taku maharahara ki a koutou, i aku karakiatanga i nga wa katoa;
- 10
- E inoi ana me kore e pai te Atua ko tenei haerenga nei oku ki a koutou, kia whakatikaia.
- 11
- Nui atu hoki taku hiahia kia kite i a koutou, kia whakawhiwhia ai ano hoki koutou e ahau ki tetahi hoatutanga he mea wairua, kia whakaungia ai koutou;
- 12
- Ara, kia ora ngatahi ai toku ngakau me o koutou i te whakapono o tatou tahi, o koutou oku,
- 13
- Na, e kore ahau e mea, e aku teina, kia ngaro i a koutou, te maha o aku meatanga kia haere atu ki a koutou, (heoi araia mai ana ahau, a mohoa noa nei,) kia whiwhi ai ano hoki ahau ki tetahi hua i roto i a koutou, ki te pera me o era tauiwi.
- 14
- Nga Kariki, nga tautāngata, nga mohio, nga whakaaro-kore, he nama ta ratou kei runga i a au.
- 15
- A, e ngakau nui ana ano ahau kia whakapaua taku ki te kauwhau i te rongo pai ki a koutou ano hoki i Roma.
- 16
- Kahore hoki oku whakama ki te rongo pai o te Karaiti: ko te kaha hoki ia o te Atua hei whakaora mo nga tāngata katoa e whakapono ana; mo te Hurai ki mua, mo te Kariki ano hoki.
- 17
- Kei reira hoki e whakakitea ana ta te Atua tika, he mea no te whakapono ki te whakapono: kua oti nei hoki te tuhituhi, Ma te whakapono e ora ai te tangata tika.
- 18
- E whakakitea iho ana hoki i te rangi ta te Atua riri ki nga karakiakoretanga katoa, ki nga hē o nga tāngata, e pupuri ana i te pono i runga i te hē;
- 19
- Kei roto hoki i a ratou e mārama ana nga mea o te Atua e taea te mohio; kua whakamaramatia nei hoki e te Atua ki a ratou.
- 20
- Nga mea hoki ona, kahore nei i kitea, e kitea nuitia ana no te hanganga iho ra ano o te ao, he mea whakaatu ki nga mea i hangā, ara tona kaha o tua iho, me tona Atuatanga; e kore ai he kupu whakahoki atu ma ratou:
- 21
- I a ratou nei hoki e mātau ana ki te Atua, kihai ratou i whakakororia i a ia hei Atua, kihai i whakawhetai atu; heoi kua kuare o ratou whakaaro, a pouri ana o ratou ngakau pohehe.
- 22
- I a ratou e mea ana he mohio ratou, wairangi noa iho ratou,
- 23
- A whakaputaina ketia ake te kororia o te Atua e kore nei e pirau, kia rite ki te ahua o te tangata pirau noa, o nga manu o nga waewae wha, o nga mea ngokingoki.
- 24
- Koia hoki ratou i tukua ai e te Atua ki te mahi poke, i runga i nga hiahia o o ratou ngakau, a whakatutuatia iho o ratou tinana e ratou whakaratou:
- 25
- Whakarerea ake e ratou to te Atua pono, ka mau ke ki te teka, a karakia ana mahi ana ki te mea hanga, kapea ake te Kai hanga, ko ia nei te whakapaingia ake ake. Amine.
- 26
- Koia ratou i tukua ai e te Atua ki nga hiahia tūtūa: a ratou wāhine hoki, mahue ake te tikanga maori, kei te ngau ke noa atu:
- 27
- Me nga tāne ano hoki, whakarerea ake e ratou te tikanga maori ki te wahine, ano he ahi te kānga o to ratou hiahia ki a ratou ano; nga tāne ki nga tāne, mahi ai i te hanga whakama, me te whiwhi ano ratou ki te utu e rite ana mo ta ratou ngaunga ketanga.
- 28
- A i a ratou kihai nei i pai kia mau tonu te Atua ki o ratou mahara, tukua ana ratou e te Atua ki te hinengaro hē, kia mahia nga mea kahore e tau kia mahia;
- 29
- Kī tonu ratou i nga mahi hē katoa, i te moepuku, i te kino, i te apo, i te mauahara; whawhao rawa i te hae, i te kohuru, i te totohe, i te hianga, i te whano ke; he hunga kohumuhumu,
- 30
- He hunga ngau-tuara, kino ki te Atua, he hunga whakahihi, whakakake, whakapehapeha, he kai tito i nga mea kino, e turi ana ki nga mātua,
- 31
- Kahore o ratou matauranga, he hunga kupu taka, kahore nei he aroha, he hunga takahi kawenata, kahore e tohu tangata:
- 32
- E mātau nei ano ratou ki ta te Atua tikanga, e tika te mate mo nga kai mahi i enei mea, heoi mahia ana e ratou ko aua mea na ano, whakaae ana ano hoki ki te hunga e pera ana te mahi.
Address: 
Phone: 
Email: