- 1
- Ko te kupu tenei a Ihowa; Ka toru nei, ka wha ano hoki nga pokanga ketanga a Moapa, na, e kore e whakatahuritia atu e ahau te whiu mona, nana hoki i tahu nga wheua o te kingi o Eroma hei kotakota.
- 2
- Engari ka tukua atu e ahau he ahi ki Moapa, e pau ai nga whare kingi o Kirioto, a ka mate a Moapa i runga i te ngangau, i te hamamatanga, i te tangi o te tētere.
- 3
- Ka hatepea atu ano hoki e ahau te kai whakarite whakawa i roto i a ia, ka patua ano ia e ahau, ratou tahi ano ko nga rangatira katoa o reira, e ai ta Ihowa.
- 4
- Ko te kupu tenei a Ihowa, Ka toru nei, ka wha ano hoki nga pokanga ketanga a Hura, na, e kore e whakatahuritia atu e ahau te whiu mona; na ratou hoki i whakahawea ki te ture a Ihowa, kihai ano ana tikanga i puritia e ratou, a kotiti ke ana ratou i ā ratou korero teka, i whaia nei e o ratou mātua.
- 5
- Engari ka tukua atu e ahau he ahi ki a Hura, e pau ai nga whare kingi o Hiruhararna.
- 6
- Ko te kupu tenei a Ihowa, Ka toru nei, ka wha ano hoki, nga pokanga ketanga a Iharaira, na, e kore e whakatahuritia atu e ahau te whiu mona; na ratou hoki i hoko atu te tangata tika ki te hiriwa, te rawa-kore ano hoki ki nga hu e rua.
- 7
- Kihakiha ana ratou, he meatanga ki te puehu o te whenua i runga i te māhunga o nga ware: te ara ano hoki o te hunga mahaki whakaparoritia ketia ake e ratou: te tangata raua ko tona pāpā, haere ana raua ki te kotiro kotahi, hei whakapoke i toku ingoa tapu.
- 8
- A takoto ana ratou i runga i nga kakahu i homai hei taunaha ki te taha o nga aata katoa, e inumia ana hoki e ratou i roto i te whare o to ratou atua te waina a te hunga i whakahengia i te whakawakanga.
- 9
- I whakangaromia ano ia e ahau te Amori i to ratou aroaro, tona roa koia ano kei te roa o nga hita, he mea kaha ano ia, ano ko nga oki; heoi whakangaromia ana e ahau ona hua i runga, ona pakiaka ano hoki i raro.
- 10
- I kawea mai ano hoki koutou e ahau i te whenua o Ihipa, a e wha tekau nga tau i arahina ai koutou e ahau i te koraha, he mea kia riro mai ai te whenua o te Amori.
- 11
- I whakaturia ano hoki e ahau etahi o a koutou tamariki hei poropiti, etahi o a koutou taitamariki hei Natari. He teka ianei tenei, e nga tamariki a Iharaira? e ai ta Ihowa.
- 12
- Heoi whakainumia ana e koutou nga Natari ki te waina, a korero ana koutou ki nga poropiti, ki atu ana, Kaua e poropiti.
- 13
- Nana, e pehia ana tenei ahau i raro i a koutou, kei te pehanga o te kāta e ki ana i nga paihere te rite.
- 14
- Mo reira ka whakakahoretia te oma o te tangata tere, e kore ano e u te kaha o te tangata kaha, e kore ano te marohirohi e mawhiti mai i te mate;
- 15
- E kore ano te kai pupuri o te kopere e tu, e kore ano te wae tere e mawhiti: e kore ano hoki te kai eke hoiho e mawhiti mai i te mate.
- 16
- Te ngakau maia ano hoki i roto i nga marohirohi, ka oma tahanga atu i taua ra, e ai ta Ihowa.
Address: 
Phone: 
Email: